ރާއްޖޭގެ ފަރާތުން އދ. އަށް ކަނޑައަޅާފައި ހުންނަ ދާއިމީ މަންދޫބުގެ މަގާމަށް މި ސަރުކާރުން އައްޔަން ކުރި ޑރ. އަލީ ނަސީރު މުހައްމަދު އޭނާގެ ސަފީރުކަމުގެ ފަތްކޮޅު އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒް އަށް އަރުވައިފި އެވެ.
ފޮރިން މިނިސްޓްރީގެ ބުނި ގޮތުގައި ސަފީރު އަލީ ނަސީރު ފަތްކޮޅު އެރުވުމަށް ބޭއްވި ބައްދަލުވުމުގައި، ރައީސް ޑރ. މުހައްމަދު މުއިއްޒުގެ ހެޔޮއެދުންތައް ސެކެޓްރީ ޖެނެރަލް ގުޓެރޭޒް އަށް ރައްދުކުރެއްވި އެވެ.
ކުރިއަށް އޮތް ތަނުގައިވެސް ރާއްޖެއިން އދ. އާ އެކު އޮތް ގުޅުން އިތުރަށް ބަދަހިކޮށް މަސައްކަތަކުގައި އެއްބާރުލުން ދޭނެ ކަމުގެ ޔަގީންކަންވެސް ސަފީރު, ގުޓިރޭޒް އަށް ދެއްވި ކަމަށް ހާރިޖީ ވުޒާރާއިން ބުންޏެވެ.
އަދ. އަށް މި ސަރުކާރުން ކަނޑައެޅި ސަފީރު، އަލީ ނަސީރަކީ ހާރިޖީ ދާއިރާގައި ތަޖުރިބާކާރު ބޭފުޅެކެވެ. އޭނާ ވަނީ ފޮރިން ސެކްރެޓަރީ ކަމާއި އެމެރިކާއަށް ކަނޑައަޅާފައި ހުންނަވާ ސަފީރު ކަމާއި އދ. ގެ ދާއިމީ މަންދޫބުކަން މީގެކުރިން ވެސް ކުރައްވާފަ އެވެ.
އިންޓަނޭޝަނަލް ރިލޭޝަންސް ދާއިރާއިން ޕީއެޗްޑީ ހާސިލްކުރައްވާފައިވާ އަލީ ނަސީރަކީ މެއި، 1985، އިން ފެށިގެން ފޮރިން މިނިސްޓްރީގެ އެކި މަގާމުތައް އަދާކުރައްވާފައިވާ ބޭފުޅެކެވެ. އެގޮތުން 2013 ގައި ކުރީގެ ރައީސް އަބްދުﷲ ޔާމީނުގެ ވެރިކަމުގައި އަލީ ނަސީރު ވަނީ އެ މިނިސްޓްރީގެ ފޮރިން މިނިސްޓްރީގެ މަގާމަށް އައްޔަންކުރައްވާފަ އެވެ.
އެއަށްފަހު 2017 އިން 2019 އަށް އަލީ ނަސީރު ހުންނެވީ ރާއްޖެއިން އދ. އަށް ކަނޑައަޅުއްވާފައި ހުންނަވާ ދާއިމީ މަންދޫބު އަދި ރާއްޖެއިން އެމެރިކާއަށް އަދި ކެނެޑާއަށް ކަނޑައަޅުއްވާފައި ހުންނަވާ ސަފީރުގެ މަގާމުގަ އެވެ.
އަދި، 2019 އިން ފެށިގެން ސެޕްޓެމްބަރު، 2022، ގައި މަގާމު ދޫކޮށްލަންދެން އޭނާ ހުންނެވީ ފޮރިން މިނިސްޓްރީގެ މަލްޓިލެޓަރަލް ސެކްރެޓަރީގެ މަގާމުގަ އެވެ.
