ކުރީގެ ރައީސް އަބްދުﷲ ޔާމީނުގެ އާ ޕާޓީ ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމުގެ ޖަލްސާއަށް ހުރަސް އަޅައި ޣިޔާސުއްދީން ސްކޫލުގެ ގޭޓު ބަންދުކޮށްފި އެވެ.
މިރޭ 10:00 އަށް ތާވަލުކުރި ޕީއެންއެފްގެ ޖަލްސާއަށް, އެ ޕާޓީގެ އިސްވެރިންނާއި މެންބަރުން ދިޔައިރު, ފުލުހުން ވަނީ ޣިޔާސުއްދީން ސްކޫލުގެ ގޭޓު ބަންދުކޮށް ބައިވެރިން އެތެރެއަށް ދިއުމަށް ހުރަސް އަޅައިފަ އެވެ.
ޖަލްސާއަށް ހުރަސްއެޅުމުން އެ ސަރަހައްދަށް އެއްވި ތިބި އެ ޕާޓީގެ ސަޕޯޓަރުން ދަނީ ރައީސް ޑރ. މުހައްމަދު މުއިއްޒުގެ އިސްތިއުފާއަށް ގޮވާލަމުންނެވެ.
އެ ސަރަހައްދުގައި މިވަގުތު ހުރި "އަދަދު"ގެ ނޫސްވެރިޔާ މުހައްމަދު ޝަހުޒާން ބުނި ގޮތުގައި ޣިޔާސުއްދީން ސްކޫލްގެ ގޭޓް ފުލުހުން ބަންދުކޮށްފައި ވަނިކޮށް ޕީއެންއެފްގެ ބައެއް ސަޕޯޓަރުން، އެ ސްކޫލުގެ ތެރެއަށް ވަނީ ވަދެފަ އެވެ. އެމީހުން ހުއްޓުވުމަށް ޓަކައި ފުލުުހުން ބާރުގެ ބޭނުންކުރި މަންޒަރު ފެނުނު ކަމަށް ވެސް އޭނާ ބުންޏެވެ.
ޕީއެންއެފް އުފެއްދުމުގެ ޖަލްސާއަށް ޣިޔާސުއްދީން ސްކޫލުގެ ހޯލު ވަނީ ތައްޔާރުކޮށްފަ އެވެ. އެ ސްކޫލަކީ ރާއްޖޭގައި ހިންގަމުންދާ ޕްރައިވެޓް ސްކޫލެކެވެ.
ފުލުހުން ބުނީ ހުއްދަދެވިފައިނުވާ އެއްވުމެއް ހުއްޓުވައި ސްކޫލު ރައްކާތެރިކުރުމަށް، މިނިސްޓްރީ އޮފް އެޑިއުކޭޝަންގައި އެދިފައިވާތީ، އެކަން ތަންފީޒުކުރަން ފުލުހުން މަސައްކަތްކުރަމުން އަންނަ ކަމަށެވެ.
"ޣިޔާސުއްދީން އިންޓަރނޭޝަނަލް ސްކޫލުގެ ފަރާތުން އެސްކޫލުގައި ބޭއްވުމަށް މަސައްކަތް ކުރަމުންދާ ހުއްދަދެވިފައިނުވާ އެއްވުމެއް ހުއްޓުވައި ސްކޫލު ރައްކާތެރިކުރުމަށް، މިނިސްޓްރީ އޮފް އެޑިއުކޭޝަންގައި އެދިފައިވާތީ، އެކަން ތަންފީޒުކުރުމަށް، މިނިސްޓްރީގެ ފަރާތުން ފުލުހުންގެ އެހީތެރިކަމަށް އެދިފައިވާތީ، އެސްކޫލުގައި މިވަގުތު ކުރިއަށްދާ އެއްވުމަށް ފުލުހުންދަނީ އެޓެންޑް ކުރަމުން،" ފުލުހުންގެ މީޑިއާ އޮފިޝަލަކު ވިދާޅުވި އެެވެ.
ޖަލްސާއަށް ވަގުތު ކުޑަތަން ވެފައި ވަނިކޮށް އެ ސްކޫލުގެ ގޭޓުތައް ބަންދުކުރިއިރު, މިރޭ އިރާކޮޅުވެސް އެ ޖަލްސާ އެތަނުގައި ބޭވުމަށް ހުރަސް އަޅަން ސަރުކާރުން އުޅޭ ކަމުގެ ތުހުމަތު އެޕާޓީގެ މުއައްސިސު ޒެއިން އަބްދުﷲ ޔާމީނުން ތުހުމަތުކުރެއްވި އެވެ.
