ލަންޑަން (މެއި 3) - އިނގިރޭސި ޕްރިމިއާ ލީގުގައި ރޭ ޗެލްސީން 2-0 އިން ޓޮޓެންހަމް ހޮޓްސްޕާސް ބަލިކޮށް ހިތްހަމަޖެހުމެއް ހޯދައިފި އެވެ.
ޗެލްސީން މި ނަތީޖާއާ އެކު ވަނީ މި ސީޒަނުގައި ޓޮޓެންހަމްއާ ދެކޮޅަށް ކުޅުނު ދެ މެޗުން ވެސް މޮޅުވެފަ އެވެ. އެ ގޮތުން ޓޮޓެންހަމް ދަނޑުގައި، ނޮވެމްބަރު މަހު ޗެލްސީން ވަނީ 4-1 އިން ކުރިހޯދައިފަ އެވެ. ރޭގެ މޮޅާ އެކު ޗެލްސީ ވަނީ 34 މެޗުން 51 ޕޮއިންޓް ހޯދައި، ލީގުގެ އަށް ވަނަ އަށް ޖެހިލައިފަ އެވެ.
ގަދަ ހަތަރެއްގައި ނިންމަން މަސައްކަތް ކުރަމުން އަންނަ ޓޮޓެންހަމް، މި ނާކާމިޔާބީއާ އެކު، ފަސް ވަނައިގައި އޮތީ 34 މެޗުން 60 ޕޮއިންޓް ހޯދައިގެންނެވެ.
އަމިއްލަ ދަނޑުގައި ކުޅުނު ޗެލްސީން ރޭގެ މެޗުގައި ލީޑުނެގީ، 24 ވަނަ މިނިޓްގައި ޓްރެވާ ޗަލޯބާ ޖެހި ގޯލުންނެވެ. މިއީ، ހިލޭ ޖެހުމަކުން، ކޮނާ ގެލަގާ ނަގައިދިން ބޯޅައަކަށް ފުންމައިގެން އަރައި، ޗަލޯބާ ބޮލުން ޖެހި ލަނޑެކެވެ. މި ގޯލު ބަލައިގަތީ، ވީޑިއޯ އެސިސްޓަންޓް ރެފްރީ (ވީއޭއާރް) އިން އޮފްސައިޑަކާއި ފައުލެއް އޭރިއާތެރެއިން ހިނގިތޯ ޔަގީންކުރުމަށް ފަހު އެވެ.
ފުރަތަމަ ހާފުގައި ޓޮޓެންހަމް އަށް އެއްވަރުކޮށްދޭން އެންމެ ރަނގަޅު ފުރުސަތެއް ލިބުނީ، ކްރިސްޓިއަން ރޮމޭރޯ އަށެވެ. އޭރިއާތެރެއަށް ހުރަސްވި ބޯޅައެއް ރޮމޭރޯ ބޮލުން ޖެހިއިރު، ދިޔައީ އަރިމަތިން ބޭރުންނެވެ.
ޗެލްސީން ތިން ޕޮއިންޓް ޔަގީންކުރި ލަނޑު ޖެހީ 71 ވަނަ މިނިޓްގަ އެވެ. މިއީ، ކޯލް ޕާމާ ޖެހި ހިލޭ ޖެހުމެއް ދަނޑީގައި ޖެހިފައި ނުކުތް ވަގުތު ރީބައުންސަކުން، ނިކްލަސް ޖެކްސަން ޖެހި ލަނޑެކެވެ.
ޓޮޓެންހަމްގެ މި ނަތީޖާއާ އެކު، ލީގުގެ ތިން ވަނައިގައި އޮތް ލިވަޕޫލަށް ވަނީ އަންނަ ސީޒަނުގެ ޗެމްޕިއަންސް ލީގުގެ ޖާގަ ޔަގީންވެފަ އެވެ.
