ކުރިއަށް އޮތް ރައްޔިތުންގެ މަޖިލިސް އިންތިހާބުގައި 'ސަރުކާރުގެ' ކެންޑިޑޭޓުންނަކީ ކޮބައިކަން ރައީސް ޑރ. މުހައްމަދު މުއިއްޒަށް ވެސް ވަކިވެވަޑައިގަންނަވާހެން ހީނުވާ ކަމަށް އިދިކޮޅު އެމްޑީޕީން މިރޭ ބުނެފި އެވެ.
އެމްޑީޕީގެ މަޖިލިސް ކެމްޕޭނުގެ އަދާހަމަ ހިއްސާކުރުމަށް މިރޭ ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ކެމްޕޭނުގެ ތަރުޖަމާނު ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވީ، މަޖިލިސް އިންތިހާބުގައި އެއް ދާއިރާއަކުން ސަރުކާރުގެ ކެންޑިޑޭޓުން ކަމަށް ބުނާ އެތައް ބަޔަކު ވާދަކުރާ މަންޒަރު ފެންނަމުންދާ ކަމަށެވެ.
އެގޮތުން، ޕީއެންސީއިން ޖެނުއަރީ މަހު ބޭއްވި ޕްރައިމަރީ ކާމިޔާބު ކުރި ފަރާތްތަކާއި އިސް ވަޒީރު އަބްދުއްރަހީމް އަބްދުﷲ ގެ ކެންޑިޑޭޓުންނާއި ރައީސް މުއިއްޒުގެ ކެންޑިޑޭޓުން އަދި މިހާރު ޕީއެންސީ ކޯލިޝަނުން ވަކިވެވަޑައިގެންފައިވާ ކުރީގެ ރައީސް އަބްދުﷲ ޔާމީނުގެ ކެންޑިޑޭޓުން ފެންނަ ކަމަށް އީސާ ތުހުމަތު ކުރެއްވި އެވެ.
"ތިމަންނަ މީ ސަރުކާރުގެ ކެންޑިޑޭޓޭ ކިޔާފަ ތިބި ފަސް ވަރަކަށް ކެންޑިޑޭޓުން ތިބި ދާއިރާތައް އެބަހުރި، ކޮންމެ ކެންޑިޑޭޓަކު އެ ކެންޑިޑޭޓުގެ ޕޯސްޓަރުގަ ރައީސް ފޮޓޯވެސް އިނދޭ"
"އަޅުގަނޑުމެންނަށް ކިހިނެތް ޔަގީން ކުރެވޭނީ ޕީޕީއެމް / ޕީއެންސީގެ ކެންޑިޑޭޓަކީ ސަރުކާރު ކެންޑިޑޭޓަކީ ކޮބައިކަން، ރައީސުލްޖުމްހުރިއްޔާއަށްވެސް ސަރުކާރު ކެންޑިޑޭޓު ވަކިވާހެނެއް އަޅުގަނޑުމެންނަކަށް ހިއެއް ނުވޭ"
އީސާ ވިދާޅުވީ ސަރުކާރު ކެންޑިޑޭޓުން ސާފުކުރުމުގެ ސުވާލަށް ރައީސަށްވެސް ޖަވާބު ދެވޭނެހެން ހީނުވާ ކަމަށެވެ.
އޭނާ މިހެން ވިދާޅުވިއިރު ސަރުކާރު ކެންޑިޑޭޓުން ވަކިނުވާ މައްސަލާގައި ސީދާ ރައީސްއާ ސުވާލު ކުރެވޭގޮތަށް ފެބްރުއަރީ 24، ގައި ބޭއްވި 'އަހާ' ޕަބްލިކް ފޯރަމްގައި މީހަކު ވަނީ ސުވާލުކޮށްފަ އެވެ. ނަމަވެސް އެރޭ ރައީސް އެ ސުވާލަށް ޖަވާބެއް ނުދެއްވި އެވެ.
"ޕާޓީ ނުވަތަ ސަރުކާރަށް ނިސްބަތް ނުވާ އެހެން ކެންޑިޑޭޓަކު ރައީސްގެ ފޮޓޯ ޖައްސަވައިގެން ރައީސްގެ ފުރިހަމަ ތާއިދު އޮތް ކަމަށް މެންބަރުންނަށާއި ރައްޔިތުންނަށް އަންގަމުން ދާތީ, ތިން ރަށުގެ މީހުންގެ މިހަކާ މެދު ހިޔާލު ތަފާތުވުމާއި ނުތަނަވަސްކަމާ އެބަ އޮތް. މިކަމާ މެދު ރައީސް ދެކެވަޑައިގަންނަވަނީ ކިހިނެތްތޯ" އެ ރޭގެ ފޯރަމުގައި ޒުވާނަކު ސުވާލު ކުރި އެވެ.
ޕްރައިމަރީން ހޮވި ކެންޑިޑޭޓަށް ސަރުކާރުގެ އެއްބާރުލުން ލިބޭނެތޯ ވެސް ސުވާލުކޮށްފަ އެވެ.
ނަމަވެސް އެއީ ޕާޓީގެ އެތެރޭގެ އަދި ރޭގެ މައުލޫއާ ނުގުޅޭ ކަމަކަަށް ވާތީ ޖަވާބު ދެއްވުމަށް ރައީސް އުޒުރުވެރިވެވަޑައިގެންނެވި އެވެ.
"މިރޭގެ މި ފޯރަމްގެ މައިގަނޑު މައުލޫއާ ނުގުޅާ, ޕާޓީގެ އެތެރޭގެ ކަމެއް ވީމަ ތި ކޭސް ވަކިން އަޅުގަނޑާ ހިއްސާ ކޮށްލަ ދިނިއްޔާ ވަރަށް ރަނގަޅު" ރައީސް ވިދާޅުވި އެވެ.
ސަރުކާރު ކެންޑިޑޭޓުން ވަކިނުވެގެން ރައީސްއާ ސުވާލުކުރި އިރު, ޕީއެންސީގެ ޓިކެޓު ކާމިޔާބުކުރި ކެންޑިޑޭޓުން ތިއްބާ, ރައީސްގެ ކެންޑިޑޭޓުންގެ ގޮތުގައި އިތުރު ކެންޑިޑޭޓުންތަކެއް ބައެއް ދާއިރާތަކަށް ނިކުންނަ ކަމުގެ ކަންބޮޑުވުން އޮތީ އިތުރުވެފަ އެވެ.
އެގޮތުން ގދ. ގައްދޫ ދާއިރާ، ތ. ތިމަރަފުށި ދާއިރާ، ގއ. ވިލިނގިލިި ދާއިރާ، ނ. ވެލިދޫ ދާއިރާ، ކ. ހުރާ ދާއިރާގެ އިތުރުން އެހެން ދާއިރާތަކުގައިވެސް ޕްރައިމަރީ ކާމިޔާބު ކުރި ކެންޑިޑޭޓުގެ ބަދަލުގައި ސަރުކާރުގެ އިސްވެރިން އަންނަނީ އެހެން ކެންޑިޑޭޓުންނަށް ތާއީދު އޮތްކަން ހާމަކުރަމުންނެވެ.
