ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގެ ބޯޑުންނާއި ޗެއާމަން ކަމުން އަހުމަދު ޒުހޫރު ވަކިކުރީ މެނޭޖުމެންޓުން ބޭނުންވާ ބައެއް ކަންކަން ބޯޑުގައި އެޖެންޑާ ކުރަން ދެކޮޅު ހަދާތީ ކަމަށް އިތުބާރު ކުރެވޭ މަސްދަރުތަކުން ބުނެފި އެވެ.
ޒުހޫރު މަގާމުން ވަކިކުރި ސަބަބެއް ޕްރައިވެޓައިޒޭޝަން އެންޑް ކޯޕަރައިޓޭޝަން ބޯޑު (ޕީސީބީ) އިން ހާމައެއް ނުކުރެ އެވެ. ސުވާލު ކުރުމުން ވެސް އެ އޮފީހުން ޖަވާބެއް ނުދިނެވެ.
މި ނޫހަށް މައުލޫމާތު ދިން އޮފިޝަލުން ވިދާޅުވި ގޮތުގައި ޒުހޫރާއި ކުންފުނީގެ މެނޭޖިން ޑިރެކްޓަރު ފަޒުލް ރަޝީދުއާ ދެމެދު ފުރަތަމަ ދުވަހުން ފެށިގެން ވެސް މައްސަލަ ޖެހެން ފެށި އެވެ. ޒުހޫރު މަގާމުން ވަކިކުރުމުގެ މައިގަނޑު ސަބަބަކީ ފަޒުލް ހުށަހަޅާ ބައެއް ކަންކަން ބޯޑުގައި އެޖެންޑާ ނުކުރުން ކަމަށް އެ ބޭފުޅުން ވިދާޅުވި އެވެ.
އެޖެންޑާ ކުރަން ޒުހޫރު ދެކޮޅު ހަދާފައި ވަނީ މެނޭޖިން ޑިރެކްޓަރު ފަޒުލްގެ މަސްލަހަތު ފުށުއަރާ ބައެއް ކަންކަމުގެ އިތުރު ތަފްސީލު ހުށަނާޅާ ކަންކަން ކަމަށް "އަދަދު" ނޫހާ ވާހަކަ ދެއްކި ބައެއް ބޭފުޅުން ވިދާޅުވި އެވެ.
"އެމްޑީ އާއި ޗެއާމަންއާ ދެމެދު ކޮންމެ ދުވަހަކު ވެސް އެ ކަހަލަ ކޮންމެވެސް ކަމެއްގައި ފުށު އަރާނެ. ބޮޑަށް ފުށު އަރަނީ އެމްޑީގެ އަމިއްލަ މަސްލަހަތު ހުރި ކަންކަމުގައި ބޯޑުގެ ތެރެއިން ކުރަން އުޅޭ އުޅުމުގައި. ޗެއާމަންއަށް ނޫނެކޭތާ ބުނެވޭނީ،" އޮފިޝަލަކު ބުންޏެވެ.
އިއްޔެ މައްސަލަ ހޫނުވީ، އެހެން އޮފިޝަލަކު ވިދާޅުވި ގޮތުގައި ހުޅުމާލޭން ބިމެއް ވިއްކައިލުމާ ގުޅޭ ކަންކަން އެޖެންޑާ ނުކުރުމުންނެވެ. އެ މުއާމަލާތުގެ އެއްވެސް މައުލޫމާތެއް ހިއްސާ ނުކޮށް އެކަން ފާސްކުރަން ބޯޑަށް ގެނައުމުން ޒުހޫރު އިއްޔެ އެޖެންޑާ ނުކުރި ކަމަށްވެ އެވެ.
"އެގޮތަށް ހުރިކަންކަން ހަމަ އިއްޔެގެ ބޯޑު ބައްދަލުވުމުގައި ވެސް ހުރި. ހުރީމަ ޗެއާމަން އެޖެންޑާކުރަން އެއްބަހެއް ނުވި. އެހެންވެ، އެމްޑީ ކޯފާ އިސްކުރައްވައިގެން ސިޔާސީ ގޮތުން ކުރެއްވި ކަމަކަށް ބެލެވެނީ [ޒުހޫރު ވަކިކުރުމަކީ]،" އަދަދު ނޫހާ ވާހަކަ ދެއްކި އޮފިޝަލަކު ވިދާޅުވި އެވެ.
"އެމްޑީ ބޭނުންވާ ކަމެއް ބޯޑުގެ އަތް އަނބުރާލާފައި ވެސް ކުރަން ވިސްނުން ހުރީ."
މި ކަންކަމާ ގުޅޭ ގޮތުން ޒުހޫރުގެ ބަހެއް ނޫހުގައި ޖެހުމަށް ބޭނުމެއް ނުވެ އެވެ. ނަމަވެސް އޭނާ ވިދާޅުވީ ކަންކަން ރަނގަޅު ކުރުމަށް ވަރަށް ބޮޑަށް މަސައްކަތް ކުރެއްވި ކަމަށެވެ.
"އަޅުގަނޑު މަސައްކަތް ކުރީ ވަރަށް އިހުލާސްތެރި ކަމާއެކީގައި އެޗްޑީސީގެ އެންމެހާ ގަވާނެންސް ކަންކަން ހަރުދަނާކުރުމަށް،" ޔާމީންގެ ވެރިކަމުގައި މިނިސްޓަރުކަމުގެ އިތުރުން ސަރުކާރުގެ ބައެއް ކުންފުނިތައް ހިންގެވި ޒުހޫރު ވިދާޅުވި އެވެ.
މިކަމުގައި އެޗްޑީސީ އަދި އެ ކުންފުނީގެ މެނޭޖިން ޑިރެކްޓަރު ފަޒުލްގެ ބަހެއް ލިބޭ ގޮތް ވަނީ ނުވެފަ އެވެ.
މި ހަފްތާގެ ތެރޭގައި ސަރުކާރުގެ އިދާރާތަކާއި ކުންފުނިތަކުގެ މަގާމުތަކަށް ގިނަ ބަދަލުތަކެއް ވަނީ ގެންނަން ފަށާފަ އެވެ. އެގޮތުން, ބައެއް މީހުން މަގާމުތަކުން ވަކިކުރުމާއި ބައެއް ފަރާތްތަކުގެ މަގާމުތައް ދަނީ ބަދަލުކުރަމުންނެވެ.
ޒުހޫރަކީ މިނިސްޓަރުކަމާއި ކަސްޓަމްސްގެ ކޮމިޝަނާ ޖެނެރަލް ކަމުގެ އިތުރުން ސްޓެލްކޯގެ މެނޭޖިން ޑިރެކްޓަރުކަން ކުރައްވާފައިވާ ބޭފުޅެކެވެ. އޭނާއަކީ ޕީޕީއެމްގެ ކުރީ ސަރުކާރުގައި ވެސް ގިނަ މަގާމުތަކެއް ފުރުއްވި ބޭފުޅެކެވެ.
