އިންޓަނޭޝަނަލް ކްރިކެޓް ކައުންސިލް (އައިސީސީ) އިން އޭޝިއާ ސަރަހައްދުގެ ނޮން-އެލިޖިބަލް (ނޮން ވޯޓިން) ގައުމުުތައް ތަމްސީލްކުރާނެ މެމްބަރަކަށް، ރާއްޖޭގެ ކްރިކެޓް ބޯޑުގެ ރައީސް މުހައްމަދު ފައިސަލް، އިތުރު ދައުރަކަށް އިންތިހާބުވެއްޖެ އެވެ.
އައިސީސީގައި އޭޝިއާ ސަރަހައްދު ތަމްސީލް ކުރުމުގެ ފުރުސަތު ފައިސަލަށް ލިބުނު ފުރަތަމަ ދައުރު ހަމަވެފައިވަނީ މިދިޔަ މާޗް މަހުގެ ނިޔަލަށެވެ. އަލުން މަގާމަށް އިންތިހާބުވުމާ އެކު، ފައިސަލް އިތުރު ދެ އަހަރު މި ޒިންމާ އަދާކުރައްވާނެ އެވެ.
ފައިސަލް ކުރައްވަން ޖެހޭނެ މަސައްކަތްތަކަކީ ވޯޓު ނުލެވޭ ގައުމުތަކުގެ ފަރާތުން އައިސީސީގެ އެކި ބައްދަލުވުންތަކުގައި ބައިވެރިވުމާއި އައިސީސީގެ އެކި މަސައްކަތްތަކާ ބެހޭ މުހިންމު ބައްދަލުވުންތަކުގައި ބައިވެރިވުމެވެ. މީގެ އިތުރުން، ނޮން ވޯޓިން ގައުމުތަކުގައި ކްރިކެޓް ޑިވެލޮޕްކުރުމުގައި، ބައިނަލްއަގުވާމީ ޖަމިއްޔާތައް މެދުވެރިކޮށް ކުރަން ޖެހޭ މުހިންމު ކަންތައްތަކުގައި ވެސް ފައިސަލްގެ ބައިވެރިވުން އޮންނާނެ އެވެ.
އޭސީސީ އެގްޒެކެޓިވް ބޯޑުގެ ޑިރެކްޓަރުގެ މަގާމުގައި ވެސް ފައިސަލް ދެ ދައުރު ހުންނެވި އެވެ.
ކްރިކެޓް ބޯޑުގެ ރައީސްކަމަށް ފައިސަލް އިންތިހާބުވީ، 2020 ވަނަ އަހަރުގެ ސެޕްޓެމްބަރު މަހު ބޭއްވި އިންތިހާބު ކާމިޔާބު ކޮށްގެންނެވެ. އޭގެ ފަހުން މިވީ މުއްދަތުގައި ރާއްޖޭގެ ކްރިކެޓްގައި ތަފާތު ގިނަ އާ ކަންތައްތަކެއް ކޮށްފައިވާއިރު، ކްރިކެޓް ޑިވެލޮޕްކުރުމަށް 2030 ވަނަ އަހަރާ ހަމައަށް ކާމިޔާބުގެ މަގުޗާޓެއް ހިމެނޭހެން ދުރުރާސްތާ ޕްލޭނެއް ވަނީ ތައްޔާރުކުރަން ފަށައިފަ އެވެ.
