ކޯޓުގައި ހިނގާ މައްސަލަތަކުގެ ސަބަބުން، ޕާސްޕޯޓު ހިފަހައްޓާފައި އޮތުމުން، ރާއްޖޭން ބޭރަށް ދަތުރުނުކުރެވޭތީ، ހަވާލުވެފައި ހުރި މަގާމުތަކުގެ ޒިންމާ އަދާކުރުމަށް ދަތިވާ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް ވިދާޅުވެއްޖެ އެވެ.
ބައްސާމް މި ގޮތަށް ވިދާޅުވީ، މިއަދު ކްރިމިނަލް ކޯޓުގައި ކުރިއަށްދިޔަ ޝަރީއަތުގައި ވާހަކަ ދައްކަވަމުންނެވެ. ހިޔާނާތާއި މަނީ ލޯންޑަރިން މައްސަލައިގައި ބައްސާމްގެ ޕާސްޕޯޓް ހިފަހައްޓާފައިވަނީ ޑިސެމްބަރު މަހު ފަސް ވަނަ ދުވަހު އެވެ.
ކުރިން އޮތް ގޮތުން، އަންނަ މަހު ފަސް ވަނަ ދުވަހު ބައްސާމްގެ ޕާސްޕޯޓް ހިފެހެއްޓި މުއްދަތު ހަމަވާނެ އެވެ. އެކަމަކު، މިއަދު ބައްސާމް ފިލައިގެން ގޮސްފާނެ ކަމުގެ ބިރު އޮތުމާ އެކު، ދައުލަތުން އެދިގެން ކޯޓުން ނިންމީ މައްސަލަ ނިމެންދެން ބައްސާމްގެ ޕާސްޕޯޓް ހިފެހެއްޓުމަށެވެ.
ޝަރީއަތުގައި ވާހަކަ ދައްކަވަމުން ބައްސާމް ވިދާޅުވީ، އޭނާ އަކީ އޭއެފްސީގެ މަގާމުތަކެއް ފުރުއްވަމުން އަންނަ ފަރާތެއް ކަމަށާއި، ޕާސްޕޯޓް ހިފަހައްޓާފައި އޮތުމުން ރާއްޖޭން ބޭރަށް ދަތުރުކުރެވެން ނެތުމުން، އެ މަގާމުތަކުގެ ޒިންމާ އަދާކުރުމުގައި ދަތިވާ ކަމަށެވެ.
މިދިޔަ ހަފްތާ ބަންދުގައި ތައިލެންޑްގެ ބެންކޮކްގައި، އޭއެފްސީގެ ކޮންގްރެސް އާއި ފީފާގެ ކޮންގްރެސް ވަނީ ކުރިއަށް ގޮސްފަ އެވެ. މީގެއިން އެއްވެސް ބައްދަލުވުމެއްގައި ބައްސާމަށް ބައިވެރިވެވޭ ގޮތެއްނުވި އެވެ.
މިދިޔަ އަހަރު އޮތް އޭއެފްސީގެ އިންތިހާބުގައި ބައްސާމް ވަނީ، އެ ފެޑެރޭޝަނުގެ އެކްސްކޯ އަށް އިންތިހާބުވެވަޑައިގެންފަ އެވެ. އެއީ، 2023-2027 އަށް އޮތް ދައުރެއްގަ އެވެ. މީގެ އިތުރުން، އޭއެފްސީގެ މެމްބަރު އެސޯސިއޭޝަންތަކުގެ ކޮމިޓީގެ ޑެޕިއުޓީ ޗެއާމަނަކަށް ހުންނެވީ ވެސް ބައްސާމް އެވެ.
މީގެ ތިން މަސް ކުރިން، ގަތަރުގައި އޮތް ފީފާގެ ބައްދަލުވުމަކަށް ދިއުމަށް ވެސް ބައްސާމް ވަނީ ކޯޓުގައި ޕާސްޕޯޓް ދޫކޮށްދިނުމަށް އެދިފަ އެވެ. އެކަމަކު، ކްރިމިނަލް ކޯޓުން ނިންމީ އެ ހުއްދަ ނުދޭށެވެ.
ޕީޖީ އޮފީހުގެ ނިއުސްލެޓާ، "އުންސުރު" ގެ މާޗް މަހުގެ އަދަދުގައި ފާހަގަކޮށްފައިވާ ގޮތުގައި، އެފްއޭއެމް އަށް ބައިނަލްއަގުވާމީ ޖަމިއްޔާތަކުން ލިބުނު 12 މިލިއަން ޑޮލަރު (191 މިިލިއަން ރުފިޔާ)ގެ ބޮޑުބައެއް ބައްސާމް އާއި އޭނާގެ ގާތްފަރާތްތަކުގެ އަމިއްލަ ބޭނުންތަކަށް ބޭނުންކޮށްފައިވާ ކަމަށެވެ.
