ލިވަޕޫލް (ފެބްރުއަރީ 22) - އިނގިރޭސި ޕްރިމިއާ ލީގުގައި ރޭ ފަހަތުން އަރައި 4-1 އިން ލޫޓަން ޓައުން ބަލިކޮށް ލިވަޕޫލުން ލީގުގެ އެއް ވަނައިގައި އަލުން ލީޑުނަގައިފި އެވެ.
މި މޮޅާ އެކު ލިވަޕޫލް އެއް ވަނައިގައި އޮތީ، 26 މެޗުން 60 ޕޮއިންޓް ހޯދައިގެންނެވެ. ދެ ވަނައިގައި އޮތް މެންޗެސްޓާ ސިޓީ އަށް 25 މެޗުން 56 ޕޮއިންޓް ލިބިފައިވާއިރު، ތިން ވަނައިގައި އޮތް އާސެނަލަށް ވަނީ 25 މެޗުން 55 ޕޮއިންޓް ލިބިފަ އެވެ.
އަނިޔާގެ މައްސަލަތަކުގެ ސަބަބުން 10 ކުޅުންތެރިން ނުލައި ރޭގެ މެޗު ކުޅެން ޖެހުނު ލިވަޕޫލުން މެޗު ފަށަން ޖެހުނީ ވެސް އުނދަގޫ ފައްތަރެއްގަ އެވެ. އެ ގޮތުން، މެޗުގެ 12 ވަނަ މިނިޓްގައި ލޫޓަންގެ ޗިއޮޑޯޒީ އޮގްބޭނޭ ބޮލުން ގޯލެއް ޖަހައި އެ ޓީމަށް ލީޑުނަގައިދިނެވެ. އެ ލީޑުގައި އޮވެ، ލޫޓަން އިން ފުރަތަަމަ ހާފު ނިންމާލީ ކުރީގައި އޮވެ އެވެ.
ލިވަޕޫލުން ނަތީޖާ އަނބުރާލީ ދެ ވަނަ ހާފުގައި ހަތަރު ގޯލު ޖަހައިގެންނެވެ.
އެ ގޮތުން، ދެ ވަނަ ހާފް ފަށައިގެން، 11 މިނިޓް ތެރޭ ލިވަޕޫލުން ވަނީ ގޯލެއް ޖަހައި އެއްވަރުކޮށްފަ އެވެ. އެ ޓީމުން އެއްވަރުކުރި ލަނޑު ޖެހީ މެޗުގެ 56 ވަނަ މިނިޓްގަ އެެވެ. މިއީ އަލެކްސިސް މެކް އަލިސްޓާ ނެގި ކޯނަރަކުން ލިވަޕޫލްގެ ކެޕްޓަން، ވާޖިލް ވެން ޑައިކް ބޮލުން ޖެހި ގޯލެކެވެ. އޭގެ ދެ މިނިޓް ފަހުން، މެކް އަލިސްޓާ ނެގި ހުރަހަކުން ބޮލުން ގޯލު ޖަހައި، ކޯޑީ ގަކްޕޯ ވަނީ ލިވަޕޫލަށް ލީޑުނަގައިދީފަ އެވެ.
މެޗުގެ 71 ވަނަ މިިނިޓްގައި ލިވަޕޫލްގެ ތިން ވަނަ ލަނޑު ޖެހީ ލުއިޒް ޑިއާޒް އެވެ. މިއީ އޭރިއާތެރެއިން ލޫޓަންގެ ކުޅުންތެރިއަކު ކައިިރިން ނައްޓާފައި ގޮސް ޖެހި ގޯލެކެވެ. މެޗުގެ އިތުރު ވަގުުތުގައި، ލޫޓަން އޭރިއާތެރެއިން ލިބުނު ބޯޅައެއް ގޯލުގެ މަތީ ކަނަށް ފޮނުވާލައިގެން، ހާވީ އެލިއަޓް ވަނީ ލިވަޕޫލްގެ ހަތަރު ވަނަ ލަނޑު ޖަަހައިފަ އެވެ.
ލިވަޕޫލަށް ދެން އޮތީ އާދިއްތަ ދުވަހުގެރޭ ކުޅޭ، ލީގު ކަޕް ފައިނަލް މެޗެވެ. ލިވަޕޫލްގެ ކޯޗު ޔާގެން ކްލޮޕް ބުނީ، އެ މެޗަށް ދާއިރު ވެސް އަނިޔާގެ މައްސަލަތަކަށް މާ ބޮޑު ހައްލެއް ލިބޭނެ ކަމަށް އުންމީދު ނުކުރާ ކަމަށާއި 11 ކުޅުންތެރިން މެޗު ކުޅެވޭ ހާލަތުގައި ތިއްބަސް މެޗަށް އަރައި، ތަށްޓަށް ޓާގެޓްކޮށް ފަހު ވަގުތާ ހަމައަށް މަސައްކަތް ކުރާނެ ކަމަށެވެ.
