އުރީދޫ މޯލްޑިވްސް އިން އަމާނަ ތަކާފުލް މޯލްޑިވްސް އާއި ގުޅިގެން، ރާއްޖެއިން ބޭރަށް ދަތުރުކުރާ މީހުންނަށް ހާއްސަ "އެމް ފައިސާ ޓްރެވަލް އިންޝުއަރެންސް" ޕެކޭޖެއް ތައާރަފުކޮށްފި އެވެ.
މި ޕެކޭޖު ފަރުމާކޮށްފައިވަނީ ފަސޭހަކަމާ އެކު އެމްފައިސާ މެދުވެރިކޮށް އިންޝުއަރަންސް ނެގޭނެ ގޮތަށެވެ. އެގޮތުން ދަތުރުގައި ދިމާވާ އެކިއެކި ހާދިސާތަކުން ލިބޭ މާލީ ގެއްލުން ތަކަށް މި ޕެކޭޖުން ބަދަލު ފޯރުކޮށްދޭނެ އެވެ.
އެމް-ފައިސާ ޓްރެވަލް އިންޝުއަރެންސް ޕެކޭޖުން ބަދަލު ފޯރުކޮށްދޭ ކަންކަން
ދަތުރުމަތީގައި ދިމާވި އެކްސިޑެންޓެއްގައި ނިޔާވުން ނުވަތަ ދާއިމީ ނުކުޅެދުންތެރިކަމެއް ކުރިމަތިވެއްޖެ ނަމަ 771،000ރ. އާ ހަމައަށް ބަދަލު ދިނުން ހިމެނެ އެވެ.
ކުއްލި ހާލަތްތަކުގައި ކުރަންޖެހޭ ބޭސްފަރުވާގެ ހަރަދުތަކަށް 1،542،000ރ. އާއި ހަމައަށް މި ޕެކޭޖުން ބަދަލު ފޯރުކޮށްދޭނެ އެވެ. ބަދަލު ފޯރުކޮށްދޭ އިތުރު ކަންކަމުގެ ތެރޭގައި، މެދުވެރިވި ހާލަތެއްގެ ސަބަބުން ދަތުރު ކެންސަލް ކޮށްލަން ޖެހުން ނުވަތަ ދަތުރު ކުރުކޮށްލާފައި އަންނަން ޖެހުން ވެސް ހިމެނެ އެވެ.
މީގެ އިތުރުން ފްލައިޓަށް އެރުވި ދަބަސް ގެއްލުން ނުވަތަ ޕާސްޕޯޓް ގެއްލުންފަދަ ހާލަތްތަކުގެ އިތުރުން ފުރަން އޮތް ފްލައިޓަށް ދިމާވި ކަމެއްގެ ސަބަބުން ދަތުރު ނުކުރެވުން ނުވަތަ، ފްލައިޓް ފުރުން 12 ގަޑިއިރަށް ވުރެ ލަސްވެއްޖެ ނަމަވެސް މި ޓްރެވަލް ޕެކޭޖުން ބަދަލު ފޯރުކޮށްދޭނެ އެވެ.
ޕެކޭޖުގެ އަގު
މި ޕެކޭޖް 14 ދުވަހުގެ މުއްދަތަކަށް ނުވަތަ 35 ދުވަހުގެ މުއްދަތަކަށް ނެގޭނެ އެވެ. އަދި މި ޓްރެވަލް އިންޝުއަރެންސް ޕެކޭޖުގައި އޭޝިއާ ބައްރުގެ ގައުމުތަކަށް ދަތުރު ކުރުމަށް ހާއްސަ އޭޝިޔާ ޕެކޭޖް، އަދި އަދި އެމެރިކާ ނުވަތަ ކެނެޑާއަށް ދަތުރު ކުރާ މީހުންނަށް ވެސް ހާއްސަ ޕެކޭޖު ލިބޭނެ ކަމަށް އުރީދޫން މައުލޫމާތުދެ އެވެ.
މި ޕެކޭޖުގެ އަގު ކަނޑައެޅިގެންދަނީ ޕެކޭޖުގެ މުއްދަތާއި ދަތުރު ކުރާ ގައުމުގެ ގޮތުންނެވެ. އެގޮތުން އޭޝިއާ ބައްރުގެ ގައުމަކަށް 14 ދުވަހުގެ މުއްދަތަކަށް ދަތުރު ކުރާނަމަ ދައްކާލަން ޖެހެނީ އެންމެ 117ރ. އެވެ.
އެއްކޮށް ދަތުރު ކުރާ މީހުން ވަކި ވަކިން ޕެކޭޖު ނެގުމުގެ ބަދަލުގައި އެއްޕެކޭޖުގައި ހުރިހާ މީހުން ހިމަނާލުމުގެ ފުރުސަތު މި ޕެކޭޖުން ލިބިގިންދާއިރު، 65 އަހަރުން ދަށުގެ ކޮންމެ މީހަކަކަށް ވެސް މި ޓްރެވަލް ޕެކޭޖު ނެގޭނެ އެވެ.
