ލަންޑަން (ފެބްރުއަރީ 10) - ގަސްދުގައި ކުރާ ފައުލާއި ރެފްރީގެ ނިންމުންތަކަށް ހިތްހަމަނުޖެހިގެން ކުރާ އެޕީލްތަކަށް ނޫ ކާޑު ދެއްކޭ ގަވާއިދަަކަށް އަމަލުކުރަން ފުޓްބޯޅައިގެ ގަވާއިދުތައް ހަދާ އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފަށާފައިވާ މަސައްކަތާ ދެކޮޅަށް މަޝްހޫރު ކޯޗުން އަޑުއުފުލައިފި އެވެ.
އެމެރިކަން ފުޓްބޯޅަ/ރަގްބީގައި ސިން-ބިންގެ ގޮތުގައި މަޝްހޫރުވެފައިވާ، ނޫ ކާޑު، ފުޓްބޯޅައިގައި ތައާރަފްކުރާއިރު، އެ ކާޑު ދައްކައިފިނަމަ، ކުޅުންތެރިއަކު 10 މިނިޓަށް ދަނޑުން ފައިބަން ޖެހޭނެ އެވެ. ދެ ފަހަަރަށް ނޫ ކާޑު ދައްކައިފިނަމަ، ދަނޑުން މުޅިން މެޗަށް ދަނޑުން ބާލާނެ އެވެ. ރީނދޫ ކާޑަކާއި ނޫ ކާޑެއް ދައްކައިފިނަމަ ވެސް މުޅި މެޗުން ދެން އިތުރަށް ފުރުސަތު ނުލިބޭނެ އެވެ.
ސީނިއާ ފުޓްބޯޅަ އަށް ސިން-ބިން ތައާރަފްކުުުރުމުގެ މަޝްވަރާތައް ކުރިއަށްދާ ބައްދަލުވުން އޮތީ އަންނަ މަހުގަ އެވެ. އިނގިރޭސި އެފްއޭ އިން ސިން-ބިން ޓެސްޓް ކުރަން މަސައްކަތްކުރާނީ އަންނަ ސީޒަނުގެ އިނގިރޭސި އެފްއޭ ކަޕާއި ވިމެންސް އެފްއޭ ކަޕްގައި ކަމަށް ދި ޓައިމްސް އިން ވަނީ ރިޕޯޓްކޮށްފަ އެވެ.
ޓޮޓެންހަމްގެ ކޯޗު އަންގޭ ޕޮސްޓެކޮގްލޫ ބުނީ، މި ވަގުތު ވެސް ފުޓްބޯޅައިގައި ކާޑު ދައްކާ އުސޫލު މި އޮތީ ވަރަށް ރަނގަޅަށް ސާފުކޮށް ފެންނަން ކަމަށެވެ. މީގެ ތެރެއަށް އިތުރު ކާޑެއް ތައާރަފްކުރުމަކީ، މި އުސޫލު އޮޅުންބޮޅުންވެ، ހަލާކުގެ ތެރެއަށް ފުޓްބޯޅަ ހިނގައިދާނެ ކަމެއްގެ ގޮތުގައި ޕޮސްޓެކޮގްލޫ ގަބޫލުކުރެ އެވެ.
"އަހަންނަށް ނުފެނޭ، އެއް ޓީމެއްގެ ކުޅުންތެރިއަކު، 10 މިނިޓަށް ދަނޑުން ފައިބަން ޖެހޭ ގޮތަކުން އޮންނާނެ ފައިދާއެއް. ޔަގީނުން ވެސް ފުޓްބޯޅަ ހަލާކުވާ މަންޒަރު އަހަންނަށް އެބަ ފެނޭ،" ޕޮސްޓެކޮގްލޫ ބުންޏެވެ.
ޕޮސްޓެކޮގްލޫގެ ވާހަކަތަކަށް ތާއީދުކޮށް، ލިވަޕޫލްގެ ކޯޗު ޔާގަން ކްލޮޕް އާއި ނިއުކާސަލް ޔުނައިޓެޑްގެ ކޯޗު އެޑީ ހޯވް ވެސް ވަނީ ނޫ ކާޑުގެ ގަވާއިދު ކަމުނުދާ ކަމަށް ބުނެފަ އެވެ.
ކްލޮޕް ބުނީ އެންމެ ފުރަތަމަ މި ހިޔާލު ޝައުގުވެރިވި ކަމަށާއި އެކަމަކު ފަހުން ވިސްނާލިއިރު، އެނގުނު ކަމަކީ، ފުޓްބޯޅަ އަށް ގެންނަ ބަދަލުތަކުގައި، އައިފެބް އިން ގެނައި އެއްވެސް އާ ކަމެއް އޭނާ އަށް ކަމުުނުދާ ކަމަށެވެ.
ހޯވް ގަބޫލުކުރާގޮތުގައި ނޫ ކާޑުގެ ބޭނުމެއް ނެތެވެ. އެ ކާޑުގެ ބޭނުން މި ވަގުތު ރީނދޫ ކާޑުން ވެސް ފުދޭ ކަމަށް ހޯވް ވަނީ ބުނެފަ އެވެ.
"ރަނގަޅަށް އޮތް ކަމެއް ބަދަލުކުރަން އުޅެގެން، އިތުރަށް ގޯހެއް ވާން އަހަރެން ނޭދެން،" ހޯވް ބުންޏެވެ.
މީގެ އިތުރުން ވެސް ގިނަ ކޯޗުން ވަނީ މި ބަދަލާ ދެކޮޅަށް ވާހަކަ ދައްކައިފަ އެވެ.
އައިފެބްގެ އެދުމަށް އިނގިރޭސި އެފްއޭ އިން ވަނީ 2019-20 ސީޒަނުން ފެށިގެން، އިނގިރޭސި ގްރާސް ރޫޓް މުބާރާތްތަކުގައި ސިން-ބިން ޓްރަޔަލްސް ކުރިއަށްގެންދަމުންނެެވެ. އެފްއޭގެ ތަފާސްހިސާބުތަކަށް ބަލާއިރު، ސިން-ބިންގެ ޓްރަޔަލްސް ފެށި ފަހުން، ފައުލުތަކުގެ ނިސްބަތް ވަނީ ދަށްވެފަ އެވެ.
ނޫ ކާޑުގެ މި ގަވާއިދާ ޔޫރަޕްގެ ގިނަ ލީގުތަކުން ދެކޮޅެވެ. ޔުއެފާގެ ރައީސް އަލެކްސަންޑަ ޗެފެރިން ވެސް ވަނީ މި ގަވާއިދާ ދެކޮޅަށް ވާހަކަ ދައްކައިފަ އެވެ.
