މެންޗެސްޓާ (މާޗު 9) - މެޗުގެ ފުރަތަމަ ހާފުގައި ލިބުނު ދެ ޕެނަލްޓީން ކެޕްޓަން ބްރޫނޯ ފެނާންޑޭސް އާއި މާކަސް ރެޝްފޯޑް ކާމިޔާބުކުރި ދެ ލަނޑާއެކު، އިނގިރޭސި ޕްރިމިއާ ލީގުގައި މިރޭ އެވަޓަން އަތުން 2-0 އިން ޔުނައިޓެޑް މޮޅުވެއްޖެ އެވެ.
ލީގުގައި އެންމެ ފަހުން ކުޅުނު ދެ މެޗުން ބަލިވެފައި އޮތުމުން، އަމިއްލަ ދަނޑުގައި މިރޭ އެވަޓަން އަތުން މޮޅުވާން ޔުނައިޓެޑަށް އޮތީ ވަރަށް މުހިންމުވެފަ އެވެ.
އަމިއްލަ ސަޕޯޓަރުން ކުރިމަތީ ޔުނައިޓެޑް މޮޅުވީ މެޗުގެ ފުރަތަމަ ހާފުގައި އެ ޓީމުގެ ފޯވަޑް އަލަހަންދުރޯ ގާނާޗޯ ހޯދި ދެ ޕެނަލްޓީންނެވެ. ފުރަތަމަ ޕެނަލްޓޯ ކާމިޔާބުކުރީ ފެނާންޑޭސް އެވެ. ދެ ވަނަ ޕެނަލްޓީ ކާމިޔާބުކުރީ ރެޝްފޯޑް އެވެ.
މި މެޗުގައި އެވަޓަން އިން ޔުނައިޓެޑް ގޯލަށް 20 ހަމަލާ ފޮނުވާލި އެވެ. އެކަމަކު ލިބުނު ފުރުސަތުގެ ބޭނުން ނުހިފުމުގެ ނަތީޖާ އަކީ އެ ޓީމުގެ ދަށް ފޯމު ބަދަލު ނުކުރުމެވެ. އެންމެ ފަހުން ކުޅުނު 11 މެޗުން އެވަޓަން އަށް ލިބިފައިވަނީ އެންމެ ފަސް ޕޮއިންޓެވެ.
ޔުނައިޓެޑް މި ވަގުތު އޮތީ ތާވަލްގެ ހަ ވަނައިގަ އެވެ. ގަދަ ހަތަރެއްގެ ޖާގައެއް ހޯދަން ޔުނައިޓެޑަށް މިހާރު އޮތީ ފަސޭހަ މަގެއް ނޫނެވެ.
ލީގުގައި މިރޭ ފުލަމް އަތުން ވުލްވްސް މޮޅުވީ 2-1 އިންނެވެ. ބޯންމައުތާއި ޝެފީލްޑް ޔުނައިޓެޑް ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ.
