ރަސްމާލޭގެ 500 ހެކްޓަރުގެ ބިން އީގަލް ހިލްސްއަށް ދޭން ނިންމި ނިންމުމާ ގުޅޭގޮތުން ހާމަނުކޮށް ހުރި މައުލޫމާތުތައް ސާފުކޮށްދޭން އެދި ރައީސް މުހައްމަދު މުއިއްޒުއަށް ޕީއެންއެފްއިން ސިޓީއެއް ފޮނުވައިފި އެވެ.
ޕީއެންއެފްއިން ފޮނުވާފައިވާ ސިޓީގައި ބުނީ ރަސްމާލެ ޑީލްގައި ގޮތް ނޭނގޭ އެތައް ކަމެއް ހުރި ކަމަށެވެ. އަދި، އެ މުއާމަލާތުގެ ސަބަބުން ދިވެހި ރައްޔިތުންނަށާއި ދިވެހި ދައުލަތުގެ މިނިވަންކަމާއި އިސްތިގުލާލަށް ނުރައްކާވެދާނެ ކަމަށް ބެލެވޭ ކަމަށް ވެސް އެ ސިޓީގައި ބުންޏެވެ.
އެހެންކަމުން މިހައިތަނަށް އެ މުއާމަލާތާ ބެހޭގޮތުން ސަރުކާރުން ހާމަނުކޮށް ހުރި 34 ކަމެއް ސާފުކޮށްދިނުމަށް އެ ސިޓީގައި ރައީސްގެ ކިބައިން އެދިފައިވެ އެވެ.
އެގޮތުން، ރަސްމާލޭގެ ބިމުން އީގަލް ހިލްސްއަށްދޭ ބިމުގެ އަގާއި އެ ބިން ކުއްޔަށް ދިނުމުގެ ކުރިން ގާނޫނު އަސާސީއަށާއި ގާނޫނުތަކަށް ބަދަލެއް ގެންނަންޖެހޭ ނަމަ، އެ ބަދަލަކީ ކޮބައިކަމާއި އެ ބިން ހިއްކައި ރިވެޓްމެންޓު ޖެހުމަށް ސަރުކާރުން ކޮށްފައި ވަނީ ކިހައިވަރެއްގެ ހަރަދެއްތޯ އެ ސިޓީގައި ސުވާލުކޮށްފައިވެ އެވެ.
އޭގެ އިތުރުން، ރަސްމާލެއިން އީގަލް ހިލްސްއަށް 500 ހެކްޓަރުގެ ބިން ދޭން ނިންމާފައިވާ 99 އަހަރު މާނަކުރާ ގޮތާއި އެ މަޝްރޫއު އީގަލް ހިލްސްއާ ހަވާލުކުރީ ކޮން ގޮތަކުން ކަމާއި އީގަލް ހިލްސްއަށް ދޭ ބިމުން އެއްވެސް މިންވަރެއް އެހެން ބަޔަކަށް މިލްކު ކޮށްދެވިދާނެތޯ އެ ސިޓީގައި ސުވާލުކޮށްފައިވެ އެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ ހަފްތާގެ ހޯމަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވި ނަމަވެސް ސަރުކާރުން މަސައްކަތް ކުރަމުން އަންނަނީ މިއީ ރަނގަޅު މުއާމަލާތެއް ކަމުގައި ދައްކާށެވެ. އެ ގޮތުން މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި މި އިންވެސްޓުމަންޓުން ރާއްޖެ ނުދެކޭ ވަރުގެ އާމްދަނީ ވަންނާނެ ކަމަށް އަންނަނީ ބުނަމުންނެވެ.
