ޓްރަމްޕްގެ މައްޗަށް އުފުލާފައިވާ މަކަރާއި ހީލަތުގެ ދައުވާއާ ގުޅިގެން 453.5 މިލިއަން ޑޮލަރު ކޯޓަށް ދައްކަން ޖެހިއްޖެ އެވެ.
ޓްރަމްޕަށް ލިބިވަޑައިގަންނަވާ އާމްދަނީ އޮޅުވާލުމާ ގުޅޭ މި މައްސަލައާ ގުޅިގެން ނިއުޔޯކް ކޯޓުން ވަނީ އެ މަނިކުފާނުގެ މައްޗަށް 354.9 މިލިއަން ޑޮލަރު އަދި އިންޓްރެސްގެ ގޮތުގައި 98.6 މިލިއަން ޑޮލަރު ދެއްކުމަށް އަމުރު ކޮށްފަ އެވެ.
މިއާއެކު، ޖުމްލަ 453.5 މިލިއަން ޑޮލަރު ޓްރަމްޕް ކޯޓަށް ދައްކަވަން ޖެހިވަޑައިގަންނަވާނެ އެވެ.
ޓްރަމްޕްގެ މައްޗަށް ކުރި ހުކުމުގައި ވަނީ އެ މަނިކުފާނު ނިއުޔޯކްގެ ކޯޕަރޭޝަނެއްގައި އޮފިސަރެއް ނުވަތަ ޑިރެކްޓަރެއްގެ ގޮތުގައި މަސައްކަތް ކުރެއްވުން ތިން އަހަރަށް މަނާކޮށްފަ އެވެ.
ޓްރަމްޕްގެ މައްޗަށް ކުރި ދައުވާގައި ތުހުމަތު ކޮށްފައި ވަނީ އެ މަނިކުފާނުގެ އާއިލީ ވިޔަފާރިން ލިބޭ އާމްދަނީ އޮޅުވާލައި، ބޭންކްތަކަށް އޮޅުވާލައިގެން ލޯނު ހޯއްދަވަން މަސައްކަތް ކޮށްފައިވާ ކަމަށެވެ.
ޓްރަމްޕްގެ މައްޗަށް އުފުލާފައިވާ މި ދައުވާއަށް އޭނާ އިންކާރު ކުރައްވާއިރު، މި ދައުވާއަކީ ސިޔާސީ ބޭނުމަށް ކޮށްފައިވާ ދައުވާއެއް ކަމަށް ވިދާޅުވެ އެވެ.
ނޮވެމްބަރު 5, ގައި އޮންނަ އެމެރިކާގެ އިންތިހާބުގައި ވާދަކުރައްވާނެކަން ޓްރަމްޕް އިއުލާން ކުރައްވާފައިވާއިރު، އެ މަނިކުފާނުގެ މައްޗަށް ކުރި މި ހުކުމުގެ ސަބަބުން އިންތިހާބުގައި ވާދަކުރެއްވޭނެ ކަމާމެދު މިހާރު ވަނީ ސުވާލު އުފެދިފަ އެވެ.
ޓްރަމްޕްގެ މައްޗަށް މި މައްސަލައިގެ އިތުރުން ޖިނާއީ މައްސަލަތަކެއްވެސް ކޯޓުގައި ދަނީ ހިނގަމުންނެވެ. މިގޮތުން އެމަނިކުފާނުގެ މައްޗަށް އުފުލާފައިވާ މާލީ މުއާމަލާތަކާ ގުޅޭ މައްސަލައިގެ ޝަރީއަތް މާޗު، 25 ގައި ފެށުމަށް ވަނީ ނިންމާފަ އެވެ.
އުމުރުން 77 އަހަރުގެ ޓްރަމްޕްގެ މައްޗަށް އުފުލާފައިވާ ދައުވާތަކާ ގުޅިގެން ރައީސަކަށް ވުމުގެ އިމްތިޔާޒް އެމަނިކުފާނަށް ލިބެން ޖެހޭ ކަމަށް ވިދާޅުވެފަ އެވެ. ނަމަވެސް ކޯޓުން ވަނީ ޓްރަމްޕަށް ރައީސަކަށް ވުމުގެ އިމްތިޔާޒް ނުދޭން ނިންމައިފަ އެވެ.
