ލަންޑަން (މާޗު 12) - އިނގިރޭސި ޕްރިމިއާ ލީގުގައި މިހާރު އަމަލުކުރަމުންދާ މާލީ ގަވައިދުތައް ބަދަލުކުރަން ހުށަހަޅައިފި އެވެ.
މިހާރު ޕްރިމިއާ ލީގުގައި އަމަލުކުރަމުންދާ ޕްރޮފިޓަބިލިޓީ އެންޑް ސަސްޓެއިނަބިލިޓީ ރޫލްސް (ޕީއެސްއާރް)ގެ ބަދަލުގައި، ޔުއެފާގެ ފައިނޭންޝަލް ސަސްޓެއިނަބިލިޓީ ރެގިއުލޭޝަންސް (އެފްއެސްއާރް) އާ އެއްގޮތް މާލީ ގަވައިދުތަކެއް ޕްރިމިއާ ލީގުން ވަނީ މިހާރު އެކުލަވާލައިފައެވެ.
ޔުއޭފާ މާލީ ގަވައިދުގެ ދަށުން ކުޅުންތެރިންގެ މުސާރަ އާއި ޓްރާންސްފާ ފީތަކާއި ސްކޮޑާ ގުޅުންހުރި ހަރަދުތަކަށް ޔޫރަޕްގެ މުބާރާތުގައި ވާދަކުރާ ކްލަބަކަށް ހޭދަކުރެވޭނީ އެ ކްލަބުގެ އާމްދަނީގެ 70 ޕަސެންޓާ ހަމައަށެވެ.
ޕްރިމިއާ ލީގުން މިހާރު ބަލަމުންދަނީ އާ ގަވައިދުގެ ދަށުން ކްލަބުތަކަށް ލިބޭ އާމްދަނީ 85 ޕަސެންޓާ ހަމައަށް ސްކޮޑުގެ ހަރަދުތަކަށް ހޭދަކުރެވޭނެ ގޮތް ހެދުމަށެވެ. އަދި މި ގަވައިދަ ހިލާފުވާ ކްލަބުތަކަށް އަޅާނެ ފިޔަވަޅުތައްވެސް ގަވައިދުގައި ހިމަނާނެއެވެ.
"ޕްރިމިއާ ލީގުގެ މާލީ ގަވައިދުތައް ބަދަލުކޮށް ކުރިއަށްވުރެ ރަނގަޅު މާލީ ގަވައިދުތަކެއް ހެދުމަށް ޝެއާ ހޯލްޑަރުންގެ ބައްދަލުވުމެއްގައި ކްލަބުތަކުން ވަނީ އެއްބަސްވެފައި،" ޕްރިމިއާ ލީގުން ނެރުނު ބަޔާނެއްގައި ބުނެފައިވެއެވެ.
އެހެންނަމަވެސް، ޖޫން މަހު އޮންނަ ޕްރިމިއާ ލީގުގެ އަހަރީ އާންމު ޖަލްސާގައި އާ މާލީ ގަވައިދު ފާސްކުރާނެކަމުގެ ޔަގީންކަމެއް އަދި ނެތެވެ.
މި ގަވައިދު ބަދަލުކުރިޔަސް، މާލީ ގަވައިދާ ހިލާފުވެގެން ޕްރިމިއާ ލީގުގެ އެވަޓަން އާއި މެންޗެސްޓާ ސިޓީ އަދި ނޮޓިންގްހަމް ފޮރެސްޓާ ދެކޮޅަށް ކުރިއަށް ގެންދާ މައްސަލަތަކަށް ބަދަލެއް ނާންނާނެއެވެ. އެ ތިން ކްލަބުގެ މައްސަލަވެސް ބަލާނީ ކުރީގެ ގަވައިދާ އެއްގޮތަށެވެ.
ޕްރިމިއާ ލީގުގެ މާލީ ގަވައިދުތަކާ ހިލާފުވެގެން އެވަޓަން އަށް ވަނީ އެންމެ ފުރަތަމަ 10 ޕޮއިންޓް އުނިކުރުމުގެ އަދަބެއް ދީފައެވެ. އެކަމަކު އެ ކްލަބުން އެޕީލްކުރުމުން، އެ އަދަބު ވަނީ ހަ ޕޮއިންޓަށް ކުޑަކޮށްފައެވެ.
އެކަމަކު އެވަޓަން މާލީ ގަވައިދާ ހިލާފުވި އިތުރު މައްސަލައެއް މިހާރު ދަނީ ބަލަމުންނެވެ. އަދި ނޮޓިންހަމް ފޮރެސްޓްގެ މައްސަލައެއްވެސް ދަނީ ބަލަމުންނެވެ.
މީގެ އިތުރުން، މެންޗެސްޓާ ސިޓީން ގަވައިދާ ހިލާފުވެފައިވާ މައްސަލައެއްވެސް ދަނީ ބަލަމުންނެވެ.
