ޓްރީޓޮޕް ހޮސްޕިޓަލުން ފުރިހަމަ ވަސީލަތްތަކާއެކު ކިޑްނީ ޓްރާންސްޕްލާންޓުގެ ހިދުމަތް ފަށަން ތައްޔާރުވެއްޖެ އެވެ.
ޓްރާންސްޕްލާންޓްގެ ހިދުމަތް ފަށަން ޓްރީޓޮޕުން މަސައްކަތް ކުރަމުން އަންނަތާ ދުވަސްތަކެއް ވެފައިވާއިރު، އެ ހޮސްޕިޓަލަށް މި މަސައްކަތް ނުފެށި ދިގުލައިގެން ގޮސްފައިވަނީ ގާނޫނީ ގޮތުން އެކަން ކުރުމުގެ ހުއްދަ ނުލިބޭތީ އެވެ.
ކިގްނީ ޓްރާންސްޕްލާންޓު ޓްރީޓޮޕްގައި ކުރުމަށް ހަމަޖެހިފައި ވަނީ ވިޒިޓިން ޔޫރޮލޮޖިސްޓުންނާއި، ޓްރީޓޮޕްގެ މެޑިކަލް ޑިރެކްޓާ ޓްރާންސްޕްލާންޓް ނެފްރޮލޮޖިސްޓް ޑރ. މްލަޑެން ކްނޮޓެކް އަދި ޑރ. ޖަޔާ ނަތުގެ އިތުރުން އައިސީޔޫގެ ޑޮކްޓަރުންގެ އެހީތެރިކަމާއެކުގަ އެވެ.
މި ހިދުމަތް ދިނުމަކީ ފަސޭހަކަމެއް ނޫންކަން ފާހަގަކުރައްވާ ޑރ. މްލަޑެން "އަދަދު" އަށް ވިދާލުވީ ކިޑްނީ ޓްރާންސްޕްލާންޓް ހެދުމަށްފަހު ވެސް، ޕޭޝަންޓުން ގިނަ ދުވަސް ވަންދެން ބަލަހައްޓަން ޖެހޭ ކަމަށެވެ.
"މިކަމަށް ބޭނުންވާ ގިނަ ބޭސްތައް ރާއްޖެއިން އަބަދު ލިބެން ނުހުރޭ. މިގޮތުން ހިދުމަތް ފަށާއިރު ހުރިހާ ބޭސްތަކެއް ހޮސްޕިޓަލުން އަބަދުވެސް ލިބެން ހުރުމަކީ ވަރަށް މުހިންމުކަމެއް،" ޑރ. މްލަޑެން ބުންޏެވެ.
ޓްރާންސްޕްލާންޓެއް ހަދާއިރު ރެގިއުލޭޓްކުރަން ޖެހެނީ އެކަން ކުރަނީ އުސޫލެއްގެ ތެރެއިން ދެފުށް ފެންނަ ގޮތަށް ކުރުމަށް ކަމަށާއި، ރެގިއުލޭޓްކުރުމުން ގުނަވަންތައް ވިއްކުން ހުއްޓުވިގެންދާނެ ކަމަށް އޭނާ ވިދާޅުވި އެވެ.
ނަމަވެސް ޑރ. މްލަޑެން ވިދާޅުވީ ރެގިއުލޭޓްކުރާއިރު ހުޅަނގުގެ ގައުމުތަކާ އެއްގޮތަށް މަރުވެފައި ތިބޭ މީހުންގެ އަދި ދިރިތިބި މީހުންނަށް ގުނަވަން ހަދިޔާކުރުމުގެ ފުރުސަތު އޮތުން މުހިންމު ކަމަށެވެ.
ޑރ. މްލަޑެން އަންދާޒާ ކުރައްވާ ގޮތުގައި ރާއްޖޭގައި ކޮންމެ އަހަރަކު 50 ވަރަކަށް މީހުން ކިޑްނީ ޓްރާންސްޕްލާންޓް ހަދަން ޖެހޭއިރު، ކޮންމެ މަހަކު ވެސް ކިޑްނީ ބަލީގައި ގިނަ ބަޔަކު ޓްރީޓޮޕަށް ދައްކަން އާދެ އެވެ.
އާއިލާގައި ކިޑްނީ ބައްޔަށް ބޭސްކުރާ މީހުން ތިބޭނަމަ، ޓެސްޓު ހެދުމަކީ މުހިންމު ކަމެއް ކަމަށާއި، ކިޑްނީ ބަލީގެ އަލާމާތްތައް ފެންނަން ފަށަނީ ބަލި ޖެހޭތާ އަހަރުތަކެއް ފަހުން ކަމަށެވެ.
"ކިޑްނީ ބަލީގެ އަލާމާތްތައް ފެންނަން ފަށާފަހުން އެނގިއްޖެނަމަ ބައެއް ފަހަރު މާ ބޮޑަށް ލަސްވޭ. އެހެންވީމަ ބްލަޑް ޕްރެޝާ މަތި މީހުންނާއި، އާއިލާގައި ޑައިބިޓީސް ހުންނަ މީހުން އަދި ޑައިބިޓީސް ހުންނަ މީހުން، އާއިލާގައި ކިޑްނީ ބައްޔަށް ފަރުވާ ހޯދާ މީހުން ތިބޭނަމަ، އާއިލާގައި ކިޑްނީ ސްޓޯން ހުންނަ މީހުން ތިބޭނަމަ އަދި ޔޫރިން މައްސަލަ ދިމާވާނަމަ އަހަރަކު އެއްފަހަރު ޓެސްޓު ކުރުން މުހިންމު،" ޑރ. މްލަޑެން ވިދާޅުވި އެވެ.
ޓްރާންސްޕްލާންޓަށް ނަގާނެ އަގެއް ޓްރީޓޮޕުން މިހާތަނަށް ނިންމާފައި ނުވާއިރު، ޑރ. މްލަޑެން ވިދާޅުވީ މި ޕްރޮސީޖާއަކީ އަގުބޮޑު ޕްރޮސީޖާއެއް ކަމުން، އެކަމަށް އާސަންދަ ނުވަތަ އެންސްޕާ މެދުވެރިކޮށް ކުރެވޭނެ މަގު ދިވެހިންނަށް އޮތުމަކީ ލިބޭނެ ވަރަށް ބޮޑު ލުޔެއް ކަމަށެވެ.
ނަމަވެސް އޭނާ ވިދާޅުވީ ޓްރީޓޮޕުން މިކަމަށް ނަގާ އަގު ވެގެންދާނީ ބޭރު ގައުމުތަކުގައި ތިބެގެން މިކަމަށް ހިނގާނެ ހޭދައަށްވުރެ ބޮޑުތަނުން އަގުހެޔޮ ވެގެންދާނެ ކަމަކަށް ކަމަށާއި، އަމިއްލަ ގައުމުގައި މިކަން ކުރެވޭނަމަ ހިނގާނެ ހޭދަވެސް ކުޑަވާނެ ކަމަށެވެ.
