އިކުއެޑޯގައި ތިބި މެކްސިކޯގެ ޑިޕްލޮމެޓުން ގެންގޮސްފި އެވެ.
މެކްސިކޯއިން އެ ގައުމުގެ ޑިޕްލޮމެޓުން އިކުއެޑޯއިން ގެނައީ އިކުއެޑޯގައި ހުންނަ މެކްސިކޯގެ އެމްބަސީއަށް ސަލާމަތީ ބާރުތަކުން ގަދަކަމުން ވަނުމުން އެކަމާ ހިތްހަމަ ނުޖެހިގެންނެވެ.
އިކުއެޑޯގައި ހުންނަ މެކްސިކޯ އެމްބަސީއަށް އެ ގައުމުގެ ސަލާމަތީ ބާރުތަކުން ވަނީ ހިމާޔަތް ހޯއްދެވުމަށް އެމްބަސީއަށް ވަދެ ހުންނެވި އިކުއެޑޯގެ ކުރީގެ ނައިބު ރައީސް ޖޯޖް ގްލަސް ހައްޔަރު ކުރުމަށެވެ.
އިކުއެޑޯގެ މި އަމަލާ ގުޅިގެން އެ ގައުމާއެކު އޮތް ހާރިޖީ ގުޅުން ވެސް މެކްސިކޯއިން ކަނޑާލާފަ އެވެ.
އިކުއެޑޯގެ ކުރީގެ ނައިބު ރައީސް ޖޯޖް ގްލަސް އަށް ކޮރަޕްޝަންގެ ތުހުމަތުތައް ކުރެވޭ ނަމަވެސް، ސިޔާސީ ހިމާޔަތް ދީފައި ވަނިކޮށް އެމްބަސީއަށް ވަދެ ގަދަކަމުން ހައްޔަރު ކުރުމުން އެކަން ބައެއް ގައުމުތަކުން ވެސް ވަނީ ކުށްވެރި ކޮށްފަ އެވެ.
އިކުއެޑޯއިން ބައިނަލްއަގުވާމީ ގާނޫނުތަކާ ހިލާފުވެފައިވާ ކަމަށް ބުނެ އެ މައްސަލަ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހަޅާނެ ކަމަށް ވެސް މެކްސިކޯއިން ވަނީ ބުނެފަ އެވެ.
