ރައީސުލްޖުމްހުރިއްޔާގެ އޮފީހުން އެއްވެސް މައުލޫމާތެއް ދިނުމަށް ނޫސްވެރިންނާ ބައްދަލު ނުކުރާތާ ތިން މަސްދުވަސް ފަހުން، މިއަދު 11:00 ގައި ޕްރެސް ކޮންފަރެންސެއް ބާއްވަން ނިންމައިފި އެވެ.
ރައީސް އޮފީހުން މީޑިއާތަކަށް މިއަދު ފޮނުވި މެސެޖެއްގައި ބުނެފައިވަނީ ނޫސްވެރިންނާ ބައްދަލުކުރައްވާނީ އެ އޮފީހުގެ އިސް ތަރުޖަމާނުގެ މަގާމަށް އައްޔަނު ކުރެއްވި ހީނާ ވަލީދު އެވެ.
ހީނާ އެ މަގާމަށް އައްޔަން ކުރީ ޑިސެމްބަރު 31، 2023 ގެ ރޭ ދަންވަރު އެ އޮފީހުގެ ތަރުޖަމާނުގެ މަގާމުގައި ހުންނެވި މުހައްމަދު ޝަހީބު އެ މަގާމުން ދުރުކުރުމާ ގުޅިގެން އެ މަގާމު ހުސްވެ، ތިންމަސް ދުވަސް ވީ ފަހުންނެވެ.
ރައީސް އޮފީހުން އެންމެ ފަހުން ނޫސްވެރިންގެ ބައްދަލުވުމެއް ބޭއްވީ ޖެނުއަރީ 28، ގެ ހަވީރު 5:00 ގަ އެވެ. އެ ދުވަހު ނޫސްވެރިންނާ ބައްދަލުކުރެއްވީ އެ އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމް އެވެ.
ބައްދަލުވުންތައް މެދުކަނޑާލުމުގެ ކުރިން ރައީސް އޮފީހުން ދިޔައީ ކޮންމެ ކެބިނެޓު ބައްދަލުވުމަކަށް ފަހު ނޫސްވެރިންނާ ބައްދަލުކޮށް މައުލޫމާތު ދެމުންނެވެ. ނަމަވެސް އެ ބައްދަލުވުންތަކުގައި މައުލޫމާތު ދެނީ އަދި ސުވާލު ކުރެވެނީ ހަމައެކަނި އެ ދުވަހުގެ ކެބިނެޓުގެ ނިންމުންތަކާ ބެހޭގޮތުންނެވެ.
ރިޔާސީ ކެމްޕޭނުގައި މީޑިއާތަކާއި ނޫސްވެރިންނާ ގާތުން މަސައްކަތް ކުރައްވާނެ ކަމަށް ރައީސް ވިދާޅުވި ނަމަވެސް، އެމަނިކުފާނު އެންމެ ފަހުން ނޫސްވެރިންގެ ސުވާލުތަކާ ކުރިމަތިލެއްވީ ޑިސެމްބަރު 5، 2023 ގަ އެވެ.
