އެމަނިކުފާނަކީ ކުށްވެރިއެއް ނޫންކަން ސާބިތުކޮށްދިނުމުން ކުރީގެ ރައީސް އަބްދުﷲ ޔާމީން މިނިވަންވާނެ ކަމަށް ބުނެ ޔޫތު މިނިސްޓަރުގެ ޑެޕިއުޓީ މަރިޔަމް ޝިއުނާ ފާޅު ކުރެއްވީ ރައީސުލްޖުމްހޫރިއްޔާ މުހައްމަދު މުއިއްޒުގެ ވިސްނުން ކަމަށް މުހައްމަދު މަލީހު ޖަމާލް މިއަދު ވިދާޅުވެއްޖެ އެވެ.
ކޮރަޕްޝަނުގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން އަންނަ ޔާމީން މިނިވަން ކުރައްވާނެ ކަމަށް ބުނެ ރައީސް މުއިއްޒު ރިޔާސީ ކެމްޕެއިނުގެ ތެރޭގައި ހެއްދެވީ ދޮގުކަން ޝިއުނާގެ ވާހަކައިން ސާބިތުވާ ކަމަށް، ރައީސް ޔާމީންގެ އާ ސިޔާސީ ޕާޓީ ޕީޕަލްސް ނެޝަނަލް ފްރޮންޓު އުފެއްދުމަށް އިސްކޮށް މަސައްކަތް ކުރައްވާ މަލީހު ވިދާޅުވި އެވެ.
"ރައީސް ޑރ. މުއިއްޒުގެ އެތެރެ ކޮއިލުގެ ބޭފުޅުން މިފަދަ ބޭއިންސާފުން ވާހަކަ ދެއްކެވީމަ އެކަމުން ސާބިތުވަނީ މިއީ ޑރ. މުއިއްޒުގެ ވިސްނުންކަން. އަދި ރިޔާސީ ކެމްޕެއިނުގެ ތެރޭ ރައްޔިތުންނަށް އޮޅުވާލެއްވީކަން. މިހާރު މައްސަލައަށް އަތް ބާނުއްވަނީ ކޮން ބައެއްކަން ސާފު. އަނިޔާވެރިކަން ނިމެނޭނެ،" އެކްސްގައި ކުރެއްވި ޕޯސްޓެއްގައި މަލީހު ވިދާޅުވި އެވެ.
ވ. އާރަށް ކުއްޔަށް ދިނުމުގައި ރިޝްވަތު ނަންގަވައި އެ ފައިސާ ލޯންޑާ ކުރިކަން ސާބިތުވެ ޔާމީން ޖަލަށްލުމަށް ހުކުމް ކުރީ ޑިސެމްބަރު 25، 2022 ގަ އެވެ. އެއިރު އިދިކޮޅު ފަރާތްތަކުން އެ ހުކުމް ސިފަ ކުރީ އެއީ "ހަރާމް ހުކުމެއް" ގެ ގޮތުގަ އެވެ.
ރައީސް ޔާމީން މިނިވަން ކުރުމަކީ ރައީސް މުއިއްޒުގެ އެންމެ ބޮޑު ރިޔާސީ ވައުދެވެ. ނަމަވެސް ސަރުކާރުން މިހާރު ބުނަނީ ރައީސް މުއިއްޒު ވައުދުވެވަޑައިގަތީ ޝަރީއަތަށް ސަރުކާރުން ނުފޫޒު ނުފޯރުވަން ކަމަށާއި ޔާމީން މިނިވަންކުރަން ރައީސް މުއިއްޒު ވެވަޑައިގެންނެވި ވައުދު މިހާރު ފުދިފައިވާ ކަމަށެވެ.
"އަޅުގަނޑު، ދެ ޕާޓީގެ ހުރިހާ މެންބަރުންނަށް އަދި ހުރިހާ ރައްޔިތުންނަށް ވެސް ދޭ ޔަގީންކަމަކީ އިރާދަކުރެއްވިއްޔާ އަޅުގަނޑު މި ކުރާ މަސައްކަތްކޮށް، އިންތިހާބު ކާމިޔާބުކޮށް، އިންޝާﷲ އެންމެ ފުރަތަމަ ވެސް އަޅުގަނޑުމެން ކުރާނެ ކަމަކީ ގާނޫނީ ހަމަތަކުގެ މަތިން އެމަނިކުފާނު މިނިވަން ކުރުން،" އޯގަސްޓް 8، 2023 ގައި ރައީސް މުއިއްޒު ވިދާޅުވި އެވެ.
