ގޯތި ދިނުމަށާއި ފްލެޓް އެޅުމަށް އަދި ބައިނަލްއަގުވާމީ ވިޔަފާރި ބަނދަރެއް ތަރައްގީކުރަން ކުރީ ސަރުކާރުން ހިއްކަން ފެށި ގުޅިފަޅުގެ ބިން ހިއްކުމުގެ މަޝްރޫއު މަޑުޖައްސައިލަން ހައި ކޯޓުން ނެރުނު ވަގުތީ އަމުރު ސުޕްރީމް ކޯޓުން މިއަދު ބާތިލްކޮށްފި އެވެ.
ސުޕްރީމް ކޯޓުން އެ ގޮތަށް މިއަދު ނިންމީ ހައި ކޯޓުގެ ވަގުތީ އަމުރު ތަންފީޒުކުރުން މަޑުޖައްސައިލަން ކުރިން އަމުރުކޮށް، އެއާ އެކީ މިދިޔަ ސަރުކާރުން ރާވާފައިވާ ވަރަށް ގުޅީފަޅު ހިއްކުމުގެ މަސައްކަތް ނިންމާލާފައި ވެސް ވަނިކޮށެވެ.
ގުޅިފަޅު ހިއްކާތީ އެ ސަރަހައްދާއި ވަށައިގެންވާ ތަންތަނުގެ ތިމާވެއްޓަށް އިއާދަނުކުރެވޭނެ ވަރުގެ ގެއްލުމެއް ލިބޭނެ ކަމަށް ބުނެ އެ މައްސަލަ ކޯޓަށް ހުށަހެޅީ ތިމާވެށި އެކްޓިވިސްޓު ހުމައިދާ އަބްދުލްގަފޫރު (ހުމޭ) އެވެ.
އޭނާ ހުށަހެޅި މައްސަލާގައި ބިން ހިއްކުން މަޑުޖައްސައިލަން އެދުނު ވަގުތީ އަމުރު ހައި ކޯޓުން ނެރުމުން ދައުލަތުން އެ އަމުރު ސުޕްރީމް ކޯޓުގައި އިސްތިއުނާފުކުރީ އެވެ.
ސުޕްރީމް ކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރެއްވީ އެ ހުކުމުގައި ފާހަގަކުރެއްވި ކަމަކީ ސުޕްރީމް ކޯޓުން އެ މައްސަލާގައި ބަލަން ޖެހޭނެ ހަމައެކަނި ކަމަކީ ވަގުތީ އަމުރު ހައި ކޯޓުން ނެރުނީ އޮންނަން ޖެހޭ އުސޫލުތަކާ އެއް ގޮތަށްތޯ ނުވަތަ ނޫންތޯ ބެލުމެވެ.
މައުޟޫއީ މައްސަލާގައި ހިމެނޭ އެކި ނުކުތާތަކާ މެދު މި މަރުހަލާގައި އެ ކޯޓުން ބަލަން ޖެހޭނެ ކަމެއް ނޫން ކަމަށެވެ.
ސުޕްރީމް ކޯޓުގެ ހުކުމުގައި މައިގަނޑު ގޮތެއްގައި ދެން ފާހަގަކޮށްފައިވަނީ ހައި ކޯޓުން ވަގުތީ އަމުރު ނެރުމުގައި، އެ މަޝްރޫއު މަޑުޖައްސާލުމުން ދައުލަތަށް އޭގެ ސަބަބުން ލިބޭ މާލީ ގެއްލުންތަކަށް ރިއާޔަތްކޮށްފައި ނެތް ކަމެވެ.
ދައުލަތާއި އެ ކުންފުންޏާ ދެމެދު ވެފައިވާ އެއްބަސްވުމުގައިވާ ގޮތުން، މަޝްރޫއު ހުއްޓާލައިފިނަމަ އައިޑަލް ޗާޖަސްގެ ގޮތުގައި ގަޑިއިރަކަށް 15،300 ޔޫރޯ ދައްކަން ޖެހެ އެވެ. މަސް ދުވަހަށް ހުއްޓާލާފައި ބާއްވާނަމަ 11 މިލިއަން ޔޫރޯ ދައުލަތަށް ހަރަދުވާނެ އެވެ.
ބިޑަކާ ނުލައި 53 މިލިއަން ޑޮލަރަށް އެ މަޝްރޫއު ހަވާލުކުރީ އެ ފަޅު ހިއްކުމުގައި އެންމެ ކުރީންސުރެ ހަރަކާތްތެރިވި ނެދަލޭންޑްސްގެ ބޮސްކާލިސް އަށެވެ. އެއީ ފުރަތަމަ ފިޔަވައްސެވެ. އެ ފިޔަވަހީގެ ދަށުން ހިއްކީ 42 ހެކްޓަރެވެ. ދެވަަނަ ފިޔަވަހީގެ ގޮތުގައި ހަވާލުކުރީ އިތުރަށް 150 ހެކްޓަރެވެ.
ގުޅީފަޅު ފުރަތަމަ ހިއްކަން ފެށީ، ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އޭރު ގުޅީފަޅުން ހިއްކީ 27 އެއްހާ ހެކްޓަރުގެ ބިމެވެ. ދެން އައި ސަރުކާރުން އެ މަސައްކަތް ހުއްޓާލި އެވެ.
