އިކުއެޑޯގައި ހުންނަ މެކްސިކޯގެ އެމްބަސީއަށް ފުލުހުން ވަދެ ރެއިޑް ކުރުމުން، މެކްސިކޯއިން އިކުއެޑޯއާއެކު އޮތް ހާރިޖީ ގުޅުން ކަނޑާލައިފި އެވެ.
އިކުއެޑޯ ފުލުހުން އެ ގައުމުގައި ހުންނަ މެކްސިކޯ އެމްބަސީ ރެއިޑްކުރީ ސިޔާސީ ހިމާޔަތް ހޯއްދަވައިގެން އެމްބަސީގައި ހުންނެވި އިކުއެޑޯގެ ކުރީގެ ނައިބު ރައީސް ޖޯޖް ގްލަސް ހައްޔަރު ކުރުމަށެވެ.
މިދިޔަ ޑިސެމްބަރު މަހުން ފެށިގެން މެކްސިކޯ އެމްބަސީގައި ސިޔާސީ ހިމާޔަތް ހޯއްދަވައިގެން ގްލަސް ހުންނެވިއިރު، އޭނާގެ މައްޗަށް ކޮރަޕްޝަންގެ މައްސަލަތަކެއް ދަނީ ހިނގަމުންނެވެ.
އެމްބަސީއަށް ވަދެ ގްލަސް ހައްޔަރު ކުރުމަށް ފަހު ވަނީ ޖަލުގައި ބަންދުކޮށްފަ އެވެ.
މެކްސިކޯގެ ފޮރިން މިނިސްޓްރީން ބުނީ އެ ގައުމުން ސިޔާސީ ހިމާޔަތް ގްލަސްއަށް ދީ، ގައުމުން ބޭރަށް ފޮނުވައި ދިނުމަށް އެދިފައި ވަނިކޮށް ހައްޔަރު ކުރުމުން އެކަމާ ކަންބޮޑުވާ ކަމަށެވެ.
ނަމަވެސް އިކުއެޑޯގެ ރައީސް އޮފީހުން ބުނީ އެ ގައުމުގެ ފަސްގަނޑުގައި އެއްވެސް ކުށްވެރިއަކު ދޫކޮށްލާފައި ބެހެއްޓުމަށް ޖާގަ ނުދޭނެ ކަމަށެވެ.
މެކްސިކޯއިން ވަނީ އިކުއެޑޯއިން ބައިނަލްއަގުވާމީ ގާނޫނުތަކާ ހިލާފުވެފައިވާ ކަމަށް ބުނެ، މައްސަލަ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ލާނެ ކަމަށް ބުނެފަ އެވެ.
