ލަންޑަން (މެއި 25) - އެންމެ ފަހުގެ ޗެމްޕިއަން، މެންޗެސްޓާ ސިޓީ 2-1 އިން ބަލިކޮށް، މެންޗެސްޓާ ޔުނައިޓެޑުން އިނގިރޭސި އެފްއޭ ކަޕްގެ ޗެމްޕިއަންކަން 13 ވަނަ ފަހަރަށް ހޯދައިފި އެވެ.
މި މުބާރާތުގެ ޗެމްޕިއަންކަން އެންމެ ގިނަ ފަހަރު ހޯދުމުގެ ރެކޯޑް އޮތީ 14 ތަށި އުފުލާލައިފައިވާ އާސެނަލް އެވެ. ޔުނައިޓެޑުން މި ފަހަރު މި މުބާރާތް މި ކާމިޔާބުކުރީ އަށް އަހަރަށް ފަހު އެވެ.
ވެމްބްލީ ސްޓޭޑިއަމްގައި މިރޭ ކުޅުނު ފައިނަލް ފަށައިގެން ޔުނައިޓެޑުން ކައުންޓަ އެޓޭކުގައި ސިޓީ އަށް ނުރައްކާ ކުރަމުންދިޔަ އެވެ. މެޗުގެ 30 ވަަނަ މިނިޓްގައި، ޔުނައިޓެޑަށް ލީޑުނަގައިދިނީ އަލެހަންދްރޯ ގާނާޗޯ އެވެ. މިއީ، ސިޓީ ޑިފެންސް ފަހަތަށް ކުޅުނު ބޯޅައެއްގައި އެ ޓީމުގެ ޑިފެންޑަރު ޖޮސްކޯ ގްވާޑިއޯލް އާއި ކީޕަރު ސްޓެފެން އޯޓެގާ ހެދި ގޯހެއްގެ ފައިދާނަގައި، ގާނާޗޯ ޖެހި ގޯލެކެވެ.
އޭގެ އިރުކޮޅެއް ފަހުން، ކައުންޓަ އެޓޭކުގައި ގާނާޗޯ ދިން ބޯޅައަކުން، މާކަޝް ރަޝްފޯޑް ގޯލެއް ޖެހި ނަމަވެސް، އެ ގޯލު ބަލައިނުގަތެވެ. އެއީ، އެޓޭކް ފެށިއިރު، ގާނާޗޯ އޮފްސައިޑްގައި ހުރުމުންނެވެ. އެހެން ނަމަވެސް، ޔުނައިޓެޑުން ފުރަަތަމަ ހާފު ނިންމާލީ ދެ ގޯލުގެ ލީޑެއްގަ އެވެ.
މެޗުގެ 39 ވަނަ މިނިޓްގައި، ކަައުންޓަ އެޓޭކަކުން، ޔުނައިޓެޑްގެ ކެޕްޓަން ބްރޫނޯ ފެނާންޑޭސް ދިން ބޯޅައަކުން، އޭރިއާތެރޭގައި ހުސްކޮށް ހުރެފައި، ޔުނައިޓެޑްގެ ދެ ވަނަ ލަނޑު ޖެހީ 18 އަހަރުގެ މިޑްފީލްޑަރު ކޯބީ މައިނޫ އެވެ.
ދެ ވަނަ ހާފު ފަށައިގެން ސިޓީން ބަދަލުތަކެއް ގެނެސް ގޯލެއް ޖެހޭތޯ މަސައްކަތްކުރި އެވެ. އެ ގޮތުން، އެ ޓީމުން ކުރި އެއް ބަދަލަކީ، ކެވިން ޑި ބްރޭނާ ބަދަލުކުރުމެވެ. ސިޓީން ބަދަލަކަށް އެރި، ހޫލިއަން އަލްވަރޭޒަށް ހުސްކޮށް ލިބުނު ފުރުސަތުގައި ގޯލަށް ބޯޅަ ފޮނުވާނުލެވުނުއިރު، އޭރިއާބޭރުން ސިޓީގެ ކެޕްޓަން، ކައިލް ވޯކާ ޖެހި ދެ ބޯޅަ ވެސް ޔުނައިޓެޑްގެ ކީޕަރު އަންދްރޭ އޮނާނާ މަތަކުރި އެވެ.
ސިޓީން ލަނޑެއް ޖަހަން ކުރި މަސައްކަތް ކާމިޔާބުވީ މެޗުގެ 87 ވަނަ މިނިޓްގަ އެވެ. ދެ ވަނަ ހާފުގައި ބަދަލަކަށް ކުޅެން އެރި ޖެރެމީ ޑޮކޫ، ކައިރީ ކަނަށް ފޮނުވާލި ބޯޅަ ގޯލަށް ވަނީ ކީޕަރު އޮނާނާ އަތުގައި ޖެހިފަ އެވެ.
އިތުރު ލަނޑެއް ޖަހައި، އެއްވަރުކުރަން ސިޓީން ކުރި މަސައްކަތް ކާމިޔާބެއްނުވި އެވެ. ސިޓީން މި ފަހަރު ލީގު ކާމިޔާބުކުރިއިރު، ތަފާތު ދެއްކި ފިލް ފޯޑެން އާއި އާލިން ބްރައުޓް ހާލަންޑަށް ފައިނަލްގައި ރަނގަޅު ކުޅުމެއް ނުދެއްކި، އެ ޓީމު ބަލިވީ އެވެ.
ޔުނައިޓެޑްގެ ކޯޗުކަމުން އެރިކް ޓެން ހާގް މި މެޗަށް ފަހު ވަކިކުރާނެ ކަމަށް އިނގިރޭސި މީޑިއާ ރިޕޯޓްތައް ބުނެ އެވެ. އެންމެ ފަހުން ޔުނައިޓެޑުން އެފްއޭ ކަޕް ކާމިޔާބުކުރި 2016 ވަަނަ އަހަރު، އެ ސީޒަނުގައި އެ ޓީމުގެ ކޯޗަކަށް ހުރި ލުއީ ވެން ހާލް ވެސް ވަކިކުރި އެވެ.
