ސުޕްރީމް ކޯޓުގެ ފަނޑިޔާރު، އަލްއުސްތާޒު ހުސްނުއްސުއޫދު ޖުޑީޝަލް ސާވިސް ކޮމިޝަންގެ މެންބަރުކަމަށް އައްޔަނުކޮށް މަގާމުގެ ފަތްކޮޅު އަރުވައިފި އެވެ.
ފަނޑިޔާރު ހުސްނުއްސުއޫދު އެ މަގާމަށް އައްޔަން ކުރައްވާފައި ވަނީ ގާނޫނު އަސާސީގެ 158 ވަނަ މާއްދާއާއި ޖުޑީޝަލް ސާވިސަސް ކޮމިޝަނުގެ ގާނޫނުގެ ދަށުންނެވެ. ޖޭއެސްސީގެ މެންބަރުކަމުގެ ފަތްކޮޅު ހުސްނުއްސުއޫދުއަށް އެރުވީ މިއަދު ރައީސް އޮފީހުގައި އޮތް ރަސްމިއްޔާތެއްގައި ރައީސުލްޖުމްހޫރ މުއިއްޒު އެވެ.
ގާނޫނު އަސާސީގައި ބަޔާން ކޮށްފައި ވާގޮތުން، ޖޭއެސްސީގެ މެންބަރު ކަމަށް ސުޕްރީމް ކޯޓުގެ މެންބަރުން އިންތިހާބު ކުރާ އުއްތަމަ ފަނޑިޔާރު ފިޔަވައި އެހެން ފަނޑިޔާރަކު އައްޔަން ކުރެވޭނެ އެވެ.
އެ ކޮމިޝަނުގައި ދެން ތިއްބަވަނީ ހައި ކޯޓުން އިންތިހާބުކުރާ އެ ކޯޓުގެ ފަނޑިޔާރަކާއި، ދަށު ކޯޓުތަކުން އިންތިހާބުކުރާ ދަށު ކޯޓެއްގެ ފަނޑިޔާރެކެވެ. ގާނޫނީ ވަކީލުންގެ ތެރެއިން އިންތިހާބު ކުރާ ވަކީލެއްގެ އިތުރުން ދައުލަތުގެ ބަންޑާރަ ނައިބު ވެސް އިންނަވަ އެވެ.
އަދި ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި ރައްޔިތުންގެ މަޖިލީހުގެ ރައީސްއާއި ސިވިލް ސާވިސް ކޮމިޝަންގެ ރައީސްއާއި ރައްޔިތުންގެ މަޖިލީހުން ކަނޑައަޅާ އެ މަޖިލީހުގެ މެންބަރަކާއި މަޖިލީހުން ކަނޑައަޅާ އާންމުންގެ މީހެއް ވެސް ޖޭއެސްސީގައި ހިމެނެ އެވެ.
އެންމެ މަތީ މަރުހަލާގެ ކޯޓު، ސުޕްރީމް ކޯޓުގެ ފަރާތުން މިދިޔަ ހަތަރު އަހަރެއްހާ ދުވަހު އެ ކޮމިޝަނުގައި އިންނެވީ ފަނޑިޔާރު އައިޝާ ޝުޖޫން އެވެ. ކޮމިޝަނުގައި ސުޕްރީމް ކޯޓުގެ ފަރާތުން އިންނަވާ ފަނޑިޔާރު ބަދަލު ކުރި ސަބަބެއް އަދި ނޭނގެ އެވެ.
