ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަޒުލުކުރަން ޖެހޭނީ ސަރުކާރު ތަމްސީލު ކުރައްވާ މަޖިލިސް މެންބަރުންގެ ފުރާނަ ދުއްވާލުމަށްފަހު ކަމަށް ވެރިކަން ހިންގާ ޕީއެންސީގެ ޕާލަމެންޓަރީ ގްރޫޕުގެ ލީޑަރު އަހުމަދު ސަލީމް މިއަދު ވިދާޅުވެއްޖެ އެވެ.
ރައީސް އަޒުލު ކުރުމުގެ މަސައްކަތް އިދިކޮޅު ޕާޓީތަކުން ފަށާފައިވާތީ އެކަމަށް އިޝާރާތް ކުރައްވާ، މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި، ސަލީމް ވިދާޅުވީ ރައީސް އަޒުލު ކުރުމަށް ސޮއި ހަމަކުރި ނަމަވެސް އެ ފުރުސަތު ސަރުކާރު މެންބަރުން ނުދޭނެ ކަމަށެވެ.
"އަޒުލު ކުރުމުގެ މަސައްކަތަކީ އެބޭފުޅުން ކުރާ މަސައްކަތެއް، އަޅުގަނޑުމެންގެ މަސައްކަތެއް ނޫން. އަޅުގަނޑުމެން މިއުޅެނީ ރައީސް އަޒުލު ކުރާކަށް ނޫން، އެކަމަށް ފުރުސަތެއް ވެސް ނުދޭނަން، އަޅުގަނޑުމެން އެކަން ހުއްޓުވާނަން. އަޅުގަނޑުމެންގެ ފުރާނަ ދުއްވާލާފަ ރައީސް އަޒުލު ކުރަން ޖެހޭނީ،" ސަލީމް ވިދާޅުވި އެވެ.
ރައީސް އަޒުލުކުރުމަށް އެމްޑީޕީ މެމްބަރުން ސޮއި ހަމަ ކުރީ ބައެއް ވަޒީރުންނަށް ރުހުން ނުދޭނެ ކަމަށް އެމްޑީޕީ މެމްބަރުން ހާމަކުރުމުން ވަޒީރުންނަށް ރުހުން ދިނުމަށް ނަގާ ވޯޓު ނެގިޔަ ނުދިނުމަށް ސަރުކާރު މެމްބަރުން މަޖިލީހަށް ހުރަސް އަޅަމުން ދިޔަ ވަގުތުގަ އެވެ.
ރައީސުލްޖުމްހޫރިއްޔާ އަޒުލު ކުރުމުގެ ގަރާރު ރައްޔިތުންގެ މަޖިލީހަށް ހުށަޅަން 34 މެމްބަރަކު ސޮއި ކޮށްފައިވާ ކަމަށް މި ނޫހަށް މައުލޫމާތު ލިބިފައިވެ އެވެ. ގަރާރު ހުށަހަޅަން ބޭނުން ވަނީ 26 ސޮޔެވެ.
އެހެންނަމަވެސް، އޭގެ ފަހުން މިހާރު ތިން ވަޒީރުން ފިޔަވައި އެހެން ހުރިހާ ވަޒީރުންނަށް ރުހުން ދީފައިވާއިރު، ރައީސް އަޒުލުކުރުމާ ގުޅޭ ގޮތުން ރަސްމީކޮށް އިދިކޮޅު ޕާޓީން އެއްޗެއް ހާމަކޮށްފައެއް ނުވެ އެވެ.
މަޖިލީހުން މިއަދު ނިންމީ ބަންޑާރަ ނައިބު އަހުމަދު އުޝާމް އާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރަށް ރުހުން ނެތް ކަމަށެވެ. ނަމަވެސް އޭގެ ފަހުން އެ ތިން ބޭފުޅުން ވަނީ އަނެއްކާ ވެސް ކެބިނެޓަށް އައްޔަނުކޮށްފަ އެވެ.
