ލަންޑަން (ފެބްރުއަރީ 19) - މި ވަގުތު އެންމެ ރަނގަޅު ފޯމެއްގައި ހުރި ފޯވާޑް، ރަސްމުސް ހޮއިލުންޑް ޖެހި ދެ ގޯލުން، މެންޗެސްޓާ ޔުނައިޓެޑުން ރަށުންބޭރުގައި ލޫޓަން ޓައުން އަތުން 2-1 އިން މޮޅުވެއްޖެ އެވެ.
މި މެޗުގައި ހޮއިލުންޑް، 21، ލަނޑު ޖެހިއިރު، އޭނާ މި ވަނީ ލީގުގައި ޖެހިޖެހިގެން ހަ މެޗުގައި ލަނޑު ޖެހި އެންމެ ޒުވާން ކުޅުންތެރިޔާގެ ރެކޯޑް ހަދައިފަ އެވެ. މި ރެކޯޑް ކުރިން އޮތީ، 2021 ވަނަ އަހަރު ނިއުކާސަލް ޔުނައިޓެޑަށް ކުޅުނު ޖޯ ވިލޮކް އަތުގަ އެވެ.
ލޫޓަން ދަނޑުގައި ކުޅުނު މެޗު ފަށައިގެން 37 ސިކުންތު ތެރޭ ހޮއިލުންޑް ވަނީ ޔުނައިޓެޑަށް ލީޑުނަގައިދީފަ އެވެ. އޭގެ ހަ މިނިޓް ފަހުން، ހޮއިލުންޑް ދެ ވަނަ ގޯލެއް ވެސް ޖެހި އެވެ.
މެޗުގެ ތެރެއަށް އެނބުރި އައުމަށް ކުރި މަސައްކަތުގައި ލޫޓަން އިން ވަނީ 14 ވަނަ މިނިޓްގައި ގޯލެއް ޖަހައިފަ އެވެ. މި ލަނޑު ޖެހީ، އެ ޓީމުގެ ފޯވާޑް، ކާލްޓަން މޮރިސް އެވެ.
ދެ ވަނަ ހާފުގައި ޔުނައިޓެޑުން އިތުރު ގޯލެއް ޖަަހަން ފުރުސަތު ހޯދި އެވެ. އެ ގޮތުން، ހޮއިލުންޑް ހެޓްރިކް ހަދަން ހޯދި ފުރުސަތާއި، މާކަސް ރަޝްފޯޑާއި އަލެހަންދްރޯ ގާނާޗޯ އަށް ލިބުނު ބޯޅަތަކުގެ ބޭނުން ނުހިފުނެވެ.
އިތުރު ވަގުތުގައި ލޫޓަން އިން ނަތީޖާ ހަމަހަމަކުރެވޭތޯ ކުރި އެޓޭކެއްގައި ރޮސް ބާކްލީ ބޮލުން ފޮނުވާލި ބޯޅައެއް ބޭރުވީ ދަނޑީގައި ޖެހިފަ އެވެ.
މި މެޗުން ލިބުނު ތިން ޕޮއިންޓާ އެކު ޔުނައިޓެޑް އޮތީ، 25 މެޗުން 44 ޕޮއިންޓާ އެކު، ލީގުގެ ހަ ވަނައިގަ އެވެ. އެއީ ފަސް ވަނައިގައި އޮތް ޓޮޓެންހަމް ހޮޓްސްޕާސް އަށް ވުރެ ތިން ޕޮއިންޓް މަދުން ހޯދައިގެންނެވެ. އަދި ހަތަރެއްގައި އޮތް އެސްޓަން ވިލާ އާއި ޔުނައިޓެޑާ ދެމެދު ފަސް ޕޮއިންޓުގެ ފަރަގެއް އެބައޮތެވެ.
