ބޭންކް އޮފް މޯލްޑިވްސް (ބީއެމްއެލް)ގެ ޑިރެކްޓަރުން ބޯޑުގެ ޗެއާޕާސަންގެ މަގާމުގައި ހުންނެވި ހަސަން ޒަރީރު އެ މަގާމުން އިސްތިއުފާދެއްވައިފި އެވެ.
ބީއެމްއެލްގެ ޑިރެކްޓަރުން ބޯޑުގެ ޒަރީރު ޗެއާޕާސަންގެ މަގާމަށް އައްޔަންކޮށްފައި ވަނީ މިދިޔަ މާޗް 25، ގަ އެވެ.
އެ މަގާމުން ޒަރީރު އިސްތިއުފާދިންއިރު، ހުސްވެފައިވާ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އޭނާ އައްޔަނު ކުރުމަށް ރައްޔިތުންގެ މަޖިލީހުން ވަނީ މެއި 13، ގައި ރުހުން ދީފަ އެވެ.
ޓެކްސް ނެގުމާބެހޭ އިދާރީ ގާނޫނުގައި ބަޔާންކޮށްފައިވާ ޓެކްސް ކޮމިޝަނަރުގެ ޝަރުތުތަކުގެ ތެރޭގައި ސަރުކާރު ނުވަތަ އެހެން ކުންފުންޏެއްގައި ޑިރެކްޓަރުންގެ ބޯޑުގައި ހިމެނޭ މީހަކު ކަމުގައި ނުވުން ހިމެނެ އެވެ.
ބީއެމްއެލްގެ ހިންގާ ގަވައިދުގައިވާ ގޮތުން ބޭންކުގެ ބޯޑު އެކުލެވިގެން ވަނީ ސަރުކާރުން އައްޔަންކުރާ އަށް މެންބަރުންނާއި އާންމު ހިއްސާދާރުންގެ ފަރާތުން ހޮވާ ތިން މެންބަރުންނާ އެކު ޖުމްލަ 11 މެންބަރުންގެ މައްޗަށެވެ.
ސަރުކާރުން އައްޔަން ކުރައްވާ ދެ މެންބަރުންގެ މަގާމު ހުސްވުމާއި ގުޅިގެން ބީއެމްއެލްގެ ބޯޑުގައި މިހާރު ތިބީ ނުވަ ޑައިރެކްޓަރުނެވެ. ހުސްވެފައިވާ މަގާމުތަކަށް މެންބަރުން އައްޔަންކުރުމަށް އަންނަ ޖުލައި މަހު ތެރޭގައި ހާއްސަގޮތުން ކުރާ އާންމު ޖަލްސާއެއް ބާއްވާނެކަމަށް ބީއެމްއެލްއިން ބުނެ އެވެ.
އެ ބޭންކުންވަނީ ބީއެމްއެލްގައި ޒަރީރު ދެއްކެވި ހަރުދަނާ ލީޑާޝިޕަށާއި ދެއްވި އަގުހުރި ލަފަޔާއި އިރުޝާދަށް ޝުކުރު ދަންނަވައި، ކާމިޔާބަށް އެދިފަ އެވެ.
ޒަރީރަކީ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމު ކުރިން އަދާ ކުރައްވާފައިވާ ބޭފުޅެކެވެ. އަދި މޯލްޑިވްސް އިންލޭންޑް ރެވެނިއު އޮތޯރިޓީ އުފެއްދުމުގައި ވެސް އޭނާ އިސް ދައުރެއް އަދާ ކުރެއްވި އެވެ. އޭގެ ކުރިން މަސައްކަތް ކުރެއްވީ ފައިނޭންސް މިނިސްޓްރީގަ އެވެ.
އޭނާއަކީ މާސްޓާސް އޮފް ސައިންސް، ފައިނޭންސް ހާސިލްކޮށްފައިވާ ބޭފުޅެވެ. އޭގެ އިތުރުން އެކައުންޓިން އިން ޑިގްރީއެއް ވެސް ހާސިލް ކުރެއްވި އެވެ.
