ބީއެމްއެލްއަށް މިދިޔަ އަހަރު ލިބުނު ފައިދާއިންނާއި އެ ކުންފުނިން ޓެކުހުގެ ގޮތުގައި ދެއްކި ފައިސާއިން ސަރުކާރަށް 764.6 މިލިއަން ރުފިޔާ ލިބިއްޖެ އެވެ.
އެވަރުގެ ބޮޑު އަދަދެއް ސަރުކާރަށް ލިބުނީ ރޭ ބޭއްވި ބީއެމްއެލްގެ އަހަރީ އާންމު ޖަލްސާގައި ހިއްސާއަކަށް 50ރ. ބަހަން ނިންމުމުންނެވެ. ސަރުކާރަކީ ބީއެމްއެލްގެ މައި ހިއްސާދާރެވެ. ހިއްސާއަކަށް ޖެހޭ އަދަދު ސަރުކާރުގެ ހިއްސާގެ އަދަދާ ގުނަ ކޮށްލުމުން އެ ކުންފުނީގެ ހިއްސާގެ ގޮތުގައި ސަރުކާރަށް 136.6 މިލިއަން ރުފިޔާ ލިބެ އެވެ.
ބާކީ 628 މިލިއަނަކީ ހުސްވިއަހަރު ބީއެމްއެލުން ޓެކުހުގެ ގޮތުގައި ދައުލަތަށް ދެއްކި ފައިސާ އެވެ.
އެހައި ބޮޑު އަދަދެއް ހިއްސާގެ ފައިދާގެ ގޮތުގައި ބަހަން ފާސްވުމާ ގުޅޭގޮތުން ރޭ ބޭއްވި ބީއެމްއެލްގެ އަހަރީ އާންމު ޖަލްސާގައި އެ ކުންފުނީގެ ސީއީއޯ އަދި މެނޭޖިން ޑިރެކްޓަރު، ކާލް ސްޓުމްކަ ވިދާޅުވީ މިދިޔަ އަހަރު ބޭންކުން ހޯދި ނަތީޖާ ރަނގަޅުވުމުން ކަމަށެވެ.
އޭނާ ވަނީ އެ ކުންފުނީގެ ކަސްޓަމަރުން ދޭ އެއްބާރުލުމަށާއި ބީއެމްއެލްގެ ކަންކަން ރަނގަޅުމަގުން ކުރިއަށް ގެންދިޔުމަށް އެ ކުންފުނީގެ ޑިރެކްޓަރުން ދެއްވާ އިރުޝާދަށް ޝުކުރު އަދާކުރައްވައިފަ އެވެ.
މިދިޔަ އަހަރުގެ ފައިދާގެ ގޮތުގައި ބީއެމްއެލްއަށް 2.07 ބިލިއަން ރުފިޔާ ލިބުނެވެ. އެއީ މިހައިތަނަށް އެ ބޭންކުގެ ތާރީހުގައި ހޯދި ސާފު ފައިދާގެ އެންމެ މަތީ އަދަދެވެ.
