ރޮލެކްސް ގަޑިއެއް ހޯދި ކޮރަޕްޝަން މައްސަލައަކާ ގުޅިގެން ޕެރޫގެ ރައީސް ދީނާ ބޮލޫއާޓޭ އަޒުލް ކުރުމުގެ މައްސަލަ ކުރިއަށް ނުގެންގޮސް ބޭރުކޮށްލައިފި އެވެ.
ކޮރަޕްޝަން މައްސަލައާ ގުޅިގެން ބޮލޫއާޓޭ އަޒުލް ކުރުމަށް ދެފަހަރެއްގެ މަތިން ޕެރޫގެ ގާނޫނު ހަދާ މަޖިލީހަށް ހުށަހަޅާފައިވާއިރު، މައްސަލައަށް ބަހުސް ކުރުމާ ހަމައަށް ވެސް ގެންދެވިފައެއް ނުވެ އެވެ.
އެގޮތުން ފުރަތަމަ ނެގި ވޯޓުން 49 މެމްމަބަރުން މައްސަލައަށް ބަހުސް ކުރަން ނުފެންނަ ކަމަށް ވޯޓު ދީފައިވާއިރު، 33 މެމްބަރުން ވަނީ މައްސަލައަށް ބަހުސް ކުރަން ފެންނަ ކަމަށް ވޯޓު ދީފަ އެވެ.
ނަމަވެސް ދެވަނަ ފަހަރަށް 59 މެމްބަރުން މައްސަލައަށް ބަހުސް ކުރުމާ ދެކޮޅަށް ވޯޓު ދިންއިރު، މައްސަލައަށް ބަހުސް ކުރުމާ އެއްކޮޅަށް ވޯޓު ދިނީ 32 މެމްބަރުންނެވެ.
މައްސަލައަކާ ގުޅިގެން ބޮލޫއާޓޭ ދިރިއުޅުއްވާ ގެކޮޅުން ބައި މިލިއަނެއްހާ ޑޮލަރުގެ ރޮލެކްސް ގަޑިއަކާއި، ގަހަނާތަކެއް ފެނޭތޯ ވަނީ ފާސްކޮށްފަ އެވެ.
ޕެރޫގެ ގާނޫނު ހަދާ މަޖިލީހުގައި 130 މެމްބަރުން ތިއްބަވާއިރު، ރައީސް އަޒުލް ކުރުމަށް 87 މެމްބަރުންގެ ވޯޓު ބޭނުންވެ އެވެ.
ކޮރަޕްޝަންގެ ގިނަ ތުހުމަތުތައް ކުރެވޭ ބޮލޫއާޓޭގެ މައްސަލަ ޕެރޫގެ ފުލުހުން އަންނަނީ ތަހުގީގު ކުރަމުންނެވެ.
