އަންހެނަކާއެކު އޮތް ގުޅުން އޮއްބާލަން ލާރިދިން މައްސަލާގައި އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް ކުރި ދައުވާ ސާބިތުވާ ކަމަށް ނިންމައިފި އެވެ.
މިއީ އެމެރިކާގެ ރައީސްކަން ކުރި މީހެއްގެ މައްޗަށް އެ ގައުމުގެ ކޯޓެއްގައި ކުށެއް ސާބިތުވި ފުރަތަމަ ފަހަރަށެވެ. އޭނާގެ މައްޗަށް ދައުވާ އުފުލާފައިވަނީ ރައީސްކަމަށް ވާދަކުރެއްވި ދުވަސްވަރު ކެމްޕޭނާ ލިބިދާނެ ގެއްލުން ކުޑަ ކުރުމަށް، ސްޓޯމީ ޑެނިއަލްސް ނަމަކަށް ކިޔާ މީހަކަށް ފައިސާ ދިން މައްސަލާގަ އެވެ.
ޓްރަމްޕް، ސްޓޯމީއަށް 130،000 ޑޮލަރު ދީފައިވާއިރު، އެ ފައިސާ ދިނުމަށް މަގުފަހިކުރީ ޓްރަމްޕް ވިޔަފާރީގެ ހިސާބުތައް އޮޅުވާލައްވައި އޭނާގެ ކުރީގެ ވަކީލް ކޯއެން މެދުވެރިކޮށް ކަމަށްވެސް ދައުވާގައި ބުނެފައިވެ އެވެ.
މި މައްސަލާގައި ޓްރަމްޕްގެ މައްޗަށް ތަފާތު 34 ދައުވާއެއް އުފުލާފައިވާއިރު، މައްސަލާގައި ނިޔާ ކަނޑައެޅު ނިއު ޔޯކުގެ ޖޫރީ އިން ނިންމާފައިވަނީ އެ ހުރިހާ ދައުވާއެއްވެސް ޓްރަމްޕްގެ މައްޗަށް ސާބިތުވާ ކަމަށެވެ. ނަމަވެސް މި ދައުވާތަކުގެ ހުކުމް އިއްވުން ތާވަލުކޮށްފައިވަނީ ޖުލައި 11، އަށެވެ.
ޓްރަމްޕްގެ ގާނޫނީ ޓީމުން ޖޫރީގެ ނިންމުން އިސްތިއުނާފު ކުރާނެ ކަމަށް ބުނެފައިވާއިރު މިކަމުގެ ސަބަބުން ހުކުމް އިއްވުން އިތުރަށް ލަސްވެދާނެ ކަމަށް ބެލެވެ އެވެ.
މި ހުރިހާ ދައުވާއަކަށް ޖުމްލަ 100 އަށްވުރެ ގިނަ އަހަރުގެ ޖަލު ހުކުމް ޓްރަމްޕްގެ މައްޗަށް އަންނާނެ ކަމަށް ބެލެވުނު ނަމަވެސް، އޭނާ މި ކުށުގައި ޖަލު ހުކުމް ތަންފީޒު ކުރުމުގެ ފުރުސަތު ކުޑަ އެވެ. ބެލެވޭ ގޮތުގައި ޓްރަމްޕްއަށް އިއްވާނީ ޕްރޮބަޝޭންގެ އަދަބެކެވެ.
އެމެރިކާގެ ގާނޫނުގައިވާ ގޮތުން، މި ދައުވާތައް ސާބިތުވުމާއެކު ޖަލު ހުކުމެއް އިއްވިޔަސް ނޮވެމްބަރު މަހު ބާއްވާ އެ ގައުމުގެ ރިޔާސީ އިންތިހާބުގައި ޓްރަމްޕަށް ވާދަކުރެވޭނެ އެވެ. އެމެރިކާގެ ރައީސަކަށް ވުމުގެ ގާނޫނީ ޝަރުތުތަކަކީ 35 އަހަރުވެފައި ވުމާއި، އެމެރިކާގައި ވިހާފައިވާ ރައްޔިތަކަށް ވުމާއި، މަދުވެގެން 14 އެ ގައުމުގައި ވަޒަންވެރިވެ އުޅުމެވެ.
އިންތިހާބުގެ ފުރުސަތު ނުގެއްލުނަސް، ޖޫރީގެ ނިންމުން ޓްރަމްޕް ސިފަކުރައްވާފައިވަނީ ސިޔާސީ ބޭނުމުގައި ކޮށްފައިވާ ދައުވާތަކެއް ހެއްކެއް ނެތި ސާބިތު ކުރުމަށް ޖަހާ ސަކަރާތެއް ކަމަށް ވިދާޅުވެފަ އެވެ. މީގެއިތުރުން، އޭނާގެ އަމިއްލަ ސޯޝަލް މީޑިއާ ޕްލެޓްފޯމް 'ޓްރޫތް ސޯޝަލް' ގައި ޓްރަމްޕް ވަނީ މައްސަލާގެ އަސްލު ހުކުމް ރައްޔިތުން ނޮވެމްބަރު މަހުގެ ވޯޓުގައި އިއްވާނެ ކަމަށް ވިދާޅުވެފަ އެވެ.
