ލަންޑަން (މެއި 16) - މެންޗެސްޓާ ޔުނައިޓެޑް ދޫކޮށްލަން ބޭނުންނުވާ ކަމަށާއި އެކަމަކު އެ ކްލަބުން އޭނާ ބޭނުންނުވާނަމަ އެހެން ކްލަބަކަށް ބަދަލުވާނެ ކަމަށް އެ ޓީމުގެ ކެޕްޓަން ބްރޫނޯ ފެނާންޑޭސް ބުނެފި އެވެ.
ރިޕޯޓްތަކުން ބުނާގޮތުގައި ޔުނައިޓެޑްގެ އާ މެނޭޖްމަންޓްގެ ވިސްނުމަކީ ކުރިއަށް އޮތް ޓްރާންސްފާ ބާޒާރުގައި ގިނަ ތަރިންތަކެއް ވިއްކާލައި، އާ ކުޅުންތެރިން ހޯދުމަށް ފަންޑް ހޯދުމެވެ. އޭގެ ތެރޭގައި ފެނާންޑޭސް ވެސް ހިމެނޭ ކަމަށް ރިޕޯޓްތަކުން ބުނެ އެވެ.
ޔުނައިޓެޑުން ނުވިއްކާނީ ޒުވާން ކުޅުންތެރިން ކަމަށްވާ އަލެހަންދުރޯ ގަނާޗޯ އާއި ކޯބީ މައިނޫ އަދި ރަސްމުސް ހޮއިލުންޑެވެ.
ފެނާންޑޭސް ބުނީ ޔުނައިޓެޑް ދޫކޮށްލުމުގެ އެއްވެސް ހިޔާލެއް ނެތް ކަމަށެވެ.
"ކްލަބުގެ މުސްތަގްބަލުގައި އަހަރެން ހިމަން ބޭނުންވާނަމަ، އަހަރެން މި ކްލަބުގައި ދެމިހުންނާނަން. އެކަމަކު ކްލަބުން އަހަރެން ބޭނުންނުވެއްޖެނަމަ އަހަރެން އެހެން ކްލަބަކަށް ދާނީ،" ފެނާންޑޭސް ބުންޏެވެ،
ފެނާންޑޭސް މިހާރު ޔުނައިޓެޑްއާ އެކު ހަދާފައިވާ ކޮންޓުރެކްޓްގައި އަދި ބާކީ ދެ އަހަރު އެބައޮތެވެ. އަދި އެ ކޮންޓުރެކްޓްގައި ވާ ގޮތުން ދެ ފަރާތުން އެއްބަސްވާނަމަ، އިތުރު އެއް އަހަރަށް ކޮންޓުރެކްޓް އާކުރެވޭނެ އެވެ.
ޔުނައިޓެޑްގެ ކޯޗު އެރިކް ޓެން ހާގް ބުނީ އެ ކްލަބުން ފެނާންޑޭސް ބަހައްޓަން ބޭނުންވާ ކަމަށެވެ. އެކަމަކު، ޔުނައިޓެޑްގައި އޮތް މުސްތަގުބަލާމެދު ސުވާލު އުފެދޭ ގޮތަށް ފެނާންޑޭސްް ވާހަކަދެއްކީ ކީއްވެގެންތޯ ނޫސްވެރިން ސުވާލުކުރުމުން ޓެން ހާގް ބުނީ "އެއްޗެއް ބުނަން އެނގޭނީ އެ އިންޓަވިއު ބެލުމަށްފަހު" ކަމަށެވެ.
ޓެން ހާގް ބުނީ ފެނާންޑޭސް އަކީ އަބަދުވެސް ޓީމު މޮޅުކޮށްދޭން ގަދައަޅައި މަސައްކަތްކުރާ ކުޅުންތެރިއެއް ކަމަށެވެ.
"ޓީމުގެ ގިނަ ކުޅުންތެރިންނަށް އަނިޔާގެ މައްސަލަތައް ދިމާވެފައިވާ ދަނޑިވަޅެއްގައި، ޓީމު ލީޑު ކުރުމަކީ ފަސޭހަކަމެއް ނޫން،" ޓެން ހާގް ބުންޏެވެ.
ޔުނައިޓެޑުން މި ސީޒަނަށް ފަހު ޓެން ހާގް މަގާމުން ވަކިކުރާނެ ކަމަށް ވެސް ރިޕޯޓްތައް ބުނެ އެވެ.
