މަޖިލިސް މެންބަރެއްގެ ގޮތުގައި މިއަދު ވެސް ހުންނެވި ނަމަ މަޖިލިސް މެންބަރެއްގެ "ދަތްދޮޅި ދުއްވައި ނުލައި" ހުރެވިދާނެތޯ ސުވާލު އުފައްދަވައި ލޯކަލް ގަވަމަންޓު މިނިސްޓަރު، އާދަމް ޝަރީފް ދެއްކެވި ވާހަކައިން ދޭހަވީ މި ސަރުކާރުގެ އަނިޔާވެރިކަމާއި ހުދުމުހުތާރު ވިސްނުން ކަމަށް އިދިކޮޅު އެމްޑީޕީގެ މަޖިލިސް ކެމްޕޭނުގެ ތަރުޖަމާނު، އަހުމަދު އީސާ ވިދާޅުވެއްޖެ އެވެ.
ރާއްޖޭގެ ރަށްތަކަށް ރައީސް ޑރ. މުހައްމަދު މުއިއްޒު ކުރައްވަމުން ގެންދަވާ ދަތުރުފުޅުގައި މިއަދު މ. ދިއްގަރަށް ވަޑައިގެން، އެރަށު ރައްޔިތުންނާ ބައްދަލު ކުރައްވައި ދެއްކެވި ވާހަކައިގައި އާދަމް ޝަރީފް ވިދާޅުވީ ރައީސް މުއިއްޒުގެ ގާނޫނީ ޒިންމާ އަދާ ކުރެއްވުމަށް އޮތް އެންމެ ބޮޑު ހުރަހަކީ މަޖިލިސް ކަމަށާއި މަޖިލީހުގައި މިއަދު ހުންނެވި ނަމަ މަޖިލިސް މެންބަރެއްގެ ދަތްދޮޅި ދުއްވާނުލައި ހުރެވޭނެތޯ ސުވާލު އުފެދޭ ކަމަށެވެ.
އެ ވާހަކައާ ގުޅިގެން ކަންބޮޑުވުން ފާޅު ކުރައްވައި "އަދަދު" ނޫހާ ވާހަކަ ދައްކަވަމުން އީސާ ވިދާޅުވީ ދައުލަތުގެ ވަޒީރުން އެކަހަލަ ހަރުކަށި ބަސްތައް ބޭނުން ކުރުމުން އެނގޭ އެއްޗަކީ މި ސަރުކާރުގެ އަނިޔާވެރި ވިސްނުން ކަމަށާއި ވެރިކަން ކުރުމުގައި އަމަލު ކުރާނެ ހަރުކަށި ގޮތުގެ ވިސްނުން ކަމަށެވެ.
"އޭގެ އާހިރު ނަތީޖާއަކަށް ވާނީ ދިވެހިރާއްޖެ ހަމަ ސީދާ ހުދުމުހުތާރު ވެރިކަމަކާ ދިމާލަށް ގޮސް ރައްޔިތުންނަށް ވަރަށް އަނިޔާވެރި ވެރިކަމެއް ކުރައްވާނެ ސަރުކާރަކަށް މި ސަރުކާރު ވުން،" ކެނދިކުޅުދޫ ދާއިރާގެ މެންބަރުކަން ވެސް ކުރައްވާ އީސާ ވިދާޅުވި އެވެ.
މަޖިލިސް މެންބަރުންގެ "ދަތްދޮޅި ދުއްވާނުލައި" ހުރެވިދާނެތޯ ސުވާލު އުފައްދަވައި އާދަމް ޝަރީފް ވާހަކަދެއްކެވިއިރު، މީގެ ކުރިން ޕީޕީއެމްގެ ފުރަތަމަ ވެރިކަމުގައި، ޑިފެންސް މިނިސްޓަރެއްގެ ގޮތުގައި ޝަރީފް ހުންނެވިއިރު، ސިފައިންގެ އެތެރޭގެ ޖަލްސާއެއްގައި ވާހަކަ ދައްކަވަމުން ވެސް މަޖިލިސް މެމްބަރެއްގެ ދަތްދޮޅި ދުއްވާލެވިދާނެ ކަމަށް ވިދާޅުވެ ވާހަކަދެއްކެވި އެވެ. އެ ވާހަކައާ ގުޅިގެން އޭރު ޝަރީފް ވަރަށް ބޮޑަށް ހޫނުފެނަށް ވެއްޓުނެވެ.
