ރޯމް (ޖޫން 1) - މީގެ ފަސް އަހަރު ކުރިން މެންޗެސްޓާ ޔުނައިޓެޑަށް ބަދަލުވުމާ ގާތަށް ދިޔަ ކަމަށާއި އެ ޓްރާންސްފާ ކުރިއަށްނުދިޔަ ސަބަބު، ރޯމާގެ އެޓޭކަރު، ޕައޮލޯ ޑިބާލާ ހާމަކޮށްފި އެވެ.
ޑިބާލާ، 30، ޔުވެންޓަސް އަށް ކުޅެމުން ދަނިކޮށް، 2019 ވަނަ އަހަރު، ޔުނައިޓެޑާއި ޓޮޓެންހަމް ހޮޓްސްޕާސް އިން އޭނާ ގަންނަން ގިނަ ބިޑްތަކެއް ކުރި އެވެ. އޭރު ޔުވެންޓަސް އިން، ވަނީ ޑިބާލާ ދޫކޮށްލަން ނިންމައިފަ އެވެ.
"އެ ފަހަރު ހޫނު މޫސުމުގެ ޓްރާންސްފާ މާކެޓްގައި، މެންޗެސްޓާ ޔުނައިޓެޑާއި ޓޮޓެންހަމްގެ އޮފާއެއް އައި. ހަގީގަތުގައި ޔުވެންޓަސް އިން ނިންމި އަހަރެން ޔުނައިޓެޑަށް ދޫކޮށްލަން،" އެތުލެޓިކް ނޫހަށް ދިން އިންޓަވިއުއެއްގައި ޑިބާލާ ބުންޏެވެ.
އިޓާލިއަން ލީގުގައި އެންމެ ފުރަތަމަ ސަމްޑޯރިއާ އަށް ކުޅުނު ޑިބާލާ ބުނީ، ޔުނައިޓެޑަށް އޭނާ ދޫކޮށްލަން ޔުވެންޓަސް އިން ނިންމި ނަމަވެސް އޭނާ ބޭނުންވީ އެ ސީޒަނުގައި އެ ޓީމާ ހަވާލުވި ކޯޗު، މައުރީޒިއޯ ސާރީއާ ވާހަކަ ދެއްކުމަށް ކަމަށެެވެ.
"އަހަރެން ބޭނުންވި އޭނަ (ސާރީ) ދެކޭގޮތެއް ބަލަން. އެ ބައްދަލުވުމަށް ފަހު، އަހަރެން މަޑުކުރާގޮތަށް ނިންމީ، ހަގީގަތުގައި ރަނގަޅަަކަށް ދިމާވި ކަމެއް. އެ ސީޒަނުގައި އަހަރެންގެ ކުޅުން އެންމެ ރަނގަޅަށް ދިޔައީ،" ޑިބާލާ ބުންޏެވެ.
ޑިބާލާ، 2022 ވަނަ އަހަރުގެ ޖޫން މަހު، ޔުވެންޓަސްގެ ކޮންޓްރެކްޓް ހަމަވުމުން، ރޯމާ އަށް ސޮއިކުރީ ތިން އަހަރުގެ ކޮންޓްރެކްޓެއްގަ އެވެ. ރޯމާ އަށް ސޮއިކުރުމަށް ފަހު، ޑިބާލާ ވަނީ ކްރިސްޓިއާނޯ ރޮނާލްޑޯގެ ޖޯޒީ ރެކޯޑް މުގުރާލައިފަ އެވެ. އެއީ، އިޓަލީގެ ކްލަބަކަށް ސޮއިކުރުމަށް ފަހު، ފުރަތަމަ 24 ގަޑިއިރުތެރޭގައި އެންމެ ގިނަ ޖޯޒީ ވިކުމުގެ ރެކޯޑެވެ.
އެމެރިކާގައި މި މަހު ފަށާ، ކޮޕަ އެމެރިކާ ފުޓްބޯޅަ މުބާރާތަށް އާޖެންޓީނާގެ ކޯޗު، ލިއޮނަލް ސްކަލޯނީ ނެގި ސްކޮޑުގައި ޑިބާލާ ހިމަނާފައިނުވެ އެވެ. އެއީ އޭނާގެ އަނިޔާގެ މައްސަލަތަކުގެ ސަބަބުންނެވެ. ޑިބާލާ ވަނީ މި ސީޒަނުގައި ރޯމާ އަށް ކުޅެދިން، 39 މެޗުގައި 16 ލަނޑު ޖަހައިފަ އެެވެ.
އަންނަ ސީޒަނުގެ ނިޔަލަށް ރޯމާގެ ކޮންޓްރެކްޓްގައި ހުރި ޑިބާލާ ބުނީ، އެހެން ލީގެއް ތަޖުރިބާކޮށްލަން ވެސް ބޭނުންވާ ކަމަށާއި އެކަމަކު، 12 އަހަރު ވަންދެން އިޓަލީގައި އޭނާ ކުރި ތަޖުރިބާތަކަށް ބަލާއިރު، އަދިވެސް އެ ލީގުގައި ކުރިއަށްދާން ބޭނުންވާ ކަމަށެވެ.
