އިންޑިއާގައި މާލީ ކަންކަމާ ގުޅޭ މައުލޫމާތު ފަތުރާ އުމުރުން 27 އަހަރުގެ އިންފްލުއެންސަރަކު އަމިއްލައަށް މަރުވި ހާދިސާއާ ގުޅިގެން، ސައިބާ ބުލީން ނުވަތަ އިންޓަނެޓް މެދުވެރިކޮށް ފުރައްސާރަކުރުމުގެ ތުހުމަތުތަކެއް ފެންމަތިވެ، އިންވެސްޓަރުންނަށް މާލީ އިރުޝާދު ދޭންޖެހޭނީ ކޮން ބައެއްތޯ ބަހުސް ކުރަން ފަށައިފި އެވެ.
އިންސްޓަގްރާމްގައި "ފައިނޭންސް ވިތު ހަރިޝް" ގެ ނަމުގައި ވަރަށް މަގުބޫލު އެކައުންޓެއް ހިންގަމުންދިޔަ ވީ. ހަރިޝް މަރުވެފައި އޮއްވާ ފެނުނީ މިދިޔަ އަންގާރަ ދުވަހުގެ ހެނދުނު، އިންޑިއާގެ ދެކުނުގެ ސްޓޭޓެއް ކަމަށްވާ ޓެމިލް ނާޑޫގެ ވެރިރަށް ޗެންނާއީ ކައިރީގައި ހުންނަ އޭނާގެ ގޭގެ ތެރެއިންނެވެ.
ހަރިޝް މަރުވީ، އޭނާގެ އިންސްޓަގްރާމް އެކައުންޓުގައި މައްސަލަތަކެއް ހުރި ކަމަށް ބުނެ ހުށަހެޅި ޝަކުވާތަކަކާ ގުޅިގެން މެޓާ އިން އެ އެކައުންޓް ބަންދުކުރިތާ މަދު ހަފުތާތަކެއް ފަހުންނެވެ.
ފުލުހުންނަށް ހުށަހެޅި މައްސަލައިގައި ހަރިޝްގެ ބައްޕަ ޖޭ. ވިނަޔަގަމް ތުހުމަތުކޮށްފައިވާ ގޮތުގައި، އޭނާގެ ދަރިފުޅު މަރުވީ ޓެކްނޮލޮޖީއަށް ހާއްސަ ވެންޗާ ސްޓޫޑިއޯއެއް ކަމަށްވާ "ޒެމޫރިއާ" ގެ ސީއީއޯ އަދި ޔޫޓިއުބަރެއް ކަމަށްވާ ޖޭސަން ސެމިއުލް އިންޓަނެޓް މެދުވެރިކޮށް ކުރި ފުރައްސާރަތަކުގެ ސަބަބުންނެވެ.
މި މައްސަލައިގައި ފުލުހުން ވަނީ މިދިޔަ ބުރާސްފަތި ދުވަހު ސެމިއުލް ހައްޔަރުކޮށްފަ އެވެ. އޭނާގެ މައްޗަށް ތުހުމަތު ކުރެވެނީ ހަރިޝްގެ އަތުން ފައިސާ އަތުލަން (އެކްސްޓޯޝަން) މަސައްކަތް ކުރުމާއި، ސޯޝަލް މީޑިއާގައި ހަރިޝްގެ އަބުރަށް އަރައިގަނެ ވީޑިއޯތަކެއް އާންމުކުރި ކަމަށެވެ.
މީގެ ކުރިން އެކްސްގައި ކުރި ޕޯސްޓެއްގައި ސެމުއެލް ވަނީ އެއްވެސް ގޯސް ކަމެއް ކޮށްފައި ނުވާނެ ކަމަށް ބުނެ އެ ތުހުމަތުތަކަށް އިންކާރުކޮށްފަ އެވެ.
މި ހާދިސާއާއެކު، އިންޑިއާގައި މާލީ ކަންކަމާ ގުޅޭ މައުލޫމާތު ފަތުރާ ފަރާތްތަކުގެ ނުފޫޒު ގަދަވަމުންދާ މިންވަރު ވަނީ ހާމަވެފަ އެވެ. އިންޑިއާގައި އަލަށް އިންވެސްޓްކުރާ މިލިއަނަކަށް ވުރެ ގިނަ މީހުން ބާޒާރުގެ އިރުޝާދު ހޯދުމަށް މިހާރު ބޮޑަށް ބަރޯސާވަނީ ސޯޝަލް މީޑިއާއަށެވެ.
