މީގެ ތިން އަހަރެއްހާ ދުވަސް ކުރިން ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާގެ މައްސަލައިގައި ކްރިމިނަލް ކޯޓުގައި މިހާރު ހިނގަމުންދާ ޝަރީއަތުގެ ތެރެއިން، ސިއްރު ހެކިވެރިއެއްގެ ހެކިބަސް ނެގުމަށް ބޭއްވި އަޑުއެހުމެއް މީޑިއާ ނުވަދެވޭ ގޮތަށް ސިއްރުކޮށްފި އެވެ.
މަޖިލީހުގެ ރައީސަކަށް ނަޝީދު ހުންނަވަނިކޮށް، އެމަނިކުފާނު އަވަހާރަކޮށްލަން ސައިކަލެއްގައި ބޮމެއް ހަރުކޮށްގެން ގޮއްވާލި މައްސަލާގައި މިހާރު ޝަރީއަތް ކުރިއަށް ދަނީ، ޓެރަރިޒަމްގެ އެކި ދައުވާ އުފުލިފައިވާ ތަހުމީން އަހުމަދާއި، މުޖާޒް އަހްމަދާއި، އަލީ ހައިޝަމާއި، މުހައްމަދު ނާޒިމާއި، އިސްހާގައި، ފަހުމީ އަލީގެ ބައެވެ.
މިއަދު ހެނދުނު 9:00 ޖަހާއިރަށް އަޑުއެހުމެއް ތާވަލުކޮށްފައިވާއިރު، ކްރިމިނަލް ކޯޓުގެ ޝެޑިއުލްގައި ބުނެފައިވަނީ އެ އަޑުއެހުން ގެންދަނީ ސިއްރުން ކަމަށެވެ.
ކްރިމިނަލް ކޯޓުގައި ސުވާލު ކުރުމުން، އެ ކޯޓުގެ މީޑިއާ އޮފިޝަލް ބުނީ އަޑުއެހުން ސިއްރު ކުރީ ދައުލަތުން އެދިގެން ކަމަށެވެ. ދައުލަތް ތަމްސީލްކުރާ ޕްރޮސިކިއުޓާ ޖެނެރަލްގެ އޮފީހުން އެ ގޮތަށް އެދުނީ، ހެކިވެރިއެއްގެ ހެކިބަހުގައި ގައުމީ ސަލާމަތާ ގުޅުން ހުރި ބައެއް ކަންކަން ވެސް ހިމެނޭތީ ކަމަށް ބުނެ އެވެ.
މިއަދުގެ އަޑުއެހުމުގައި އޮތީ އެންމެ ހެކިވެރިއެއްގެ ހެކިބަސް ނެގުމެވެ. އެއީ ދިފާއަށް ވެސް ވަނަވަރު އާންމުކޮށްފައިނުވާ ސިއްރު ހެކިވެރިއެކެވެ. މިފަދަ ހެކިވެރިންގެ ހެކިބަސް ނަގާ އަޑުއެހުންތަކަށް، އާންމު އުސޫލުން، ނަން ނޯޓުކޮށްގެން ނޫސްވެރިންނާއި އާންމުންނަށް ވެސް ވަދެވެ އެވެ.
މައްސަލައިގެ ފަސްފަހަތް
ފަހުމީއަށް ތުހުމަތު ކުރެވެނީ ގޮއްވާލި ސައިކަލުގައި ބޮން ހަރުކުރި ވަގުތު ފާރައަށް ހުރި ކަމަށެވެ. ނާޒިމަށް ތުހުމަތު ކުރެވެނީ ބޮން ގޮއްވި އަދުހަމް އަހުމަދަށް ބޮން ގޮއްވަން ބޭނުން ކުރި ރިމޯޓު ދިން ކަމަށެވެ. އަދި އިސްހާގަށް ތުހުމަތު ކުރެވެނީ އެކި ފަހަރުމަތިން ނަޝީދަށް ފާރަލި ކަމަށެވެ.
