ކުޅުނު ހުރިހާ މެޗަކުން މޮޅުވެ، މަސް އޮޑި ސްޕޯޓްސް ކްލަބުން ދެ ވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން، ހޯދުމުގެ އަސްލަކީ އެ ޓީމުގެ އެންމެން ގުޅިގެން ކުރި މަސައްކަތް ކަމަށް ޓީމުގެ ކޯޗު، މުހައްމަދު އާތިފް (އާތީ) ބުނެފި އެވެ.
މަސް އޮޑިން ވަނީ ދެ ވަނަ ޑިވިޝަނުގައި ކުޅުނު ހުރިހާ މެޗެއް ކާމިޔާބުކުރިއިރު، ފައިނަލުގައި 3-2 އިން ވިކްޓަރީ ސްޕޯޓްސް ކްލަބް ބަލިކޮށްފަ އެވެ.
ފައިނަލް މެޗަށް ފަހު، އާތީ ބުނީ، މުބާރާތުގެ ތަށްޓަކީ، މަސް އޮޑި އިން ވަރަށް މިންނަތުން، ވަރަށް މަސައްކަތް ކޮށްގެން ހާސިލްކުރި ކަމެއް ކަމަށެވެ. އަދި ޓީމުގެ ފޯކަސް މުޅިން ވެސް ހުރީ ފުރަތަމަ ޑިވިޝަނަށް ޕްރޮމޯޓްވުމަށް ކަމަށާއި އަނެއް ޓާގެޓަކީ ތަށި ކަމަށެވެ.
ސެމީ ފައިނަލުން، ޓެންޓް ސްޕޯޓްސް ކްލަބް އަތުން 5-1 އިން މޮޅުވެ، ފައިނަލަށް ދިއުމާ އެކު، މަސް އޮޑި އަށް ފުރަތަމަ ޑިވިޝަންގެ ޖާގަ ޔަގީންވި އެވެ. އެ މެޗަށް ފަހު، އާތީ ބުނީ، އޭނާ އަށް ހަވާލުކުރި ޓާގެޓް ހާސިލްވީ ކަމަށާއި ދެން އޮތް ތަށީގެ ޓާގެޓްގެ ކަންކަން ދޫކޮށްލާނީ ކުޅުންތެރިން އަތްމައްޗަށް ކަމަށެވެ.
"ދެން، އެކަމަކު ކުޅުންތެރިން ކައިރީގައި ބުނިން ވިއްސަކަށް މިނިޓް ތެރޭ ކުޅުންތެރިންނަށް ނުވެއްޖިއްޔާ ކޯޗު އަތަށް ޓީމު ދެއްޗޭ. ކުޅުންތެރިންނާއި ކޯޗު އަދި އޮފިޝަލުން ޓީމެއްގެ ގޮތުގައި ކުރި މަސައްކަތް މިއީ،" ފައިނަލް މެޗަށް ފަހު، ބޭއްވި އުފާފާޅުކުރުމުގެ ތެރެއިން ދިން އިންޓަވިއުގައި އާތީ ފާހަގަކުރި އެވެ.
"ކުޅުންތެރިން ކައިރީގައި އަހާލީމަ އެނގޭނެ، ކުޅުންތެރިން ބޭނުން ޓެކްޓިކްސް އަކަށް، ކުޅުންތެރިން 11 އެއް ނަގަން ފުރުސަތު ދީގެން މި ކުޅުނީ، ކޯޗުކަން ކުރާއިރު ވަރަށް މުހިންމު ވާނެ ކުޅުންތެރިންގެ ސަޕޯޓް ކޯޗަކަށް. އެހެންވީމަ، ކޯޗު، ކުޅުންތެރިންނަށް އިތުބާރު ފެށުނުއިރުއްސުރެ ކުރަމުން މި އަންނަނީ. އެހެންވީމަ، ކުޅުންތެރިން މި ބުނީ، ތިމަންނަމެން އަތަށް ދިނަސް މި ކަން ކޮށްދޭނަމޭ. އެހެންމަ އެ ގޮތަށް ފައިނަލް މެޗުގައި ކުޅުންތެރިން އެ ގޮތަށް މި ކަން ކޮށްދިނީ،"
ސެމީ ފައިނަލް މެޗާ ހަމައަށް އައިއިރު މަސް އޮޑި ކޮޅަށް މި މުބާރާތުގައި ގޯލެއް ނުވަދެ އެވެ. އާތީ ބުނީ، ފައިނަލް މެޗުގެ ކުރިން ކޮޅަށް ގޯލެއް ވަނުމުގެ ކަންކަން ތަޖުރިބާ ކޮށްލަން ލިބުމަކީ އެ ޓީމަށް ރަނގަޅަކަށް ދިމާވި ކަމެއް ކަމަށެވެ.
