ޔޫއެންޑީޕީ އާއި ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) އިން 135 މިލިއަން ޑޮލަރުގެ އާ ބްލޫ އެންޑް ގްރީން އައިލެންޑްސް އިންޓަގްރޭޓެޑް ޕްރޮގްރާމް (ބީޖީއައި-އައިޕީ) ފަށައިފި އެވެ.
ޔޫއެންޑީޕީން ބުނި ގޮތުގައި އެ ޕްރޮގްރާމުގެ މަގުސަދަކީ އުމްރާނީ ތަރައްގީއާއި ކާބޯތަކެތި އުފެއްދުން އަދި ފަތުރުވެރިކަން, މި ތިން ދާއިރާއިން ތިމާވެށި ހަލާކުވުމާ ދެކޮޅަށް މަސައްކަތްކުރުމަށް ގުދުރަތީ ހައްލުތައް ފުޅާކުރުމެވެ. އެއީ ކުރިއަރަމުން އަންނަ 15, ކުދި ގައުމަކަށް އަމާޒުކޮށްގެން ކުރިއަށްގެންދާ ޕްރޮގްރާމެކެވެ.
ޔޫއެންޑީޕީން ބަލަހައްޓާ އަދި ޖީއީއެފް އާއި ޕާޓްނަރުން ފަންޑުކުރާ އެ މަސައްކަތަކީ 2024 އިން 2034 އަށް, ކުރިއަށް ގެންދާ ޑެކޭޑް އޮފް އެކްޝަންގައި ކުދި ގައުމުތަކަށް ތާއީދު ކުރުމުގެ "އާ ރާޅެއް"ގެ ބައެކެވެ.
އެ ޕްރޮގްރާމުން އެހީތެރިކަން ފޯރުކޮށްދޭނީ ޝައުގުވެރިކަން ފާޅުކުރާ ސްމޯލް އައިލެންޑް ޑެވެލޮޕިން ސްޓޭޓްސް (ސިޑްސް)ގެ ތެރެއިން ހުރިހާ ސަބް-ރީޖަންތަކެއް ތަމްސީލުވާނެހެން ހޮވާ 15 ގައުމުތަކަށެވެ. މި ޕްރޮގްރާމުގެ ސަބަބުން އާންމު ރައްޔިތުންނަށް ދިމާވާ ގޮންޖެހުންތައް ހައްލުކުރަން ބޭނުންވާ ވަސީލަތްތައް މުޖުތަމައުތަކަށް ލިބިގެންދާނެ އެވެ.
އެ ޕްރޮގްރާމްގެ ދަށުން ދެމެހެއްޓެނިވި ދަނޑުވެރިކަމާއި މަސްވެރިކަމާއި ތިމާވެއްޓާ ރައްޓެހި ފަތުރުވެރިކަން ކުރިއެރުވުމުގެ އިތުރުން ޕޮލިއުޝަން މަދުކުރުމާއި، މޫސުމީ ހާދިސާތަކުން އަރައިގަތުމަށް އެހީތެރިވެދޭނެ އެވެ.
އެ ޕްރޮގްރާމަށް ޝައުގުވެރިކަން ފާޅުކުރި 39 ކުދި ގައުމުގެ ތެރެއިިން ޕްރޮގްރާމަށް ހޮވުނު 15 ގައުމަކީ ބެލިޒް، ކޭޕް ވާޑޭ، ކޮމޮރޯސް، ކިއުބާ، މޯލްޑިވްސް، މޮރިޝަސް، މައިކްރޯނޭޝިއާ، ޕަލާއު، ޕަޕުއާ ނިއު ގިނީ، ސެއިންޓް ލޫސިއާ، ސަމޯއާ، ސީޝެލްސް، ޓިމޯ ލެސްޓޭ، ޓްރިނިޑާޑް އެންޑް ޓޮބަގޯ، އަދި ވަނުއަޓޫ އެވެ.
ޔޫއެންއީޕީ، އެފްއޭއޯ، ވޯލްޑް ބޭންކް، ޑަބްލިޔުޑަބްލިޔުއެފް-ޔޫއެސް، އައިޔޫސީއެން އަދި ޔޫއެންސީސީޑީ ފަދަ ކުންފުނިތަކާ ގުޅިގެން ކުރިއަށްގެންދާ މި ޕްރޮގްރާމަކީ ދެމެހެއްޓެނިވި އިގްތިސާދީ ތަފާތުކުރުމާއި ވަޒީފާ އުފެއްދުމަށް އެހީތެރިވުމުގެ މުހިންމު ވަސީލަތެއް ކަމަށް ޔޫއެންޑީޕީން ބުނެ އެވެ.
