މި މަހު 22 ވަނަ ދުވަހު ބާއްވަން މަސައްކަތް ކުރަމުން އަންނަ ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އިންތިހާބުގައި ވާދަކުރަން، އިޝްފާން މުހައްމަދު (އިއްޕަ) އާއި އަހުމަދު ޝިހާމް (ޕުޗު) ކެންޑިޑެސީ ފޯމު ހުށަހަޅައިފި އެވެ.
ބެޑްމިންޓަން އެސޯސިއޭޝަންގެ ހިންގުމުގައި (އަސާސީ ގަވާއިދުގައި) ހުރި ގިނަ މައްސަލަތަކެއް ފެންމަތިވެފައިވާއިރު، އެ އެސޯސިއޭޝަންގެ މިހާރުގެ ރައީސް މޫސާ ނާޝިދު (މޫސަ) އަށް ކޮޕަރްޝަންގެ ގިނަ ތުހުމަތުތަކެއް ވަނީ އަމާޒުކޮށްފަ އެވެ. މި ހުރި މައްސަލަތައް ރަނގަޅުނުކޮށް ބާއްވާ އިންތިހާބެއް ބަލައިނުގަންނާނެ ކަމަށް ކޮމިޝަނާ އޮފް ސްޕޯޓްސް، މުހައްމަދު ތޮލާލް ވަނީ ވިދާޅުވެފަ އެވެ.
އެކަމަކު، ބެޑްމިންޓަން އެސޯސިއޭޝަނުން އަންނަނީ އިންތިހާބުގެ މަސައްކަތް ކުރަމުންނެވެ.
ބެޑްމިންޓަނުގެ ރައީސްގެ މަގާމަށް އިތުރު ދައުރަކަށް، މޫސަ ކުރިމަތިލައްވާނެކަން މީޑިއާގައި ހާމަކުރައްވާފައި ނުވެ އެވެ. އެކަމަކު، މޫސަގެ ލީޑަޝިޕުގައި ހުރި މައްސަލަތައް ފާހަގަކޮށް، ބެޑްމިންޓަން އެސޯސިއޭޝަން ރިފޯމްކުރަން ޖެހޭ ކަމަށް ވަކާލާތު ކުރާ ޓީމަކުން ވަނީ ކެންޑިޑެސީ ހުށަހަޅައިފަ އެވެ.
އެ ޓީމުގެ ފަރާތުން، ކުރިއަށް އޮތް ބެޑްމިންޓަނުގެ އިންތިހާބުގައި ރައީސަކަށް ކުރިމަތިލާފައިވަނީ، އިޝްފާން އެވެ. އޭނާ އަކީ ހިނގަމުން މިދާ ދައުރުގައި ބެޑްމިންޓަން އެސޯސިއޭޝަންގެ ޖެނެރަލް ސެކްރެޓަރީގެ މަގާމު ފުރުއްވާފައިވާ ފަރާތެވެ. އިޝްފާން ވަނީ ދާދި ފަހުން މަގާމުން އިސްތިއުފާދިފަ އެވެ.
އިޝްފާންގެ ނައިބަކަށް ހުންނާނީ ކުޅަދާނަ އަމްޕަޔަރު ޝިހާމް އެވެ. ޝިހާމް އަކީ އޮލިމްޕިކްސް ގޭމްސް ހިމެނޭހެން ދުނިޔޭގެ ލެވަލްގެ ގިނަ މުބާރާތްތަކެއްގައި އިންސާފުކުރުމުގެ ފުރުސަތު ލިބިފައިވާ އަމްޕަޔަރެކެވެ. އެކަމަކު، ފަހަކަށް އައިސް ބެޑްމިންޓަން ރައީސް މޫސައާ އުފެދުނު ހިޔާލުތަފާތުވުންތަކެއްގެ މައްސަލައިގައި ޝިހާމް އަށް ބައިނަލްއަގުވާމީ ފުރުސަތުތައް ލިބިފައިނުވެ އެެވެ.
މި ޓީމުގައި ދެން ހިމެނެނީ، ކްލަބް މެމްބަރެއްގެ ގޮތުގައި އިބްރާހިމް ޒިޔާއު، އޮފިޝަލް މެމްބަރެއްގެ ގޮތުގައި މިންނަ ރަޝީދު، އިންޑިވިޖުއަލް މެމްބަރެއްގެ ގޮތުގައި އަހުމަދު ރިޔާޒު، ހަޒާންދާރަކަށް ޝިފާއު އަބްދުﷲ އަދި އަންހެން މެމްބަރަަކަށް އައިޝަތު ޔުމްނާ އެވެ.
އައްޑޫ އިކުއޭޓްރަލް ވިލެޖުގައި ބާއްވަން ނިންމާފައި އޮތް، ބީއޭއެމްގެ އިންތިހާބުގައި ވޯޓު ލެވޭ ފަރާތްތަކުގެ ލިސްޓަށް ޝަކުވާ ހުށަހެޅުމުގެ ފުރުސަތު ވަނީ ހުޅުވާލައިފަ އެވެ. އިންތިހާބުގެ ވޯޓު ލެވޭ މީހުންގެ ލިސްޓާ ބެހޭގޮތުން އެއްވެސް ޝަކުވާއެއް ހުށަހަޅަން ބޭނުންނަމަ އެ ކަމެއް ލިޔުމުން 18 މާރިޗު 2024 ވާ ހޯމަ ދުވަހު (މާދަމާ)ގެ 12:00 ގެ ކުރިން މި އެސޯސިއޭޝަނަށް ގޮސް ހުށަހެޅުމެއް، އެ ޖަމިއްޔާ އިން ވަނީ އެދިފަ އެވެ.