ޒެއިން ވިދާޅުވީ ޣިޔާސުއްދީން އިންޓނޭޝަނަލް ސްކޫލްގެ މާލަމް ދޫކުރަން އެއްބަސްވުމަށް ފަހު އެކަން ބަދަލުކުރަން އެ ސްކޫލުން ފޮނުވި ކަމަށް ބުނާ ލިއުމެއް ހިފައިގެން ފުލުހުން އައި ކަމަށެވެ. ޣިޔާސުއްދީނަށް ގޮސް ޕީއެންއެފްގެ އިސް ބޭފުޅުންނާ މުއާމަލާތްކުރި ފުލުހުން ހަވާލާދިނީ ޒެއިން ވިދާޅުވި ގޮތުގައި މިއަދުގެ ވަރަށް ފަހުގެ ވަގުތެއްގައި ޣިޔާސުއްދީންގެ މެނޭޖްމަންޓް ފޮނުވި އީމެއިލް އަކަށެވެ.
"ސްކޫލުން ފޮނުވާފައި އޮތް އީމެއިލް އެއްގައި މި އޮންނަނީ ހަފުލާ [ޖަލްސާ] އިތުރަށް ކުރިއަށް ގެންދެވޭކަށް ނެތޭ. އެހެންވީމާ ތިޔަ ބޭފުޅުން އަޅުގަނޑުުމެންނަށް ޕޭކުރައްވާފައި އޮތް އެޑްވާންސެއް ނުވަތަ ފީއެއް އަޅުގަނޑުމެން ރިފަންޑްކޮށްދޭނަމޭ، އެކައުންޓް ނަމްބަރެއް ދެއްވާށޭ،" ޒެއިން ވިދާޅުވި އެވެ.
އޭނާ ވިދާޅުވީ ޣިޔާސުއްދީންގެ އެ އީމެއިލްއާ ގުޅޭ ގޮތުން ފުލުހުން އެތަނަށް ދިޔަ، ގާނޫނީ ހައިސިއްޔަތެއް ވިސްނިވަޑައިނުގަންނަވާ ކަމަށާއި އެ ޖަލްސާއަށް އެޅޭނެ އެއްވެސް ހުރަހެއް އޮތް ކަމަށް ދެކެވަޑައިނުގަންނަވާ ކަމަށެވެ.
"އެކަމަކު ކަންތައްތަކެއް ދަތިކުރުމުގެ ގޮތުން، ނޫނިއްޔާ އަޅުގަނޑުމެންނަށް ނުތަނަވަސްކަމެއް [ގެނުވަން] ނޫނިއްޔާ ޖަލްސާއަށް [ހުރަސް އަޅަން]، އެކަހަލަ ކަންތައްތަކެއް ކަންނޭނގެ ކުރިއަށް މިދަނީ،" އޭނާ ވިދާޅުވި އެވެ.
ޒެއިން ވިދާޅުވި ގޮތުގައި ޣިޔާސުއްދީން ސްކޫލްގެ ޖަލްސާކުރާ މާލަމަށް، އެފަދަ ޖަލްސާއަަކަށް ބޭނުންވާ ކަރަންޓް ވަކިން ބޭނުންންވާތީ ސްޓެލްކޯގައި އެދުމުން އެ އިންތިޒާމް ވެސް ވަނީ ހަމަޖައްސައިނުދީފަ އެވެ. އެހެންވެ، ޕީއެންއެފުން ވަނީ ވަކި ޖަނަރޭޓަރެއް އެ ސްކޫލަށް ގެންގޮސްފަ އެވެ.
އޭނާ ސިފަކެރެއްވި ގޮތުގައި އެހުރިހާ ކަމަކީ ޕީއެންއެފް އުފައްދައިގެން ސިޔާސީ ގޮތުން ވަކިން ހަރަކާތްތެރިވާތީ ސަރުކާރުގެ ތެރޭގައި ތިބި ބަޔަކަށް އެކަން "ހަޖަމް ނުވެގެން" ކުރާ ކަންތައްތަކެކެވެ.
