އެމްޕީއެލް އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގެ ކުއާޓާ ފައިނަލް ފަހު މެޗުގައި ލެގޫންސް ސްޕޯޓްސް ކްލަބް އަތުން 3-1 އިން މޮޅުވެ، ޓެންޓް ސްޕޯޓްސް ކްލަބުން މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.
ސެމީގެ ފުރަތަމަ މެޗުގައި އަންނަ އާދިއްތަ ދުވަހު، ޓެންޓް ކުޅެން ޖެހޭނީ މަސް އޮޑި ސްޕޯޓްސް ކްލަބާ އެވެ. ދެ ވަނަ ސެމީގައި ހޯމަ ދުވަހު ހަވީރު، ވިކްޓަރީ ސްޕޯޓްސް ކްލަބާއި ނިއު ރޭޑިއަންޓް ސްޕޯޓްސް ކްލަބް ބައްދަލުކުރާނެ އެވެ. ފުރަތަމަ ޑިވިޝަނަށް ޕްރޮމޯޓްވާނީ، ފައިނަލަށް ދަތުރުކުރާ ދެ ޓީމެކެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގެ ހަތް ވަނަ މިނިޓްގައި ޓެންޓަށް ލީޑުނަގައިދިނީ މުހައްމަދު އަހަދުﷲ ނަގައިދިން ހުރަހަކުން، އެ ޓީމުގެ ކުރިއަށް ކުޅޭ، އަލީ އިހުސާން ބޮލުން ޖެހި ގޯލުންނެވެ.
މެޗުގެ 21 ވަނަ މިނިޓްގައި، ޓެންޓުން ވަނީ ލީޑުފުޅާކޮށްފަ އެެވެ. އެ ޓީމަށް މި ލަނޑު ވެސް ޖަހައިދިނީ އިހުސާން އެވެ. އިހުސާން މި ލަނޑު ޖެހީ އޭރިއާތެރެއިން ލިބުނު ރީބައުންސް އަކުންނެވެ. މިއީ، ލެގޫންސްގެ އޭރިއާބޭރުން، ޓެންޓްގެ ފުލްބެކް، އަހުމަދު ފިރާޝް ޖެހި ބޯޅައެއް، ލެގޫންސްގެ ކީޕަރު، މުހައްމަދު އިމްރާން އަތުގައި ޖެހިފައި ނުކުތް ވަގުތު، އިހުސާން ޖެހި ގޯލެކެވެ.
ފުރަތަމަ ހާފު ނިމުމުގެ ކުރިން ޓެންޓުން ތިން ވަނަ ގޯލެއް ޖެހި އެވެ. މެޗުގެ 41 ވަނަ މިނިޓްގައި ޓެންޓްގެ މި ގޯލު ޖެހީ، މި ފަހަރުގެ ދެ ވަނަ ޑިވިޝަނުގައި އެ ޓީމަށް މޮޅު ކުޅުމެއް ދައްކަމުން އަންނަ، އަހުމަދު ރިލްވާން (ރިލޭ) އެވެ. އޭނާ މި ލަނޑު ޖެހީ، އޭރިއާތެރެއިން ލިބުނު ފުރުސަތެއްގައި ލެގޫންސްގެ ދެ ކުޅުންތެރިން ކައިރިން ދެމިގަތުމަށް ފަހު، ގޯލުގެ މަތީ ކަނަށް ބޯޅަ އަމާޒުކޮށްލައިގެންނެވެ.
މެޗުގައި ލެގޫންސް އިން ޖެހި ހަމައެކަނި ލަނޑު ކާމިޔާބުކޮށްދިނީ އެ ޓީމަށް ކުޅޭ ގައުމީ ޓީމުގެ ކުރީގެ ކެޕްޓަން، އަސްހަދު އަލީ (އަޑުބަރޭ) އެވެ. މިއީ، މެޗުގެ 66 ވަަނަ މިނިޓްގައި ލިބުނު ހިލޭޖެހުމަކުން، ލެގޫންސް އަށް ކުޅޭ ރަޝިއާގެ ފޯވާޑް، ވްލަޑިސްލާފް ކޮރްމިޝިން ނެގި ބޯޅައަކުން އަޑުބަރޭ ބޮލުން ޖެހި ގޯލެކެވެ.
ދެ ވަނަ ޑިވިޝަން ފުޓްބޯޅަ މުބާރާތުގެ ފައިނަލް މެޗު ކުޅޭނީ މި މަހުގެ 16 ވަނަ ދުވަހު އެވެ.
