އިކުއެޑޯގެ އެންމެ ޒުވާން މޭޔަރު ބްރިޖިޓް ގާސިއާއަށް ބަޑިން ހަމަލާދީ މަރާލައިފި އެވެ.
އިކުއެޑޯގެ ފުލުހުން ބުނީ ގާސިއާގެ އިތުރުން އޭނާގެ މުވައްޒަފަކަށް ބަޑިން ހަމަލާދީ މަރާލާފައި އޮއްވާ ފެނުނީ ކާރެއްގެ ތެރެއިން ކަމަށެވެ.
ހަމަލާ ދިން މީހުން ވަނީ ގާސިއާ ކުއްޔަށް ނަގާފައިވާ ކާރުގެ ޖީޕީއެސް މެދުވެރިކޮށް ފާރަލާފައި ކަމަށާއި، ހަމަލާ ދީފައި ވަނީ ކާރުގެ އެތެރެއަށް ވަދެ ކަމަށް އިކުއެޑޯގެ ފުލުހުން ބުނެ އެވެ.
އުމުރުން 27 އަހަރުގެ ގާސިއާއަކީ އިކުއެޑޯގެ ސެން ވިންސެންޓް އަދި ޖައިރޯ ލޫރްގެ މޭޔަރެވެ. އަދި އޭނާއަކީ އިކުއެޑޯގެ ކުރީގެ ރައީސް ރަފައެލް ކޮރެއާގެ ސިޓިޒެން ރިވެލޫޝަނަރީ މޫވްމަންޓު ޕާޓީއަށް ނިސްބަތްވާ މީހެކެވެ.
މި ހަމަލާ އެ ޕާޓީން ވަނީ ކުށްވެރިކޮށް، ހަމަލާދިން މީހުން އިންސާފުގެ ކުރިމައްޗަށް ގެނައުމަށް ގޮވާލައިފަ އެވެ.
އިކުއެޑޯގައި މިފަދަ ހަމަލާތައް ފަހަކަށް އައިސް ވަނީ އިތުރުވެފަ އެވެ. އެގޮތުން މިދިޔަ އަހަރުގެ އޯގަސްޓު މަހު އެ ގައުމުގެ ރިޔާސީ އިންތިހާބުގައި ވާދަކުރާ ކެންޑިޑޭޓަކުވެސް މަރާލި އެވެ.
މީގެއިތުރުން މިދިޔަ ޖެނުއަރީ މަހު އިކުއެޑޯގެ ޓީވީ ސްޓޭޝަނަކަށް ހަމަލާ ދިނުމާ ގުޅިގެން، އެ ގައުމުގައި ކުއްލި ނުރައްކަލުގެ ހާލަތުވެސް ވަނީ އިއުލާން ކޮށްފަ އެވެ.
