ލަންޑަން (މެއި 26) - ދުނިޔޭގެ އެންމެ އަގުބޮޑު ފުޓްބޯޅަ މެޗު ކަމަށްވާ، އިނގިރޭސި ޗެމްޕިއަންޝިޕް (ދެ ވަނަ ޑިވިޝަން) ގެ ޕްލޭއޮފް މެޗުން މިރޭ ލީޑްސް ޔުނައިޓެޑް އަތުން 1-0 އިން މޮޅުވެ، ސައުތެމްޓަނުން، އިނގިރޭސި ޕްރިމިއާ ލީގަށް ޕްރޮމޯޓްވެއްޖެ އެވެ.
ޗެމްޕިއަންޝިޕްގެ ޗެމްޕިއަން، ލެސްޓާ ސިޓީ އާއި ރަނަރަޕް، އިސްޕްވިޗް ޓައުން އަށް ވަނީ އޮޓޮމެޓިކުން ޕްރިމިއާ ލީގުގެ ފުރުސަތު ލިބިފަ އެވެ. ތިން ވަނަ އިން ފެށިގެން ހަ ވަނައާ ދެމެދުގެ ހަތަރު ޓީމު ޖެހެނީ، ޕްލޭއޮފް ބުރެއް ކުޅޭށެވެ. ލީޑްސް ފައިނަލަށް އައީ ނޮރިޗް ސިޓީ ކަޓުވާލައިފަ އެެވެ. އަދި ސައުތެމްޓަން ފައިނަލަށް ދަތުރުކުރީ ވެސްޓް ބްރޮމްވިޗް އަލްބިއަން ކަޓުވާލައިފަ އެވެ.
ވެމްބްލީ ސްޓޭޑިއަމްގައި ކުޅުނު މިރޭގެ މެޗުގައި ފެނިގެންދިޔަ ހަމައެކަނި ގޯލު މެޗުގެ، 24 ވަނަ މިނިޓްގައި ޖެހީ އެޑަމް އާމްސްޓްރޯންގް އެވެ.
ޕްލޭއޮފް ފައިނަލުން މޮޅުވެ، ސައުތެމްޓަން ކުޅުންތެރިން ތަށްޓާ އެކު އުފާފާޅުކުރަނީ.
މިދިޔަ ސީޒަނުގައި، ސައުތެމްޓަން، ޕްރިމިއާ ލީގުން ރެލިގޭޓްވީ، 11 ސީޒަނަށް ފަހު އެވެ. އެ ޓީމު މި ވަނީ، ދެ ވަނަ ޑިިވިޝަނުގައި ވާދަކުރަން ފެށި ފަހުން، އެއްބުރުން އަލުން ޕްރިމިއާ ލީގަށް އެނބުރި އަތުވެފަ އެވެ.
މި މެޗު އެންމެ އަގުބޮޑު މެޗުގެ ގޮތުގައި މަޝްހޫރުވެފައިވާއިރު، މި ފަހަރު މޮޅުވި، ސައުތެމްޓަން އަށް 178 މިލިއަން ޑޮލަރު (140 މިލިއަން ޕައުންޑް) ލިބެ އެވެ. މިދިޔަ އަހަރުގެ ޕްލޭއޮފް މެޗުން މޮޅުވި، ނޮޓިންހަމް ފޮރެސްޓަށް 215 މިލިއަން ޑޮލަރު ލިބުނެވެ.
އޭގެ ކުރިން ފަހަރު މޮޅުވި، ބްރެންޓްފޯޑަށް ލިބުނީ، 178 މިލިއަން ޑޮލަރެވެ.
ޓީވީ ރައިޓްސް، ފައިސާގެ އިނާމްގެ އިތުރުން ޕްރިމިއާ ލީގު ބޯނަސް، ކޮމާޝަލް ބޯނަސްގެ އިތުރުން ބެޓިން ފައިސާގެ ހިމަނައިގެން ބަލާނަމަ، ޕްލޭއޮފް ފައިނަލާ އާމްދަނީގެ ގޮތުން ގާތްކުރެވޭ ވަރުގެ އެހެން ފުޓްބޯޅަ މެޗެއް ނެތެވެ.
ޗެމްޕިއަންސް ލީގު ޗެމްޕިއަންކަން ހޯދައިގެން ވެސް އެންމެ ގިނަވެގެން ހޯދެނީ 90-100 މިލިއަން ޑޮލަރެވެ. އަދި ފީފާ ވޯލްޑް ކަޕް ޗެމްޕިއަން ޓީމަށް ލިބެނީ 38-45 މިލިއަން ޑޮލަރެވެ.
