ރާއްޖެއާ އިންޑިއާއާ ދެމެދު އޮތް ގުޅުން ގޯސްނުުވާ ކަމަށާއި ދިމާވާ ބޮޑެތި ކަންކަމުގައި އެގައުމުގެ އެހީތެރިކަން އަދިވެސް ލިބޭނެ ކަމުގެ ޔަގީންކަން އެބަ އޮތް ކަމަށް ފޮރިން މިނިސްޓަރު މޫސާ ޒަމީރު މިއަދު ިދާޅުވެއްޖެ އެވެ.
ވެރިކަންކުރާ ޕީއެންސީއާއި އެޕާޓީއަކުން ޕީއެންސީ އުފެއްދި ޕީޕީއެމް އިދިކޮޅުގައި ތިބި އިރު އިންޑިއާއާ ދެކޮޅަށް އަޑު އުފުލައި ވަރުގަދަ ހަރަކާތެއް ހިންގި އެވެ. އޭރު އިންޑިއާއަށް ފާޑުކީ މައިގަނޑު ދެ ކަަމަކާ ގުޅުވައިގެންނެވެ. އެއީ ވައިގެ ތިން އުޅަނދެއް އޮޕަރޭޓްކުރުުުމުގެ ނަމުގައި ރާއްޖޭގައި އިންޑިއާ ސިފައިން ތިބުމާއި އެގައުމުން ދަރަންޏަށް ދޫޫކޮށްފައިވާ ފައިސާގެ އަދަދު ގިނަކަމާ ހެދި އެވެ.
އިދިކޮޅުގައި ތިބި އިރު އިންޑިއާ ސިފައިން ރާއްޖޭން ފޮނުވައިލަން ވައުދުވެފައި ވާތީ ރާއްޖޭގައި ތިބި ، އެގައުމުގެ 88 ސިފައިންގެ ތެރެއިން 76 މީހަކު އަނބުރައި ފޮނުވައިލުމަށް ފަހު އެކަމާ ބެހޭ މައުލޫމާތު ދޭން ރައީސް އޮފީހުގައި މިއަދު ނޫސްވެރިންގެ ބައްދަލުުމެއް ބޭއްވި އެވެ.
އެ ބައްދަލުުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ފޮރިން މިނިސްޓަރު ޒަމީރު ވިދާޅުވީ ދިވެހި ސަރުކާރާ އިންޑިއާ ސަރުކާރާ ދެެެމެދު އެއްވެސް ދެކޮޅުވެރިކަމެއް ނެތް ކަމަށެވެ. ދެ ސަރުކާރުގެ ދެމެދުގައި މުއަމާލާތްތައް ހިނގަމުން އަންނީ ރަހުމަތްތެރިކަމާ އެކުގައި ކަމަށް ވެސް އޭނާ ވިދާޅުވި އެވެ.
"އަދިވެސް ރާއްޖެއަށް ދިމާވާ ކަންކަމުގައި އަަޅުގަނޑުމެންނަށް އިންޑިއާގެ އެހީތެރިކަން ލިބޭނެ ކަމާ ދޭތެރޭ އެއްވެސް ޝައްކެއް ނުކުރަން،" ޒަމީރު ވިދާޅުވި އެވެ.
އެއަށް ފަހު އޭނާ އިންޑިއާއަށް ވަރަށް ބޮޑަށް ތައުރީފުވެސް ކުރެއްވި އެެވެ.
"ރާއްޖޭގެ މިނިވަންކަމަށާއި އަދި އޭގެ އިތުރުުން ރާއްޖޭގެ ތަރައްގީއަށް ޓަކައި ވަރަށް ގިނަ މަސައްކަތްތަކެއް [ކޮށްދިން]، ވަރަށް ބޮޑު ބައިވެރިވުމެއް އޮތް ގައުމެއް އިންޑިއާއަކީ އިނގޭތޯ،" ޒަމީރު ވިދާޅުވި އެވެ.
އޭގެ މިސާލެއްގެ ގޮތުގައި ދެއްކެވީ 1988 ވަނަ އަހަރު އަވަށްޓެރި ސްރީލަންކާގެ ޓެރަރިސްޓް ޖަމާއަތަކާ ގުޅިގެން ދިވެހިންގެ ބަޔަކު ދިން އުދުވާނީ ހަމަލާގެ ވާހަކަ އެވެ. އެހީތެރިވެވޭނެ ގިނަ ގައުުމުތަކެއް ހުރި ނަަމަވެސް އެފަހަރު ވެސް ލިބުނީ އިންޑިއާގެ އެހީ ކަަމަށް އޭނާ ވިދާޅުވި އެވެ.
އިންޑިއާގެ އެހީތެރިކަމަށް ތައުރީފު ކުރެއްވުމަށް ފަހު، މިނިސްޓަރު ދެއްކެވީ އެންމެ ފަހުން އެގައުމަށް ކުރެއްވި ދަތުރުގައި އެގައުމުގެ ސަރުކާރުން ބެހެއްޓި ގާތްކަމުގެ ވާހަކަ އެވެ.
"އެހެންވީމާ އަޅުގަނޑުމެންނާ އިންޑިއާއާ އެކީ އޮތީ ވަރަށް ގާތް ގުޅުމެއް، އިރާދަކުރެއްވިއްޔާ މި ގުޅުން ހީނަރުވާނެ ގޮތަކަށް ސަރުކާރުގެ ޕޮލިސީތައް ބައްޓަން ނުވެސް ކުުރާނަން އިނގޭތޯ" ޒަމީރު ވިދާޅުވި އެވެ.
