ދިވެހިރާއްޖޭގައި ތިބި އިންޑިއާ ސިފައިން ފޮނުވާލުމަށް އެ ގައުމާއެކު ކުރިއަށް ގެންދާ މަޝްވަރާތަކުގެ ތަފުސީލު ހާމަކުރަން ސަރުކާރުން ދެކޮޅު ހަދައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ހުށަހެޅި ހުށަހެޅުމުގެ ޖަވާބުގައި ފޮރިން މިނިސްޓްރީން ބުނެފައިވަނީ މި މައްސަލާގައި އިންޑިއާ އާއެކު 13 ބައްދަލުވުމެއް ބާއްވާ ފަސް ލިޔުމެއް އެ ގައުމަށް ފޮނުވާފައިވާ ކަމަށެވެ. ނަމަވެސް, އެ މަޝްވަރާތަކުގެ ތަފުސީލު ހާމަކުރަން ފޮރިން މިނިސްޓްރީން ވަނީ ދެކޮޅު ހަދާފަ އެވެ.
"އެ ބައްދަލުވުންތަކުގެ ތަފުސީލު ގާނޫނު ނަމްބަރު 1/2014 (މައުލޫމާތު ހޯދާ ލިބިގަތުމުގެ ހައްގުގެ ގާނޫނު) ގެ 22 ވަނަ މާއްދާއަށް ރިއާޔަތްކޮށް، ތިޔަ ފަރާތާއި ހިއްސާކުރެވެން ނެތް ވާހަކަ ދަންނަވަން," ހާރިޖީ ވުޒާރާގެ ޖަވާބުގައި ބުނެފައިވެ އެވެ.
titledesc
ގާނޫނުގެ އެ މާއްދާގައި މައުލޫމާތު ސިއްރުކުރެވޭ އެތައް ސަބަބުތަކެއް ބަޔާންކޮށްފީ ނަމަވެސް ފޮރިން މިނިސްޓްރީގެ ޖަވާބުގައި، އެ މައުލޫމާތު ސިއްރުކުރަން ނިންމީ ކޮން ކަމަކާ ގުޅިގެން ކަމެއް ސާފުކޮށްދީފައެއް ނުވެ އެވެ.
ސަރުކާރުން އިންޑިއާ ސިފައިން ބޭލުމުގެ މަޝްވަރާތަކުގެ ތަފުސީލުތައް ސިއްރުކޮށްފައިވާއިރު، ރާއްޖޭގައި ތިބި ކަމަށް މި ސަރުކާރުން ބުނާ 88 ސިފައިން އަންނަ މާޗު މަހުގެ 15 ގެ ކުރިން އަނބުރާ ގެންދިއުމަށް ރައީސް ޑރ. މުހައްމަދު މުއިއްޒު އެދިވަޑައިގެންފައިވާ ކަމަށް ސަރުކާރުން ބުނެފައިވެ އެވެ.
މި މަޝްވަރާތަކުގެ އެންމެ ފަހުގެ ބައްދަލުވުމެއް ބާއްވާފައިވަނީ މި މަހުގެ 14 ގައި ރާއްޖޭގެ ފޮރިން މިނިސްޓްރީގަ އެވެ.
އެ ބައްދަލުވުމުގައި ރައީސް އޮފީހުގެ ޗީފް އޮފް ސްޓާފް އަބްދުﷲ ފަޔާޒާއި އެމްބެސަޑާ އެޓް ލާޖް އަލީ ނަސީރާއި އިންޑިއާއަށް ރާއްޖެއިން ކަނޑައަޅާފައި ހުންނަ ސަފީރު އިބްރާހިމް ޝަހީބާއި ޗީފް އޮފް ޑިފެންސް ފޯސް އަބްދުއްރަހީމް އަބްދުއްލަތީފް ބައިވެރިވެވަޑައިގަންނަވާ ކަމަށް މި ނޫހަށް އެނގިފައިވެ އެވެ. އިންޑިއާގެ ފަރާތުން ރާއްޖޭގައި ހުންނަވާ އެ ގައުމުގެ ސަފީރު މުނޫ މަހާވަރުގެ އިތުރުން އެ ގައުމުގެ ހާރިޖީ އިސް އޮފިޝަލުންވެސް މި ބައްދަލުވުމުގައި ބައިވެރިވި އެވެ.
އޭގެ ހަތަރު ދުވަސް ފަހުން އިންޑިއާގެ ހާރިޖިއްޔާގެ ތަރުޖަމާނު ވަނީ ބައްދަލުވުމުގައި މަޝްވަރާ ކުރެވުނީ އިންޑިއާގެ އޭވިއޭޝަން ޕްލެޓްފޯމުތަކުން ރާއްޖޭގައި ދެމުންދާ އިންސާނީ އެހީގެ ހިދުމަތް ދެ ގައުމުން އެއްބަސްވެވޭ ގޮތެއްގެ މަތިން ކުރިއަށް ގެންދަން ކަމަށް ވިދާޅުވެފަ އެވެ.
ރައީސް މުއިއްޒުގެ ފޮރިން ޕޮލިސީއަކީ އިންޑިއާއަށް ރާއްޖެއިން ބަރޯސާވެފައި އޮތް އޮތުން ނައްތާލުން ކަމަށް ސަރުކާރުން ބުނެ އެވެ. ރާއްޖޭގައި ތިބި އިންޑިއާ ސިފައިން ބޭލުމަކީ ވެސް އެމަނިކުފާނުގެ ވައުދެކެވެ. މިދިޔަ ނޮވެމްބަރު މަހު ވެރިކަމާ ހަވާލުވެވަޑައިގެން ފަހުން ރައީސް ވަނީ އިންޑިއާއަށް ވަރަށް ބޮޑަށް ފާޑުވިދާޅުވެ، ރާއްޖޭގެ މިނިވަންކަން ދަމަހައްޓާނެ ކަމަށް ވިދާޅުވެފަ އެވެ.
މި ސަރުކާރު ވެރިކަމާ ހަވާލުވިފަހުން އިންޑިއާ އާއި ދިވެހިރާއްޖެއާ ދެމެދު އޮތް ގުޅުން ގޯސްވެފައިވާއިރު ރައީސް މުއިއްޒު އެމަނިކުފާނުގެ އެންމެ ފުރަތަމަ ސްޓޭޓް ވިޒިޓް މިދިޔަ ހަފުތާގައި ކުރެއްވީ އިންޑިއާއާ ވާދަވެރި ޗައިނާއަށެވެ.
ޖެނުއަރީ 7، ގައި ފެށި އެ ދަތުރު ނިންމާލެއްވީ އޭގެ ހަ ދުވަސް ފަހުންނެވެ. އެނބުރި ރާއްޖެ ވަޑައިގެންވެސް ރައީސް ވަނީ އިންޑިއާއަށް ވަރުގަދަ ބަހުގެ ހަމަލާތަކެއް ރައްދުކުރައްވާފަ އެވެ.