މުޖާޒްގެ މައްޗަށް ދައުވާ ކުރަނީ އައިއީޑީ ގޮއްވާލުމަށްފަހު އަދުހަމް ފިލުވަން މަސައްކަތް ކުރިކަމަށް ތުހުމަތުކޮށެވެ. އަދި ތަހުމީނުގެ މައްޗަށް ގޮވާތަކެތި އެހެން ތަނަކަށް ގެންދިއުމަށް އެހީތެރިވެދިން ކަމެވެ.
އަތަމާ ޕެލަސް އިމާރާތުގެ އެތެރޭގަ ހުރެ ރިމޯޓެއް ބޭނުންކޮށްގެން ބޮން ގޮއްވާލި މައްސަލާގައި ނުވަ މީހަކަށް ދައުވާ އުފުލާފައި ވާއިރު މިހާތަނަށް ހުކުމަކާ ހަމައަށް ވާސިލްވެފައި ވަނީ އަދުހަމަށް ކުރި ދައުވާތަކުގަ އެވެ. އޭނާގެ މައްސަލަ އަވަސް ނިޔާއެއްގެ ގޮތުގައި ގެންގޮސް, ހުކުމް އަވަހަށް އިއްވީ ކުށަށް އިއުތިރާފުވުމުންނެވެ.
މެއި 6، 2021 ގެ، ރޭ ހިންގި ޓެރަރިޒަމް އަމަލާ ގުޅިގެން ހައްޔަރު ކުރި މީހުންގެ ތެރެއިން މުހައްމަދު ތަސްލީމާއި، އަލި މަނިކުގެ މައްޗަށް އުފުލީ ޓެރަރިޒަމް ޖަމާއަތަކަށް ތާއީދު ކުރުމުގެ ދައުވާ އެވެ. ހަމަލާއާ ގުޅޭ އެއްވެސް ދައުވާއެއް އަދި އުފުލާފައި ނެތް އިރު، ދައުލަތުން ބުނަނީ ހެކި ލިބުނު މިންވަރަކުން އެ މީހުންގެ މައްޗަށް ވެސް އަދި ދައުވާ ކުރެވެން ފުރުސަތު އެބަ އޮތް ކަމަށެވެ.
އަލިމަނިކުގެ މައްޗަށް ކުށް ސާބިތުވެ ފަސް އަހަރު ދުވަހަށް ޖަލަށް ލުމަށް ހުކުމް އިއްވި ނަމަވެސް ތަސްލީމުގެ މައްޗަށް ކުށް ސާބިތެއް ނުވެ އެވެ. ތަސްލީމަށް ކުށް ސާބިތުނުވި ހުކުމް ވަނީ ހައި ކޯޓުގައި އިސްތިއުނާފުކޮށްފަ އެވެ. ހައި ކޯޓުގައި އަދި އެ މައްސަލައިގެ ޝަރީއަތް ނުފަށަ އެވެ.
ހަމަލާގެ މައްސަލާގައި ޕްރޮސެކިއުޓާ ޖެނެރަލް އޮފީހުން ދައުވާ ނުކުރަން ނިންމީ އަހުމަދު ފާތިހުގެ މައްޗަށެވެ. އެއީ އޭނާގެ މައްޗަށް ކުށް ސާބިތުކުރެވޭ ވަރަށް ހެކި ނެތުމުން ކަމަށް އެ އޮފީހުން ބުނެ އެވެ.
މިއީ ރާއްޖޭގައި މިހާތަނަށް ގޮއްވާލި އެންމެ ބާރުގަދަ އައިއީޑީ ކަމަށް ރަސްމީ އިދާރާތަކުން ބުނާއިރު، މި ބޮން ހަދާފައި ވަނީ ބާޒާރުން އާންމުކޮށް ލިބެން ހުރި ބާވަތްތައް ބޭނުންކޮށްގެންނެވެ. އޭގެއިން ދޭ ގެއްލުން ބޮޑުކުރަން އަޅާފައި ހުރީ ރޭޒާ ފުއްތަކެކެވެ.
