ލަންޑަން (ފެބްރުއަރީ 12) - މެޗުގެ ފަހުކޮޅު ސްކޮޓް މެކްޓޮމިނޭ ޖެހި ލަނޑާ އެކު އިނގިރޭސި ޕްރިމިއާ ލީގުގައި ރޭ ރަށުން ބޭރުގައި އެސްޓަން ވިލާ އަތުން 2-1 އިން މެންޗެސްޓާ ޔުނައިޓަޑް މޮޅުވެއްޖެ އެވެ.
ގަދަ ހަތަރެއްގެ ޖާގައެއް ހޯދުމަށް ކުރަމުންދާ މަސައްކަތުގައި ޔުނައިޓަޑަށް ރޭ ލިބުނީ މުހިންމު މޮޅެކެވެ. ޔުނައިޓަޑް މި ވަގުތު އޮތި 41 ޕޮއިންޓާއެކު ތާވަލްގެ ހަ ވަނައިގައެވެ. ފަސް ވަނައިގައި 46 ޕޮއިންޓާއެކު އޮތީ ވިލާއެވެ. ހަތަރު ވަނައިގައި 47 ޕޮއިންޓާ އެކު އޮތީ ޓޮޓެންހަމް ހޮޓްސްޕާސް އެވެ.
ވިލާގެ ދަނޑުގައި ކުޅުނު މެޗުގެ 17 ވަނަ މިނިޓުގައި އެ ޓީމަށް ލީޑު ހޯދައިދިނީ ފޯވަޑް ރަސްމުސް ހޮއިލުންޑެވެ. މިއީ އެންމެ ފަހުން ކުޅުނު ހަތް މެޗުން ހޮއިލުންޑް ޖެހި ހަ ވަނަ ގޯލެވެ.
އެކަމަކު، މެޗުގެ 67 ވަނަ މިނިޓުގައި ވިލާގެ ޑަގްލަސް ލުއިޒް ޖެހި ލަނޑާއެކު މެޗުގެ ނަތީޖާ ހަމަހަމަވިއެވެ.
އެކަމަކު ބަދަލު ކުޅުންތެރިއެއްގެ ގޮތުގައި ކުޅެންއެރި ޔުނައިޓަޑްގެ މިޑްފީލްޑަރު މެކްޓޮމިނޭ މެޗުގެ 86 ވަނަ މިނިޓުގައި ޖެހި ލަނޑާއެކު ޔުނައިޓަޑުން އަލުން ލީޑު ނެގިއެވެ.
މެޗަށް ފަހު ޔުނައިޓަޑްގެ ކޯޗު ޓެން ހާގް ބުނީ މި މެޗުން މޮޅުވުމުން ޔުނައިޓަޑަށް ލިބުނީ ވަރަށް މުހިންމު ތިން ޕޮއިންޓް ކަމަށާއި ގަދަ ހަތަރަކަށް އެރުމަށް ކުރާ މަސައްކަތުގައި ލިބުނު ކުރިއެރުމެއް ކަމަށެވެ.
"މިއީ ވަރަށް މުހިންމު މޮޅެއް. ގަދަ ހަތަރެއްގެ ޓީމުތަކާ ކައިރިއަށް މި ޖެހިލީ. އެއީ މި މެޗުގެ އަމާޒަކީ،" ޓެން ހާގް ބުންޏެވެ. "މެޗު އެއްވަރުވުމުންވެސް އަހަރަމެން ހިތްވަރުކުރި. އަދި މެޗުގެ ނަތީޖާ އަހަރަމެން ކޮޅަށް އަނބުރާލި."
ވިލާގެ ކޯޗު އުނާއީ އެމެރީ ބުނީ މެޗުން ބަލިވީ މެޗުގައި އެ ޓީމަށް ލިބުނު ފުރުސަތުތަކުގެ ބޭނުން ނުހިފުމުން ކަމަށެވެ.
"މުޅި މެޗަށް ބަލާއިރު އެންމެ ކުޑަމިނުން ޕޮއިންޓެއްވެސް ވިލާ އަށް ހައްގު،" އެމެރީ ބުންޏެވެ.
