ބޯންމައުތު (މާޗު 14) - ބުދަ ދުވަހުގެ ރޭ ޗެމްޕިއަންސް ލީގުގެ މެޗުތައް ކުރިއަށް ދިޔަ ވަގުތު، އިނގިރޭސި ޕްރިމިއާ ލީގުގައި ބޯންމައުތާއި ލޫޓަން ޓައުންގެ ކުރިމަތިލުމެއް ވެސް ކުރިއަށްދިޔަ އެވެ. އެކަމަކު، ރޭ ބޮޑު ސަމާލުކަމެއް އޮތީ ޗެމްޕިއަންސް ލީގަށެެވެ. ޕްރިމިއާ ލީގުގެ މެޗަށް މާ ބޮޑު ސަމާލުކަމެއް ނުލިބެއެވެ.
ރޭ ބޯންމައުތާއި ލޫޓަން ބައްދަލުކުރި މެޗު ވެގެންދިޔައީ، އިނގިރޭސި ޕްރިމިއާ ލީގުގެ ތާރީހުގައިވެސް އެންމެ އާދަޔާހިލާފު އެއް މެޗަށެވެ.
ބޯންމައުތުގެ ދަނޑުގައި ރޭ ކުޅުނު މެޗުގެ ފުރަތަމަ ހާފު ލޫޓަން އިން ނިންމާލީ 3-0 ގެ އިން ކުރި ހޯދައިގެނެވެ. އެކަމަކު، އަމިއްލަ ދަނޑުގައި ކުޅުނު މެޗުގެ ދެ ވަނަ ހާފުގައި ބޯންމައުތުން ވަނީ ހަތަރު ލަނޑު ޖަހައި، 4-3 އިން މެޗު ކާމިޔާބުކޮށްފަ އެވެ.
މެޗުގެ ފުރަތަމަ ހާފުގައި ޓާހިތު ޗޮންގާއި ޗެއިޑޯޒީ އޮގްބެނޭ އަދި ރޮަސް ބާކްލީ ޖެހި ލަނޑުތަކާ އެކު، ލޫޓާން ފުރަތަމަ ހާފު ނިންމާލީ ބޮޑު ލީޑަކާ އެކު އެވެ.
އެކަމަކު، ދެ ވަނަ ހާފުގެ ފަސް ވަނަ މިނިޓުގައި ބޯންމައުތުގެ ޑޮމިނިކް ސޮލަންކޭ ލަނޑު ޖެހުމާ އެކު، މެޗުގެ އޮއިވަރު ބޯންމަތުގެ ކޮޅަށް އެނބުރުނެވެ.
މެޗުގެ 62 ވަނަ މިނިޓުގައި ބޯންމައުތުގެ ދެ ވަނަ ލަނޑު ޖެހީ އިލިއާ ޒަބަރްނީ އެވެ. އަދި އޭގެ ދެ މިނިޓު ފަހުން ބޯންމައުތުން މެޗުގެ ނަތީޖާ އެއްވަރުކުރީ އެންޓޮއީން ސެމެންޔޯ ޖެހި ލަނޑުންނެވެ.
މެޗުގެ 83 ވަނަ މިނިޓުގައި ބޯންމައުތުގެ ހަތަރު ވަނަ ލަނޑު ވެސް ޖެހީ ސެމެންޔޯ އެވެ.
މި މެޗުން ބޯންމައުތަށް ލިބުނީ މުހިންމު މޮޅެކެވެ. ލީގު ތާވަލްގެ 14 ވަނައިގައި އޮތް ބޯންމައުތު މިހާރު ވަނީ ރެލިގޭޝަން ޒޯނުން 14 ޕޮއިންޓް ފެޔަށް ޖެހިލައިފަ އެވެ. ލީގުގައި ބާކީ ދެން އޮތީ 10 މެޗެވެ.
މެޗަށް ފަހު ވާހަކަދައްކަމުން ބޯންމައުތުގެ ކޯޗު އަންޑޯނީ އިރައޯލާ ބުނީ އެ ޓީމު ކޮޅަށް މެޗު އެނބުރުމުގެ އެންމެ ބޮޑު ސަބަބަކީ ދެ ވަނަ ހާފުގެ ކުރީކޮޅު ސޮލަންކޭ ޖެހި ލަނޑު ކަމަށެވެ.
"ސޮލަންކޭ ޖެހި ގޯލާހެދި މުޅި މެޗު ބަދަލުވީ. އެ ލަނޑާއެކު ކުޅުންތެރިންގެ އިތުބާރު ބޮޑުވި. އެ ހިސާބުން ޕްރެޝަރު ބޮޑުކޮށް، ނަތީޖާ ބަދަލުކޮށްލީ،" އިރައޯލާ ބުންޏެވެ.
ރެ،ލިގޭޝަނުން ސަލާމަތްވުމަށް މަސައްކަތް ކުރަމުންދާ ލޫޓަން އޮތީ ތާވަލްގެ 18 ވަނައިގަ އެވެ.
