މެންޗެސްޓާ (ފެބްރުއަރީ 21) - އިނގިރޭސި ޕްރިމިއާ ލީގުގައި ރޭ އާލިން ބްރައުޓް ހާލަންޑް ޖެހި ގޯލުން 1-0 އިން ބްރެންޓްފޯޑް ބަލިކޮށް، މެންޗެސްޓާ ސިޓީން ލީގުގެ އެއް ވަނައިގައި އޮތް ލިވަޕޫލާ އެއް ޕޮއިންޓަށް ގާތަށް ޖެހިލައިފި އެވެ.
އެއް ވަނައިގައި އޮތް ލިވަޕޫލަށް 25 މެޗުން 57 ޕޮއިންޓް ލިބިފައިވާއިރު، ސިޓީ ދެ ވަނައިގައި އޮތީ 25 މެޗުން 56 ޕޮއިންޓް ހޯދައިގެންނެވެ. ތިން ވަނައިގައި އޮތް އާސެނަލަށް ވަނީ 25 މެޗުން 55 ޕޮއިންޓް ލިބިފަ އެވެ.
ސިޓީގެ އިއްތިހާދު ސްޓޭޑިއަމްގައި ރޭ ކުޅުނު މެޗަށް އެ ޓީމުން ނުކުތްއިރު، އެންމެ ފަހުން އަމިއްލަ ދަނޑުގައި ކުުޅުނު މެޗުން ޗެލްސީއާ 1-1 އިން އެއްވަރުވެ، ސިޓީގެ މޮޅުވުމުގެ ސިލްސިލާ ވަނީ 11 މެޗަށް ފަހު ނިިމިފަ އެވެ. އަލުން ފޯމަކަށް އެޅެން ރޭގެ މެޗުން ރަނގަޅު ނަތީޖާއެއް ނެރެން ނުކުތް ސިޓީ އަށް ރޭގެ މެޗުން މޮޅުވެވުނީ އުނދަގުލުންނެވެ.
ބްރެންޓްފޯޑުން ރަނގަޅު ހިތްވަރެއް ދެއްކި މި މެޗުގައި ސިޓީން ޖެހި ހަމައެކަނި ލަނޑު މެޗުގެ 71 ވަނަ މިނިޓްގައި ޖެހީ ހާލަންޑް އެވެ. މިއީ ހޫލިއަން އަލްވަރޭޒް ދިން ބޯޅަ އަކުން ހާލަންޑް ޖެހި ގޯލެކެވެ. އަނިޔާ އަށް ފަހު އަލުން ފޯމަކަށް އެޅެން މަސައްކަތް ކުރަމުން އަންނަ ހާލަންޑް މި ޖެހީ މި ފަހަރު ލީގުގައި އޭނާގެ 17 ވަނަ ގޯލެވެ. ސީޒަނަށް ބަލާނަމަ ހުރިހާ މުބާރާތެއްގައި ކުޅުނު މެޗުތަކުން 22 ގޯލު ޖަހާފައިވެ އެވެ.
ސިޓީން މި މެޗުގައި ކުޅުނީ، ފިޓްނަސް މައްސަލަައެއްގައި ހުރި ކެވިން ޑި ބްރޭނާ ބެންޗުގައި ބައިންދައިގެންނެވެ. ގާޑިއޯލާ ބުނީ ސީޒަނުގައި ކުރިއަށް މުހިންމު މެޗުތަކެއް ހުއްޓައި، ރިސްކު ނަގަން ނުޖެހޭ ހާލަތްތަކުގައި އެކަން ނުކުރާނެ ކަމަށެެވެ.
