ޑާކްރެއިން އެންޓަޓެއިންމަންޓްގެ ފަރާތުން މި އަހަރު އޮލިމްޕަސް ސްކްރީނުގައި އަޅުވައިގެން ބޮޑު ތަރުހީބެއް ލިބުނު ފިލްމު "ފުރޭތަ" މީޑިއާނެޓުގެ ވީޑިއޯ ކްލަބުގައި އެޅުވުމަށް ތައްޔާރުވެއްޖެ އެވެ.
ސިނަމާގައި ހޯދި ކާމިޔާބީއަށް ފަހު ވީޑިއޯ ކްލަބް މެދުވެރިކޮށް މި ފިލްމު ރިލީޒް ކުރުމަށް ހަމަޖެހިފައި ވަނީ މެއި 29، ގަ އެވެ.
ވީޑިއޯކްލަބުން ބުނީ ފުރޭތަ ފިލްމު ވެސް އެ ޕްލެޓްފޯމް މެދުވެރިކޮށް ޓީވީ އަދި މޯބައިލް ސްކްރީނުތަކުން ބަލާލެވޭނެ ކަމަށާއި ރާއްޖެއިން ބޭރުގައި ދިރިއުޅޭ ފަރާތްތަކަށް ވެސް އެމްއެސް ލައިޓް ގްލޯބަލް މެދުވެރިކޮށް ޓީވީއިން އަދި އެމްއެސް ޑިޖިޓަލް ގްލޯބަލް މެދުވެރިކޮށް މޯބައިލް ސްކްރީންތަކުން ބަލާލެވޭނެ ކަމަށެވެ.
އަލީ ޝިފާއު (ޗިއްޕެ) ޑައިރެކްޓްކޮށްފައިވާ ރިވެންޖް އެކްޝަން ތްރިލާ ޖޯންރާގެ މި ފިލްމުގައި އަހުމަދު ތޮލާލްގެ ސްކްރީންޕްލޭ އާއި ޑައިލޮގްތައް ފެނިގެންދެ އެވެ.
މި ފިލްމުގައި ދައްކުވައި ދެނީ ރާއްޖޭގެ މިހާރުގެ ހާލަތެވެ. ކުށުގެ ވެށި އޮތް ގޮތުގެ ސަބަބުން ކުށްތައް ހުއްޓުވަން ފުލުހުން ކުރާ މަސައްކަތެވެ. އެ މަސައްކަތަށް އެހީތެރިވެދީފި އާންމުންގެ މީހަކަށް ގޭންގުތަކުން ކުރިމަތި ކުރުވާ އިންޒާރުތަކާއި ބިރު ދެއްކުންތަކާއި ގަތުލުތަކެވެ. އިންސާފަށް އެދި ކުރަން ޖެހިފައި އޮތް އުނދަގޫ ދަތުރެވެ. އެންމެ ފަހުން ބަދަލު ހިފަން މަޖުބޫރުވެ ކުރެވޭ މަސައްކަތެވެ.
ފިލްމުގެ އެންމެ އިސްރޯލުން ފެނިގެންދަނީ ދިވެހި ފިލްމީ ދާއިރާގައި މިހާރު އެންމެ ފިޔަޖަހަމުން އަންނަ ތަރި ކަމުގައިވާ ޝަރަފް އެވެ. އަދި ރަވީ ފާރޫގުގެ އިތުރުން މުހައްމަދު މަނިކު، އަހްމަދު ސައީދު، އާދަމް ރިޒްވީ، އައިމިނަތް އަސީލާ، ސޫޒަން އަދި ކުޑަކުއްޖެއްގެ ރޯލު އަދާކުރި އަހްމަދު ނީލްގެ އެކްޓިންގް ވެސް ފިލްމުން ފެނިގެންދެ އެވެ.
އެންމެ ފަހުގެ މޮޅެތި އަމިއްލަ އުފެއްދުންތައް ދިވެހިންނާއި ހަމައަށް ގެނެސްދެމުންދާ ވީޑިއޯ ކްލަބުން ވަނީ ލޯބީގެ ފިލްމު "ނޮވެމްބަރު"، ތްރިލާ ފިލްމު "ނީނާ"، ބިރުވެރި ފިލްމު "ކަޅަކި" އަދި ސައިކޮލޮޖިކަލް ތްރިލާ "ބަވަތި" މި އަހަރު ތެރޭގައި ބެލުންތެރިންނާއި ހަމައަށް ގެނެސްދީފަ އެވެ.