"އެ ލަނޑު ވަނުން އެއީ ފައިނަލަށް އަހަރެމެންނަށް އައި ރަނގަޅު ކަމެއް ކަންނޭނގެ. އެހެންނޫންނަމަ ގޯލެއް ނުވަދެ ފައިނަލަށް އައިނަމަ މިއަދު މިވީ ހެން، އެއްވަރުވެއްޖިއްޔާ ހިތްވަރު އެލޭ ގޮތް ވެދާނެ. އެހެންވީމަ މޮޓިވޭޓްވެގެން ތިބުމަށް، ވިސްނަން ޖެހޭ ގޯލު ވެސް އެއީ ކޮޅަށް ވަންނަ އެއްޗެއް ކަމާ ބަލިވުން ވެސް އެއީ އޮންނަ އެއްޗެއްކަން ވިސްނައިދީގެން މި އައީ،" ގައުމީ ޓީމުތަކުގައި ވެސް މަސައްކަތް ކޮށްފައިވާ އާތީ ބުންޏެވެ.
މަސް އޮޑި ޓީމާ އެކު ފުރަތަމަ ޑިވިޝަނުގައި ވެސް ފެނިދާނެތޯ އެހުމުން، އާތީ ބުނީ އަދި ގޮތެއް ނުނިންމާ ކަމަށެވެ.
"އެއީ ފުރަތަމަ ބަލަން ޖެހެނީ، ރާއްޖޭގެ ފުޓްބޯޅަ މި އޮތް ހާލަތު ކަންނޭނގެ. ފުރަތަމަ ބަލާނީ މި އޮތް ހާލަތުގައި ބަޔަކު ގޮވައިގެން މި ކަން ވަން އިޔާ (އެއް އަހަރު) ކުރެވިދާނެތޯ. ވަރަށް ބޮޑު އެސެސް އެއް ހަދާފައި މިކަން ކުރަން ޖެހެނީ. އެހެންނޫނިއްޔާ ކުޅުންތެރިން މޯޓިވޭޓްނުވެ، އަހަރެން މޯޓިވޭޓް ނުވެ މިއީ ފަސޭހަ މަސައްކަތެއް ނޫން، އެއް އަހަރުގެ ދިގު ދަތުރެއް ކުރުމަކީ، ސިޓުއޭޝަނަށް ބަލަންޖެހެނީ އަދި ޑިސައިޑެއް ނުކުރަން،" ކުރިން، ވިކްޓަރީ، ވެލެންސިއާ އަދި ޓީސީ ސްޕޯޓްސް ކްލަބަށް ވެސް ކޯޗުކޮށްދިން އާތީ ބުންޏެވެ.
މަސް އޮޑިން ދެ ވަނަ ޑިވިޝަނުގެ ތަށި ހާސިލްކުރިއިރު، މި މުބާރާތުގައި ރާއްޖޭގެ ފުޓްބޯޅައިގެ ދެ ބާރު ކަމަށްވާ ވިކްޓަރީ އާއި ނިއު ވެސް ވާދަކުރި އެވެ. އާތީ، ބުނީ ވިކްޓަރީ އާއި ނިއު އަށް ކުޅުމަކީ، އޭނާގެ ކުޅުމުގެ ކެރިއަރާއި ކޯޗިން ކެރިއަރުގައި ވެސް އެކި ފަހަރު މަތިން ކޮށްފައިވާ ކަމެއް ކަމަށެވެ.
އާތީ ބުނީ މީގެ އެންމެ މުހިންމު ކަމަކީ، ނިއު އާއި ވިކްޓަރީ ނޫން ކަމުގައި ވިޔަސް، އިދިކޮޅަށް ނުކުންނަ ކޮންމެ ޓީމަކަށް ފުރިހަމަ އިހުތިރާމް ދީގެން ނުކުތުން ކަމަށެެވެ.
