އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް އުފުލާފައިވާ ޖިނާއީ ދައުވާތަކުގެ ތެރެއިން މާލީ މުއާމަލާތަކާ ގުޅޭ ދައުވާތަކުގެ ޝަރީއަތް މާޗު، 25 ގައި ފެށުމަށް އިއްޔެ ނިންމައިފި އެވެ.
މިއީ އެމެރިކާގެ ތާރީހުގައި ވެސް އެ ގައުމުގެ ރައީސްއެއްގެ ޖިނާއީ ދައުވާއެއްގެ ފުރަތަމަ ޝަރީއަތެވެ.
ޓްރަމްޕްގެ ވަކީލުން ދައުވާ އަނބުރާ ނަގަން ޖެހޭ ސަބަބުތަކެއް ދެއްކި ނަމަވެސް، ކޯޓުން ވަނީ މައްސަލައިގެ ޝަރީއަތް ކުރިޔަށް ގެންދެވޭނެ ކަމަށް އިއްޔެ ނިންމައިފަ އެވެ.
މިގޮތުން މާޗު، 25 ވަނަ ދުވަހު ބާއްވާ ޝަރީއަތުގެ މަޖިލީހުގައި ޖޫރީއެއް ކަނޑަ އެޅުމަށް ވެސް ވަނީ ނިންމައިފަ އެވެ.
ޓްރަމްޕްގެ މައްޗަށް ދައުވާ އުފުލައި، ޝަރީއަތް ފެށުމާ ގާތްވެފައި މިވަނީ މި އަހަރުގެ ނޮވެމްބަރު 5 ގައި ބާއްވާ އެމެރިކާގެ ރިޔާސީ އިންތިހާބުގައި ވާދަ ކުރައްވާނެ ކަން އެ މަނިކުފާނު އިއުލާން ކުރައްވާފައި ވަނިކޮށެވެ.
ޓްރަމްޕްގެ ވަކީލުން ވިދާޅުވީ ޓްރަމްޕްގެ މައްޗަށް ދައުވާ އުފުލީ ސިޔާސީ ބޭނުމަށް ކަމަށާއި، ރައީސްއަކަށް ވުމުގެ އިމްތިޔާޒް އެމަނިކުފާނަށް ލިބިވަޑައިގަންނަވަން ޖެހޭ ކަމަށެވެ. ނަމަވެސް ކޯޓުން ވަނީ ޓްރަމްޕްގެ މައްޗަށް އުފުލާފައިވާ ޖިނާއީ ދައުވާގައި ރައީސްއަކަށް ލިބޭ އިމްތިޔާޒް ނުދޭން ނިންމައިފަ އެވެ.
