ލަންޑަން (މެއި 20) - އާސެނަލް އެނބުރި އަންނާނީ ކުރިއަށް ވުރެ ވަރުގަދަކޮށް ކަމަށާއި އާސެނަލް އިން ލީގު ޗެމްޕިއަންކަންވެސް ހޯދާނެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.
އިނގިރޭސި ޕްރިމިއާ ލީގުގެ ފަހު މެޗުގައި ރޭ އެވަޓަން އަތުން 2-1 އިން އާސެނަލް މޮޅުވި ނަމަވެސް، ލީގުގައި ރޭ ވެސްޓް ހޭމް އަތުން 3-1 އިން މެންޗެސްޓާ ސިޓީ މޮޅުވުމުން، ޖެހިޖެހިގެން ހަތަރު ވަނަ ފަހަރަށް ސިޓީ ވަނީ ޗެމްޕިއަންކަން ހޯދައިފަ އެވެ.
އާސެނަލް ލީގު ނިންމާލީ 89 ޕޮއިންޓާ އެކު ދެ ވަނައިގަ އެވެ. މިދިޔަ ސީޒަންގައި ވެސް އާސެނަލް ލީގު ނިންމާލީ ދެ ވަނައިގަ އެވެ.
މެޗަށް ފަހު އާޓޭޓާ ބުނީ އާސެނަލް އިން މިހާރު ކުރާގޮތަށް މަސައްކަތް ކޮށްފިނަމަ، އެ ޓީމަށް ލީގު ކާމިޔާބުކުރެވޭނެ ކަމަށެވެ. އަދި މި ސީޒަނަށް ފަހު، އާސެނަލް އެނބުރި އަންނާނީ ވަރުގަދަކޮށް ކަމަށެވެ.
"އަހަރަމެން މިކުރާ ގޮތަށް މަސައްކަތްކޮށްފިނަމަ އަހަރަމެންނަށް ލީގު ކާމިޔާބުވާނެ. އަހަންނަށް ނޭނގޭ ސީދާ ކޮން އިރަކު ކަމެއް. އެކަމަކު އާސެނަލް އިން ލީގު ކާމިޔާބުކުރާނެ،" އާޓެޓާ ބުންޏެވެ.
މި އަހަރުން ފެށުނީންސުރެ، ލީގުގައި އާސެނަލް އޮތީ ވަރަށް ރަނގަޅު ފޯމެއްގަ އެވެ. މި އަހަރު ލީގުގައި ކުޅުނު 18 މެޗުގެ ތެރެއިން 16 މެޗުން އާސެނަލް ވަނީ މޮޅުވެފަ އެވެ.
އާޓެޓާ ބުނީ ލީގު ގެއްލުމުގެ އެންމެ ބޮޑު ސަބަބަކަށްވީ މިދިޔަ މަހު އެސްޓަން ވިލާ އަތުން އާސެނަލް ބަލިވި މެޗު ކަމަށެވެ.
"އަމިއްލަ ދަނޑުގައި (ވިލާއާ) ދެކޮޅަށް ކުޅުނު މެޗުގެ ފުރަތަމަ ހާފުގައި ލިބުނު ފުރުސަތުތައް ވައްދާލިނަމަ، އަހަރަމެން އޮންނާނީ 4-0 އިން ކުރީގައި. މުޅިން ހާލަތު ބަދަލުވީސް އެ މެޗުން މޮޅުވިނަމަ،" އާޓެޓާ ބުންޏެވެ.
އާޓެޓާ ބުނީ އާސެނަލް އޮތީ "ރަނގަޅު މަގުގައި" ކަމަށާއި އެ ޓީމުގެ މަސައްކަތުގެ ނަތީޖާ ފެންނާނެ ކަމަށެވެ.
