ލަންޑަން (19 މެއި) - މި ސީޒަންގެ އިނގިރޭސި ޕްރިމިއާ ލީގުގައި ބްރައިޓަން ކުޅޭ ފަހު މެޗަށްފަހު އެ ޓީމުގެ ކޯޗުކަމުން ވަކިވުމަށް ރޮބާޓޯ ޑި ޒާބީ ނިންމައިފި އެވެ.
މި ސީޒަންގެ އިނގިރޭސި ޕްރިމިއާ ލީގުގައި ބްރައިޓަން ކުޅޭ ފަހު މެޗުގައި މިރޭ އަމިއްލަ ދަނޑުގައި ނުކުންނާނީ މެންޗެސްޓާ ޔުނައިޓެޑާ ދެކޮޅަށެވެ.
ބްރައިޓަންގެ ޗެއާމަން ޓޯނީ ބްލޫމް ވިދާޅުވީ އެ ޓީމުގެ ކޯޗުކަމުން ވަކިވުމަށް ޑި ޒާބީ ނިންމީ ކްލަބާ އެކު ކުރެވުނު މަޝްވަރާތަކަށް ފަހު "ދެ ފަރާތުން އެއްބަސްވެގެން" ކަމަށެވެ.
ބްލޫމް ވިދާޅުވީ ޑި ޒާބީގެ އިރުޝާދުގެ ދަށުން ބްރައިޓަން އިން ކާމިޔާބު ދެ ސީޒަން ހޭދަކޮށްފައިވާ ކަމަށެވެ. އަދި އޭނާ މަގާމުން ވަކިވުމާ ގުޅޭގޮތުން ދެ ފަރާތުންވެސް ވިސްނީ ދެ ފަރާތަށް އެންމެ ފައިދާވާނެ ގޮތަށް ކަމަށެވެ.
"މިހާރު ވަކިވީމަ، ދެ ފަރާތަށްވެސް އެބަ ލިބޭ އަންނަ ސީޒަނަަށް ޕްލޭންކޮށް ތައްޔާރުވާނެ ވަގުތު،" ބްލޫމް ވިދާޅުވިއެވެ.
އިޓަލީ އަށް ނިސްބަތްވާ ޑި ޒާބީ، 44، ބްރައިޓަންގެ ކޯޗުކަމާ ހަވާލުވީ 2022 ވަަނަ އަހަރުގެ ސެޕްޓެމްބަރު މަހުގެ ތެރޭގައެވެ.
ބްރައިޓަންގައި ޑި ޒާބީ ހޭދަކުރި ފުރަތަމަ ސީޒަންގެ އެ ޓީމުން ލީގުގެ ހަ ވަނަ ހޯދައި، ޔޫރަޕްގެ މުބާރާތަށް ކޮލިފައިވިއެވެ. މިއީ ބްރައިޓަންގެ ތާރީހުގައި އެ ކްލަބުން ޕްރިމިއާ ލީގުގައި ހޯދި އެންމެ ރަނގަޅު ނަތީޖާއެވެ.
މި ސީޒަންގެ ކުރީކޮޅު ޔޫރަޕްގެ ބޮޑެތި ކްލަބުތަކުން ޑި ޒާބީ އަށް ޝައުގުވެރިވި އެވެ. މި ސީޒަންގެ ޕްރިމިއާ ލީގު ބްރައިޓަން ނިންމާލާނީ 10 ވަނައިގަ އެވެ.