އީސާ ވިދާޅުވީ ސަރުކާރުގެ ވަޒީރަކު އެ މޭރުމުން މި ދަނޑިވަޅުގައި ވާހަކަ ދެއްކެވުމުގެ މާނައަކީ ކުރިއަށް އަންނަން އޮތް ދުވަސްތަކުގެ ނާމާންކަން ކަމަށާއި އެކަމާ ރައްޔިތުން ވަރަށް ބޮޑަށް ވިސްނަންޖެހޭ ކަމެއް ކަމަށެވެ.
"އެ ވިދާޅުވި ބަހުން ސާފުވާ ކަމަކީ، ހާއްސަކޮށް ކުރިއަށް މިއޮތް މަޖިލިސް އިންތިހާބުގެ މެޖޯރިޓީ މި ސަރުކާރަށް ލިބިއްޖެއްޔާ ކުރިއަށް އޮތް ފަސް އަހަރަކީ މި ރާއްޖެ ދުވަހަކު ނުދެކޭވަރުގެ އަނިިޔާވެރި ހުދުމުހުތާރު ފަސް އަހަރަށޭ ވެގެން ދާނީ، ދިވެހިރާއްޖޭގެ ރައްޔިތުން ވަރަށް ބޮޑަށް ވިސްނަންޖެހޭ ކަމެއް މިއީ،" އީސާ ވިދާޅުވި އެވެ.
"ރައްޔިތުންގެ މަޖިލީހުގެ މެޖޯރިޓީ އެއްގޮތަކަށް ވެސް، އެއްގޮތަކަށް ވެސް ހެޔޮ ވެސް ނުވާނެޔޭ މި ސަރުކާރަށް ދޭން، މި ސަރުކާރުގެ ވަޒީރުން އެތިބީ ހަމަ ސީދާ ހުދުމުހުތާރު އަނިޔާވެރި ވިސްނުމުގައޭ، އެ ބޭފުޅުންނަށް އެކަން ކުރާނެ ފުރުސަތު ނެތިގެން އެ އުޅެނީ ރައްޔިތުންގެ މަޖިލީހުގެ މެޖޯރިޓީ ނުލިބިގެންނޭ، ލިބޭއިރަށް އެ ބޭފުޅުން އެކަން ކުރާނެ."
މަޖިލިސް މެންބަރުންގެ "ދަތްދޮޅި ދުއްވާނުލައި" ހުރެވިދާނެތޯ ސުވާލު އުފައްދަވައި އާދަމް ޝަރީފު ވާހަކަ ދެއްކެވީ ރައީސް އައްޔަން ކުރެއްވި ބައެއް ވަޒީރުންނަށް މަޖިލީހުން ރުހުން ނުދިނުމުންނާއި ފުށިދިއްގަރު ފަޅު ހިއްކުމަށް ބޭނުންވާ ފައިސާ ބަޖެޓުން އުނި ކުރުމާ ގުޅުވަ އެވެ.
ރައީސް މުއިއްޒު ވެރިކަމަށް ވަޑައިގެން، ވަޒީރުންގެ ގޮތުގައި އައްޔަން ކުރެއްވި ބޭފުޅުންގެ ތެރެއިން މަޖިލީހުން ރުހުން ނުދިނީ ބަންޑާރަ ނައިބު، އަހުމަދު އުޝާމްއާއި އިސްލާމިކް މިނިސްޓަރު، މުހައްމަދު ޝަހީމް އަލީ ސައީދުއާއި ހައުސިން މިނިސްޓަރު، ޑރ. އަލީ ހައިދަރު އަށެވެ.
ނަމަވެސް ސަރުކާރުން ވަނީ އެ ތިން ބޭފުޅުން އަލުން އެ މަގާމުތަކަށް އައްޔަން ކުރައްވައިފަ އެވެ.
