ލަންޑަން (މާޗު 30) - ވުލްވްސްގެ ކޯޗު ގެރީ އޯނީލް ގެންދަން މެންޗެސްޓާ ޔުނައިޓެޑް އިން ޝައުގުވެރިވާ ކަމަށް ބުނެ މީޑިއާގައި ފެތުރުނު ވާހަކަތަކުގައި އެއްވެސް ހަގީގަތެއް ނެތް ކަމަށް އޮނީލް ބުނެފި އެވެ.
އީއެސްޕީއެންގައި ރިޕޯޓްކޮށްފައިވާ ގޮތުގައި ޔުނައިޓެޑްގެ ކޯޗިން ސްޓާފުންނަށް ގެންނަން ނިންމާފައިވާ ބަދަލުތަކަކާ ގުޅިގެން، ޔުނައިޓެޑުން އޭނައާ ވާހަކަ ދައްކަން ބޭނުންވާ ކަމަށެވެ.
ވުލްވްސްގެ ކޯޗުކަމާ މިދިޔަ އަހަރުގެ އޮގަސްޓް މަހު ހަވާލުވި އޮނީލްގެ އިރުޝާދުގެ ދަށުން އެ ޓީމު މި ވަގުތު އޮތީ ޕްރިމިއާ ލީގުގެ ނުވަ ވަނައިގައެވެ،
އެކަމަކު، މީޑިއާއާ ވާހަކަ ދައްކަމުން އޮނީލް ބުނީ ޔުނައިޓެޑުން އޭނާއާ ޝައުގުވެރިވާކަން އެނގުނީ މީޑިއާގައި އެ ވާހަކަ ޖެހިކަން ވުލްވްސްގެ މީޑިއާ ޓީމުން އޭނައާ ހިއްސާކުރުމުން ކަމަށެވެ. އަދި ޔުނައިޓެޑް އިން ޝައުގުވެރިވާ ކަމެއް އޭނާ އަށް ނޭނގޭ ކަމަށާޢި އެއީ ހަގީގަތެއް ނެތް ވާހަކަތަކެއް ކަމަށެވެ.
"އަހަންނަކީ ވުލްވްސްގެ ކޯޗު. މި ކްލަބުގައި އަހަރެން މިހުރީ ވަރަށް ހިތްހަމަޖެހިގެން،" އޮނީލް ބުންޏެވެ.
"ޔުނައިޓެޑްގެ ވާހަކަ އަހަންނަށް އެނގުނީ މި ޕްރެސްގެ ކުރިން (ވުލްވްސްގެ) މީޑިއާ ޓީމުން އެ ރިޕޯޓްތަކުގެ ވާހަކަ ހިއްސާކުރުމުން."
އޮނީލް ބުނީ ޔުނައިޓެޑް އިން ޝައުގުވެރިވާ ކަމަށް ދެކެވުނު ވާހަކަތަކުގައި ހަގީގަތެއް ނެތަސް، އެ ފެންވަރުގެ ކްލަބަކުން ޝައުގުވެރިވާ ކަމަށް އަޑުފެތުރުމަކީވެސް "ފަހުރެއް" ކަމަށެވެ.
"އަހަރެން ކުޑައިރުވެސް، ލިވަޕޫލާއި ޔުނައިޓެޑަކީ ހާއްސަ ކްލަބުތައް. ހަގީގަތަކަށް ނުވިޔަސް، މި ފެންވަރުގެ ކްލަބަކުން ޝައުގުވެރިވާ ކަމަށް އަޑު ފެތުރުމަކީ ފަހުރެއް،" އޮނީލް ބުންޏެވެ.
އޮނީލް ވުލްވްސްގެ ކޯޗުކަމާ ހަވާލުވީ މި ސީޒަން ފެށެން ދެ ދުވަހަށްވެފައި ވަނިކޮށެވެ. ސްކޮޑު ވަރުގަދަ ކުރަން ބަޖެޓް ނުލިބުނު ނަމަވެސް، މި ސީޒަންގައި ވުލްވްސް އޮތީ ތާވަލްގެ ރަނގަޅު ހިސާބެއްގަ އެވެ.
