ދޮގު ހަބަރުތައް ނުފެތުރުމަށާއި ގައުމާއި އެއްކޮޅަށް ހަބަރުތައް ގެނެސްދިނުމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ގޮވާލައްވައިފި އެވެ.
ޝަހީދުންގެ ދުވަހުގެ މުނާސަބަތުގައި މިއަދު ރައީސް ދެއްވި ހިތާބުގައި ވަނީ މި ދުވަސް ނިސްބަތްވާ އަލިރަސްގެފާނުގެ ޖިހާދުން ލިބިގަންނަންޖެހޭ އިބްރަތްތަކަށް އަލިއަޅުވާލައިފަ އެވެ.
އެގޮތުން އަލިރަސްގެފާނުގެ ޖިހާދު މީޑިއާތަކާއި ވެސް މުހާތަބުކުރާ ކަމަށާއި، ގައުމާއި އެއްކޮޅަށް ހަބަރުތައް ފެތުރުމަށް ނަސޭހަތްތެރިވާކަމާއި ދޮގު ހަބަރު ނުފަތުރަން އިންޒާރުދޭކަން ރައީސް މުއިއްޒު ފާހަގަކުރެއްވި އެވެ.
"އަލިރަސްގެފާނުގެ ޖިހާދު މީޑިއާތަކާ އެބަ މުހާތަބުކުރޭ. ހަބަރު ފަތުރާއިރު ގައުމާ އެއްކޮޅަށް ހަބަރުތައް ގެންނަން އެބަ ނަސޭހަތްދޭ. ދޮގު ހަބަރުތައް ނުފަތުރަން އެބަ އިންޒާރުދޭ،" އެމަނިކުފާނު ވިދާޅުވި އެވެ.
ރައީސް އިތުރަށް ވިދާޅުވީ ބޭރުގެ ދަހިވެތި ބާރުތަކުގެ ފައިބުޑަށް ތިރިނުވުމަށާއި، ދިވެހިންގެ ސަލާމަތް ދިވެހިން އަމިއްލައަށް ހޯދުމަށް އަލިރަސްގެފާނުގެ ޖިހާދު ގޮވާލާ ކަމަށެވެ. އަދި މިއީ އަދުގެ ސިޔާސީ ފަރާތްތަކަށް ދެވޭ މެސެޖެއްކަން ރައީސް މުއިއްޒު ފާހަގަކުރެއްވި އެވެ.
ޒުވާންކަމުގެ އޮއެވަރުގައި ގައުމާއި ދީން ފަހަނައި އަޅައި ނުދާން ޒުވާނުންނަށް ވެސް އަލިރަސްގެފާނުގެ ޖިހާދުން ގޮވާލާއިރު، ލިބޭ އެންމެ ބޮޑު ފިލާވަޅަކީ މާތްﷲ ހައްގަށް ނަސްރު ދެއްވާނެކަން ކަމުގައި ރައީސް ވިދާޅުވި އެވެ.
"ހަގީގަތުގަ އަލިރަސްގެފާނުގެ ޖިހާދުން ލިބޭ އެންމެ ބޮޑު ފިލާވަޅަކީ މާތްﷲ ހައްގަށް ނަސްރު ދެއްވާނެކަން. އެއީ ބިމުގެ ކުޑަކަމަކާ އާބާދީގެ މަދުކަމަކާ ގުޅިފަ އޮންނަ ކަމެއް ނޫންކަން،" ހިތާބުގައި ރައީސް ފާހަގަކުރެއްވި އެވެ.
ރާއްޖޭގެ ކަނޑުގެ ސަރަހައްދުން ގެއްލުނު ބައި ހޯދައި، ރާއްޖެއަކީ ބޭރުގެ އަސްކަރިއްޔާގެ ބާރު ނެތް ގައުމަކަށް މި ސަރުކާރުން ހަދާނެކަމުގެ ޔަގީންކަން ވެސް ހިތާބުގައި ރައީސް މުއިއްޒު ވަނީ ދެއްވާފަ އެވެ.
